«Нур» кIазетни редакциейн СВО иштыракаъани йишди эл’ни эскераршике, мобилизициейхъа гябкIыйни джаванаршике, манбышди хизанбышике хаIдда макьалабы гьуво. Манчиле савагьийда, манбышди хизанбышее воохьи. Къийна редакциейн аIдат гьуваджы, Бабаюртни районни ЦIаIхни бинал’ ешемишоохьени Мусаеваршини хизанее вухьа. Манбышда дих, Адам, мобилизациейхъа гябкIыйнбышди джаргее ворна.
Бабаюртни дюзил’ манбыше юрд абчына хаIдда сенбы водунбы. 40 сенна хивни тасарруфатей чалышмишувхьа. КIалхозын тасарруфат къелилхъа хъаъанкъаIд манбышин иштырак кIылин ыхьа деш. Мани сенбышее манбы джурабаджура ишбышил’ чалышмишувхьа. Манбы къийна ешбышее вухьейиб, динджиба гивийъар деш. Джохъад водун тасарруфат гьуваджес, манчике алятIуйн гелир ушахаршди югни йигъбышис ишлемишааъас гьаракатаъа.
Айдын дайейий Энбиян халее йигIыйре ушахар чIакIы хъавъу. Манбы гыргыба эвле-атта гьавъу. Къийна манбышин ушахар джони хизанбышиква гуянмишоохьи. Ушахар аIкьаIна вухьейиб, деккисхъайий едисахъа экIба -экIба абайленбы. Манбы инджимишувхьес гьавайсар деш.
Адам ушахаршди аIрайл’ энки кIыл’на ворна. Мана деккиккайий едика эйхьи. Манкъухъаб хизан дешда. Айдын дайийни увгьойка, фыкрее гьайни сен манкъус даватбы гьауй ыхьа, мобилизациейхъа гирхьуйхъа гора, пIланбы бадалхьайнбы. Сагъвалла вухьена, ман йигъбыд ихьесынбы.
Йишди кьаIгьраманыс Россиейл’ мобилизацие гидгъылни цIеддыйни йигъбышил’ повестка хъады. Къийна манкъве эскерийвалла гьааъана йихьыбъэсда ваз вобна. Мана джуни гьамбазаршика саджигее Ватанни гьийдын адамее хьинне бордж хъели водун. Адамни игитийвалис, баджарухыс командирарше ахтына кьиймат гьооли. Мана гьаммаше джуле чIакIынбыше гьувойн тапшырыгъбы быкыраъас чалышмишехьена.
Духайни гьаIкIее гаф гьааъанкъаI деккейий едей увгьойн: «Шукур вухьена Оорункъулхъа, гадейна саламатийвалла вобна. Манкъулхъа шаке гьар вахтал’ зенг гьаъас ахаI деш. Амма манчихъа ил’дяакы, вуджее шалхъа вахт вухьайнкъаI зенгбы гьаъанбы. Йишин хъидгIынбы гьаъанбы, джуна вазият йишонааъана. Манкъуни ихтилетике нишикенаджаб кеситийвалла девхьай ацIахьес эйхьи вод. Манкъве шас йикIбы гьелес чалышмишехьи. Дагъамийваллабы дешинбыва агъмишаъа.
— ГьокуIматни сураке гьелени кумагбыд эйхьенбы, — Эмбиян халее заквани горушее агъмишау. МаIнкъыни увгьойка, джес ненджад кумаг ыккан деш. Садджу дих сагъра-саламатра хъаледжин. Джонимее энки хаIдын кумаг Адам хааъар ыхьай водун. Зы Аллагьыке хаIм-йигъна хаIдын дилягбы гьеххъа водунбы. Адам, джукван гьамбазар экIда СВО таамхьа хайбышейхъа сабкIыл хъаваледжин. Йишда мурад манкъус даватбы гьауй вобна.
Адаме вудж мобилизациейхъа гирхьу ыхьай хааъабынбышикIле увгьо деш. Манбышис хабар вудж аркIынийле хъийгъа вухьа. Энбиян халайни джуваббышике,манчикеб джос хаIдын хаджалат ыхьай ацIахьес эйхьийий.
Дих мобилизациейхъа гирхьу аркIынийле хъийгъа, кьаIсынбыше хаIбба фыкыр цIыцIааъа гибгъыл. ХаIбба фыкырбы гьауйхъа гора, манбы сабара гагьна кефдена хъувхьа. Хил’дже гагьна маалиджебы гьаъа больницабышее вухьа. Айдын дайийни увгьойхъа гора, джо хаIдда джигабышейхъа сабар гагьна гаде хаахъа къайиккеджинва кагъызбы одкIун. Амма хайир ыхьа деш. Къийнад манбыше Адам отпускейхъа хъарый гозетяъа водун.
Манчихъа ил’дяакы, Айдын дайей Энбиян халей джона ватанпарварийвалла авакIанааъа деш. МаIнкъее эйгьен: «Ватан къорамишавъуй адамийс аваакIына иш вобна. Йизда Адамыр манбышди джаргее ворна. Къийна СВО садджу йизда дихджар деш, хаIбба джаванар вобунбы. Йизын хьинне дих къаджес йикI’гёдхьанан едяр хаIбба вобунбы. Гьар инсаныс джуна бала гыранбы вобна. Бала девканна ед’ дешда. Сабара гагьна гадейке зенг дешданкъаI, хаIмдийн някIыд айкIанан.
Мусаеваршини хизанни гьаIкIеена гаф манбышди ишилхъа, заIгьматылхъа водни кал’мабышиква бакырааъас вуккан. Айдын дайийхъадый Энбиян халайхъад къийна тасарруфат гьуваджес хаIдын аIшкь водун. Манбыше ушахарыб мани саягъыл’ чIакIы хъавъу. Гадебыйий ичер кIыл’валикеджаб манбышика саджигее ишлемишоохьи вухьа. Манбыше хизанни вукIлелинбышика саджигее хааъанайий чолына иш гьааъа хаIб хъувхьа. Хааъадын, кIалхозын тасарруфат гьуваджесдимее манбы хаIм-йигъна чалышмишувхьайнбы. Гьайни делесвалей аIхырки гьоIкуматын манбышди ишис ахтына кьиймат гьуво. Энбиян халай Дагъыстан Республикайни Правительствайни «Шарафни грамотайс» лайикьра къайджы. Мана йиджее алятIуйни грамотайка гуянмишейхьи ворна. МаIнкъее заквани горушее увгьойн: «Зы хаIдда сенбына кIалхозее чалышмишийхьа. Мани сенбышее зы джурабаджура ишбышил’ ишлемишийхьа. Зас гьувона грамотаб гьавъуйни ишис гьувона кьиймат вобна».
Айдын дайийка ва Энбиян халайкан горуш югун дилягбы гьеххъыйква таамхьа. Манбыше йишди эл’ни СВО иштыракаъани джаванаршис, манбышди хизанбышис, делесынбышис йикIес сабырбы гьеленбыва увгьо. Дагъамни йигъбышиле хъийгъа, сибыкынбы хъадайленбы. Нимее дагъамийваллабы ыхьейид, ман билдир гьаъас ыккан деш. Чалышмишувхьс вуккан фыкырбы гьаммаше темизда аххъас. Ши умудааъана, шахъад водун дагъамийваллабы делесни вахтал’ таамхьесынбы. СВО-хъа гьабкIынийнбыше игитерше хьинне бордж хъуво, хайбышейхъа савкIаласынбы.
