Украине аIлгъаани спецоперациее иштыракаъани эскерыквана Натик Мустафаевыквана гаф
Манкъуни гьаIкIееМанкъуни гьаIкIееМустафаев Натик МагьаIммадна дих едике Рутул районни ЦIаIхни хивее едике ыхьа. ЦIаIхийн йыIкьнекин мактаб таамау. 1988- 2000 сенбышее Ватаныс бордж хъели эскерийвалее ыхьа. Манче хъары 2001 сен МаIгьачкъалее ОМОНехъа ишилхъа эчIу. Мааъар 2006-ъсди сенеехъаме ишлемишхьа, санаъаIт бадалауйн. КьоIдле сенна Астарханни шагьарее шофирна таксие ишлемишхьа. 2008 сен Натик Мустафеве контракт одкIун, Чечнеени РФ-ни Росгвардиейни 102 бригадайни 9 артиллериейни дивизионее эскерна къуллух гьааъа гиргъыл’. Къийнаб манкъвее мааъаб эскерна къуллух гьааъа ворна. Мани сенбышди аIрее манкъвее Къузайл’ни Кавказыл’, Сириее ыхьайни ва Украинее аIлгъаани спецоперациебышее иштыракаы. Манкъуни игитийвалис гьоIкуматын ахтыйна кьиймат гьувы; медалбышис, грамотабышис лайикьау. Н. Мустафаеве джуни хьунащейква саджигее хьебыйре ушах чIакIыхъааъ вобунбы.
— Натик, ассалам аллейкум ! Ши къийна шадба вобунбы , гъу йишди «Нур» кIазетни редакциее къаджес! Гъуна хьиннен игитер шахъаб хаIбба вухьенбы.
— Аллейкум салам! Сагъул шос , зы аIрсее гьаы йишди миллетни кIазетни редакциехъа хъортIулийс.
— Къийна шакIле дюнйейл’ эхьен гьаIдисабы къедженбы. Украина дюнйейни миллетбышди «бугъазее» илёдзур водун. Манчин инсанаршис диндж, сакитыйвалла гьооли деш. ШакIле ацIа деш къийхъа гьиджоо ихьес ыхьай……
— ГьаIкIебаб, дагъамна вазият яратмишивхьа вобна. Агар аIкьда алеетIе, къийна мааъаб урусаршинаийий украинлыбышди аIреена деш даIвъий аIлгьаа вобна, мааъаб гьаIкьнийий нягьаIкьни аIреена даIвъий вобна аIлгьаа. Къудузхьайни Америкайн джони Авропеени «кучикаршиква» Россия дагъылмишаъас ыккан водун. Мани уджагъеехъаб Россиейква вурушмишивхьес укранацистар кIявъу вобунбы. ДжитIада, манбыше кьоIни чуба оIлкабышди аIрее ледж адчы. Манбыше йигъыс ярахыква, наёмникаршика Украинайс кумаг гьели водун. Манбышда метлеб вобна даIвъий хылли хъавъуй ва Россиейн экономика гьыIгъаккарауй. Манчихъа гора, ши, Россиейна армиейий миллет, са саъаIт хьинне ишлемишхьес ыккан. Манке манбышди азгунийвалин оIги ыIхасын. Ман спецоперацие вахтал’ Россиейн гидгъыл. Агар геджауйнхьий, душманын къошунбы йишди гьоIкуматни адний вурушмишехьи ихьес. Мед зы эйгьен, къийна ши саджигеехъа савалес вуккан. Гыргын гьаъан кар, гъамувхьесдимее гьаъас ыккан…
— Натик, вакIле хаIдда вурушбы къадже , джурабаджур спецоперацебышее иштыракаы. Манчини аIрее тафавутбы водее?
-Гьел’бедти. ЦIеддыйке, гьийд ыхьайн спецоперациебы, манбы джигабышилин гьыIдчатбы ыхьа. Украинее чIакIын вурушбы аIлгъаа водунбы. Мааъад гьаIшдийн ярах, техника ишлемишаъа, гьар гьоIкуматыле абыйни, эскерна иш ваацIани, вурушбыше къаджейни инсанарше иштыракаъа. Мани спецоперациейна сергьат лап аIкьба вобна. КьоIдъэсыд, шааъад даIвъий вуккеккан къулай медын ыхьа. АIсас гьиняадын вурушбы хаIйбышее иледахвани техникайний артиллериейн ыккекка водунбы.
Йизди увгьойква , агар ламус, йаIгь, мислягьаIт, барабарыйвалла, сана-санкъус хыл’авхъуй , хъыIдябкьыний шахъад ихьее, душман ши дагъылмишаъасда.
Къийнийлхъамее душманаршин сай хьуленихьее кьатна шале хаIдда ыхьа, анджах мобилизацие ыхьайле хъийгъа , фронтеена вазият бадалувхьесда. Ши хъобкуни йаIххыл’ вобунбы, ши гъамувхьесынбы!
— Мани спецоперациее , гьел’бедти, йишди миллетни джегьилершед иштыракаъа водун. Манбыше джона игитийвалла гьаагва. Писин хабарбыд къийхьенбы. Аллагьее манбышди едяаршини деккяршини йикIбышис сабырбы гьеленбы. Шу вушди аIрее сана-санкъукван алакьабы мааъад гьувадженбыне?
— Нениджар инсаныкIле джуни вукIлелхъа аблесда баляа ваацIохьи деш. Ненаджар манчике къорамишхьа дешорна. Анджах аIгьтият гьувааджес вуккан. Аллагьее аIгьтият гьааъана инсан къорамишаъа. Агар гьаммаше фыкрее писин аххъее, инсан баIчIар хъихьес. Гъу хъодкуда эйгьи, йишди джегьилерше джон игит’ гьунарбы вурушбышее гьагуйнбы, гьагва водунбы, медыд гьагвасынбы. Няъас увгьее , шас йишди баба-дидерше маIгьдын тербие, насигьаIт гьуво. Шахъаб йишда эскераршина десте вобна. Сана-санкъукан алакьабы гьувадженбы. Эхьени карана хабар сана-санкъулхъа гьивхьарааъана. Агар лазымдахье, хабар деккяршис едяаршис гьоолена. ДаIвъийе гьар джура фыкреехъа хъидялесын джад карбы эхьи. Манчихъа гора, ши са худ хьинне вобунбы. АIрабирба хъызааханбы вурушбы ааIни джиге. Мани карее ши маIгькамба вобунбы.
— Одхьунийква, аляуйква, ярахыква шу быкырба таIъмыравуне вобунбы?
— Гыргын кар, даIвъий ааIни джиге, вас ыкканан хьинне эйхьен дешки. Гьарджура вазиятбы эхьи. Сасса вахтал’ водунчис ооIбхас гябакIва. Мысваллаб, мыкIаллаб воохьена. Анджах аIхреени вахтал’ мани сардан вазият югхъоохьи вобна. Одхьуний, аляуй, тезе ярах вахтал’ хъадайлен. Зы мед эйгьен, эскерыхъад рыIгь ихьес ыккан, ватанылхъан инам, аIшкь ихьес ыккан , манке гыргын чини джигайлхъа хъалесын.
— ВакIле даIвъийн аIхир мыса ыхьайсий къеджие ?
— Ман АллагьыкIле садджу ацIа. Гыргыни карахъад аIхир эйхьен. Манаб мысахьее таамувхьеда. МислягьаIтеехъа хъабее, манчин аIхир экIда ихьес. Агар «шиш» гьааъанбы вухьее, ярахын сес цIыцIахьесын.
— Натик, зы вака гаф гьааъанкъаI, гъу йизди суалбышис саакитда джаваббы хъели. Вахъад джанее хъаIркьыний, къоруху дешдане?
— Инсан гыргыни каралхъа вардешехьена. Улени оIгее ман ишбы йигъыс къедженкъаI, инсанын хасиятыд, джанана гьаIлыб, фыкырыб бадалехьенбы. Анджах мысаджаб инсаныйвалла, инсафыйвалла, раIгьым гьувоохьарас вуккан деш. Манбы гьидваджее, ши вIагьщи гьаIйванаршини либасеехъа эбчIес. Йишди эскераршинийий ва укранацистаршини, наемникаршини аIрее хаIдын тафавутбы водунбы.
— Вас сагъул йишди суалбышис джаваббы хъувойс. Сагъба , саламатба, гъамувхьа душманаршиле йишин гыргын эскерар джони хизанбышеехъа хъавалес къисматааъанбы! Аамин!
