ИдёдкIунийн кьаанун водун – олимпиадайн ва универсиадайн оIюнбы аIл’гьаани вахтал’, къидойкIални ярахын, айгьени атышин сес кIитойкIалан. Манчихъаб хаIбна маIъна вобна. Манчин инсанаршис фыкырамишивхьесда ва хъобкуни, саакитни йаIххъылхъа савалесда имкан гьооли. Анджах аIхреени вахтал’ мани идёдкIунни кьаанунылхъа азгъунувхьайни инсанарше джизых хъабгъы.
Донбассыл’ ешемишехьен джамаъаIт укронацистаршике къорамишаъасдимее Россиейн феврал’ни вуза спецоперацие гидгъыл. Къийнад ман таамхьа дешодун. Мани спецоперациее йишди цIаIхбышди джегьилершед иштыракаъа водун. Гьел’бедти, мааъаб гьабатIанбыб, яраламишивхьайнбыб, батмышивхьайнбыб вобунбы. Манбы даIвъийн кIарын лышанбы водунбы. Мани игитершин едигар ши йишди таарыхе гьуваджес ыккан. Укронацистаршиквани са вурушее йишда, Гыл’мецIни хивеенчена чодж Амрагь Кьурбанов кьаIгьраман хьинне хъикIу. Манкъуни гьаIкIеедын некролог ва макьале ши «Нур» кIазетни гьийд чапыке хъигъечIуйни нумрабышее гьувойнбы. Манкъуна игитийвалла йишди джегьилершини фыкырбышее гьаммаше аахвасда.
Октябрьни 18-чил’ Амрагь едике ыхьайни хивее манкъуни едигарыс къадсырыйн футболын турнир илгъечIу. Ман турнир алгъагьасда мислягьаIт Гыл’мецIни хивни имаме, ЦIаIхни дерайл’ни фонд «Инсанни» эл’чийе АIсадуллагь Рамазанове къавдже.
Мани йигъыл’ тезеда аляуйн уфтанын футболын майдан Гыл’мецIнийий Лекни хиваршини аIреени чейлягъа ачмишау. Ман аляъан сен водун. Футболын майдан Дагсельхозстройни къуллухчийни Ризван Мирзоевни гьаIракатыква ва башарайка аляу. ГыргынкъукIле сагъул-варул эйгьи.
Футболын турнир тешкиляъас спонсорарше -Кьурбан Кьурбанове, Адил Давудове, Мустафа Байрамове хыл’авхъу. ГыргынкъукIле сагъул-варул эйгьи.
Футбол гьуваагас тезе спортни майдамахъа мани йигъыл’ 8 команда абы.
Футболын майдам ачмишаъас районеече къуллухчера, хиваршин чIакIынбы, мактаббышин директорар, журналистар, цIаIхни дерайни хиваршеенче джегьилер сабы. МаIгьачкъалеенче гыл’мецIбышди джегьилершина десте мани спортни байраме иштыракаъас ва Амрагьни рыIгьыс аIянаъас гьабкIын.
Маджлис Гыл’мецни администрациейни хааIрункъвее Гъейбуллагь ЫIмранове ачухавъу. Манкъвее абыйн мигьманар саламыква къаршламишавъуйле хъийгъа, турнир шавусый къадсырва увгьу. Гойне манкъвее чыхышбы гьаъас абыйни мигьманаршис хааишаъу.
АIтрафлы чыхышбы Рутул районни казначействайни хааIрункъве Айбек Ибрагьимове, районни йаIхъбышди управлениейни хааIрункъвее ШаIфи АIбдуллаеве, ишкарарше, мактабни маъаIллимарше ва абыйни мигьманарше гьау. Чыхыш гьаъани гыргынбыше футболын майдам аляуйнбышис, турнир къурмишауйнбышис миннатдарийвалла агъмишавъу. Гьаммашийни дюнйеехъа аркIынни Амрагьылхъа Аллагьна раIгьам къахувы.
Маджлис таамувхьайле хъийгъа, футболын оIюн гидгъыл. ЦIывлийни гьаваахъа ил’дяакы, джегьилерше уфтанын оIюнбы гьагу. Ман оIюнбы хъодкуйнбы ыхьесдимее, судьебыше назарат ыккы. Мани йигъыл’ 8 командайн баIстбы гьау. Екунбы ыкыийле хъийгъа, цIеббыйна джига Гыл’мецIни хивни «Къарадагъ» командайн авхъу, кьодъэсда джига коIдъэсди Гыл’мецIни хивни камандайн авхъу, хьебыдъэсда джига Миххьейни хивни командайн авхъу. 1 джига авхъуйни командайс 30 аазыр пылна, 1 дараджайквана диплом, кубок ва медалбы гьуво, 2 джига авхъуйни камандайс 20 аазыр пылна, 2 дараджайквана диплом, кубок ва медалбы, 3 джига авхъуйни командайс 15 аазыр пылна, 3 дараджайквана диплом , кубок ва медалбы гьуво.
Ман пылбы, призбы Гыл’мецIни хивни ишкарарше (бизнесменарше) гьувы ва маджлисыс хыл’авхъу.
ОIюн гьувааганбышди аIрее ишкарар, дохтурар, маъаIллимар ва медын санаъаIтбы гьаъан джегьилер вухьа.
Турнирна эн югна вратарь Шериф Ибрагьимов гьыIсабхьа. Манкъус пайис районни депутатаршини иджласни садрее Назим РаIгьимове джуке 5 аазыр пылна гьувы.
Турнирна эн югни оIюнчий Турал Рамазанов ыхьа. Манкъус ишкаре Имам Рамазанове джуни кьул’пенче 5 аазыр пылна гьувы.
Мани маджлисее ЦIаIхни дерайни Ветеранаршини ташкилатни хааIрункъвее НезирмагьаIммад АIгьмадове Дагъыстан Республикайни ветеранаршини Союзни дойиле спецоперацие иштракаъани , гьаIшде истирагьаIтыс хъарыйни эскерыс, Байрамов Мубаризыс ШуъаIйни духайс шарафукана грамота гьувы.
Гьел’бедти, футболын байрам , байрамни суфрайква таамхьа. Абыйни мигьманаршис, оIюнчершис, тамашечершис одхьанан кар Гыл’мецIни администрациейн ташкиляъу. Ман хорагбы хивни имаме АIсадуллагь гьаIджее ва хорагчее Наджибулла ГьаIйдарове гьазирау. Манбышис хыл’ фонд «Инсанын» авхъу.
Спортна маджлис таамувхьайле хъийгъа, саджигеедын шикыл’бы цIыцIау. МислягьаIтеехъа хъабыйнбы гьар сен футболын турнир мааъад гьалед гуджнаква алгъагьас.
