Илгъечlуйни уlлджумее Мишлешни хивее меед йицlабыйий вухаlнабы гёдхьун.

Манче цlа делесни дуканейхъа илгъечlу. Чини вахтал’ цlа кlядхъаъаlнбы гьибхьырийнбы. Манбыше хаlдын баджарух гьагу. Медни аваданбышейхъа цlа гьадсыр деш.

Аlхырейни сенбышее Мишлешни хивыс цlайике хаlдын зиян хъетlу. Гьинчиле сабара сенбына гьихъа вуlханее гебхьунийн ушахар, чиле хъийгъыйни сен гётхьунийн хайбы шас къийнад йикlел’ водунбы.   Манбышин сиягьый гьайни йигъбыше гёдхьунийни йицlабышейий дуканын  хаlдхъау.

Хьойикни хивни цlа кlядхъаъани ташкилатна хааlрна Аlгьмад Раджабовни увгьойка, гьадиссе йигъни йигъын вухьа. Цlедда вуlхаlнабы гёдхьан гидгъыл. Манчике цlа къырагъыл’ни тикинтибышис илгъечlу. Йишда десте  чини вахтал’ гьибхьыр. Хивни аlрайлин кучебы даркашда ыхьайхъа гора,  сабара дагъамийвал’бышика растына хъабы. Манчихъа ил’дяакы, гьаlракатыква манчин оlги явашауйн, меднанкъаl илгъечlес гьадсыр деш. Хивни инсанаршед цlа  кlятхъаъаlнкъаl хаlдын гьунар гьагу. Манбыше джоке ахаlн кумаг гьувойн.

Цlайике хъетlуйн зиян хаlдын ыхьа. Кьоlбле хизан кьыlдмийс малкъарайс сауйни окlакван йицlабы дена авху. Манчиле гъайре дуканни ийессийсыд хаlдын  зиян хъетlу. Манкъун гыргыда мал цlайин гьалакау.

Къийна дюнйейл’ эхьени джурабаджура фалякатбышике ненаджар инсан къорамишхьа дешда. Манчихъа гора, гьаммаше аlгьтият гозетяъас вуккан. Хъийгъалетти сувал’ни хиваршее ешемишоохьени инсанаршихъад сана-санкъус кумаг гьелен югун аlдат водун. Манбыше дагъамийвалика растына хъарына инсан текра гьайсар деш.  Санаб — саджигейхъа сабы, гьарункъве зиян хъетlуйнбышис  джоке ахаlн кумаг гьелен. Мишлешни хивее гьихъа ыхьайни гьадисабышейиб джамаъаlтын маlгьабна  джомардийвалла гьагуна.  Умуд гьааъана, гьини элеесыб мишлешбыше цlайике зиян хъетlуйнбы кумаг дена гьавасарас деш. Мани карее авхуйни хиваршее ешемишоохьени инсанаршед иштырак гьауей сикlылдад югда ихьес. Гыргынбышис сагъвалла гьевлена, йыlкьынчиле гьуваадженбы!