Аlхырейни сенбышее Цlаlхни дерайл’ ешемишоохьен инсанар табиятын гьелени джурабаджурайни фаляакатбышика растына хъавайли.Гьайни йигъыбыше табиятын мед чин гьунар гьагуйн. Гадигыле авъуйни мыцын хайбышиний йицlабышин ва сабара медни аваданийбышин чардахбы алятlу.
Гуджнакан зиян Гыл’мецlни ва Лекни хивыс хъетlу. Сура саъаlтна авъуйни мыцын хивни аlрайлин сабара тикинтибы дахабыдена гьадсыр. Хивни джамаъаlтни увгьойка, мыц бирданхьессе гибгъыл. Манчихъаб хаlбна гудж вухьа. Манчин йицlнимеени тикинтибышин чардахбы хъоду.
Гыл’мецlни хивни администрациейни хаlрынкъуни Гъейбуллагь Имрановни увгьойка, гьадиса вухьайн са уlл’джум вахтна вобна. Къийна мыцыке зарар хъетlуйнбыше кlылда-кlылда хайбыйий медын аваданийбы абрелхъа хъаляъа, чардахбы тезелемишаъа водунбы. Мани карее манбышис хивни джамаъаlтын кумаг гьели.
Хивни инсанаршис хъетlуйни зияныхъа иляакас, манбышихъад водни дагъамийвал’бышика делесвалейнче танышивхьес районенче, нейиб республикейнче абыйнбы вухьа деш. Гыл’мецlни хивни джамаъаlтни увгьойка, районенчен къуллухчер джони хивейхъа тека-сейракба абайли. Маныд джос лазымын карнанкъаl.
Джамаъаlтын гьаъан ихтилет гьаlкlен водун. Манбышди джуваббышис зынад кьувва гьоолена. Гьаlшде гьокуlматыхъад дагъамийвалейхъа гябкlыйни инсанаршис кумаг гьелен ташкилатбы гьар сурал’ ишлемишехьи. Манчин до МЧС водун. Къийна Рутул районее маlгьдын ташкилат ишлемишехьен. Манбышин къуллухчер Гыл’мецlни хивейхъа иттябый, джамаъаlтни дагъамийваллабышика делесвалейнче танышдевхьай хаlбна саймазыйвалла вобна.
Джамаъаlт имааджийс
хъигъечlу
Гьар сен юххьан хъадыйнкъаl, гыргынанкъаl инсанар имааджийбышис хъигъейбачlи. Гыл’мецlни хивейиб мана иш аlдатылхъа сабкlыл. Гьини элейс цlеддыйн имааджий манбыше хивни горханей алгъавъу. Джамаъаlтын наlкьвбышин ёкьсура кьыlдмийни гьаlшеке темизяу, йиссейн зияратбы абрелхъа хъаляу.
Хивни имамни, Цlаlхыйни дерайл’ни «Инсан» фондни хааlрынкъуни Аlсадуллагь Рамазановни джуваббышихъа гора, мани саягъылин имааджийбы Гыл’мецlни хивее гьар сен алгъайгьенбы. Хъийгъыйни имааджее малкъара ийкаран джигъырбы абрелхъа адчес. Манаб гьаваабы сыкlылда къуlма адкlуйле хъийгъа вуккейс гьаlзироохьи.
