Украинее СВО аIлгьаан сений сура водун. Манчина метлеб вобна Донбасс ешемишоохьен инсанар нацистаршике къорамишавъуй ва манбышин ихтиярбы гьуваджий. Агар аIкьда алеетIее, мааъад Россияйий НАТО вурушмишехьи водун.
Америкайнийий Авропайна мураад вобна, Украинайни хылеква, Россия охале къаъадчы, гойне джос ыкканагьаIд парчеламишауй. Манчихъа гора, манбыше Украинайс сай-гьыIсаб дена ярагъ гьели ва наемникар Россияйни армиейква вурушмишивхьес оIтирааъа. Америкайний садибни Авропайн къоIни чодж оIлкабышди аIрее ледж аччу. Къийна манчин уцIур цIыцIаъа водун. АIхирыд, гьалекийс къеджи деш. Сабара йигъбына гьихъа , манбыше «тIуб гьавъу» Россиейл’ усйан ыхьа. Анджах , мани цIайина ялав экIба кIябхъавъу. Агар манчин чархв илийкIар гидгъылыйнхьий, хаIбба эбний оотIалас. Шукур оорункъулхъа, гьалекийс ман цIа хъихьас гьадсыр деш.
Украине аIлгьааIни СВО хаIббанани цIаIхбышди джегьилерше иштырак гьаъа водун. Манбыше джона иш игитерше хьинне гьааъа вобна. Манбышин гыргынбы миллетин кьаIгьраманар вобунбы. Ши чалышмишоохьенбы манбышди гьаIкIее йишди кIазете окIанас.
Къийнийна йишди макьалейна кьаIгьраман Сулейманов Алий АIббасна дих ворна. Сабара йигъбына гьихъа мана СВО-че отпускайс хаахъа хъары. Манкъвее шас аIгьвалат маана йишонавъу.
АIлий Сулейманов едике Бабаюртни районеени цIаIхбышди ( кIалхоз «Правда») бинайл’ едике 1991-ъэсди сенни ноябрьни 15-чил’ ыхьа. Манкъухъаб ючIуйре чоджарый йичибы вобунбы. Манкъун кьоIйре чоджар военныйбы вобунбы. Санкъвее Мурманске эскерна къуллух гьааъа, шенаса доброволец хьинне спецназ «Ахматехъа» аркIын.
АIлээ дагъайдни мактабын сыныфбы бинайл’ таамау, хъийгъа хъаIдхъас Теземуслагъни мактабеехъа аркIын. Мааъад 9 сыныфеехъаме хъаIдхъы. 11 сыныф МаIгьачкъалайни 10 йыIкьнекни мактабее таамау. Хъийгъа манкъвее шофирын санаъаIт алеетIу. Ёкьудле сенна кьуванан мебел’ гьаъани цехе ишлемишхьа.
АIлийхъад хаIдын гьавас ыхьа эскереехъа ааIсын, анджах манке военкоматын мана оIтирау деш. Мана маджбырра ыхьа , эскереехъа алертIеджинва, Мурманскхъа чоджаршисахъа аIлгьаас. Мааъад манкъве джус прописка гьаыйле хъийгъа, эскерехъа хъортIул’. Джун Ватанысын бордж Къузайни флотни ПВО хъуво. Эскерийвалла таамоохьени вахтал’, АIлийс Миноборонайкван контракт окIанас ыккийкын. Анджах манкед манкъус кьисмат дехьайн контракт окIанас.
Эскереенче хъары АI. Сулейманов мебел’ гьаъани цехе Тюбее чоджиква ишлемишехьи гиргъыл’. Хав-уджагъ къурмишау, даватбы гьаъы, кьоIйре ушах вухьа. Гьалални къыкыкван ешайиш гьаъа гиргъыл’.
2022 сенни сентябрьни вуза Ахтыни военкоматеехъа хъойтIалан повестка хъады. Мана мобилизацехъа гирхьу. Сентябрьни 22-чил’ саъаIт 8-чил’ мана джуни хивни гьамбазаршиква: КIамазов Сакитыквайий Мусаев Адамыква Каспийскни флотилиейни частилхъа хъабы. Манче манбы мебни мобилизованныйбышиква ярахыква ва техникайква танышааъас ва манбы ишлемишаъас хаIбхъааъас Краснодарни крайил’ни полигонеехъа оIтиравъу. Манбы ааIнкъа мыкIана гьаваа вухьа. ЦIаIхни хивни джегьилершини фондын манбышис кьоманче кIаняхъанмееган къуIман военный палтар ва чолееъад лазымехьен карбы алищу. ЙицIыдле йигъна мани полигоне манбы душманаршиквани вурушбышис гьазиравъу. АIлийир Сакитыр БТР гьаъайквас ва манчеенче гуллебы агьас хаIбхъавъу. Манче манбы Запорожиейни сураххъа эшелоныква цIеддыйни позициебышеехъа хъувку кIявъу. Мани йигъыке къийнийлхъаме манбы позициебышил’ илёбзур вобунбы. Джонийий укранацистаршини позициебышди аIрее 2 км дешин.
АIлийий Сакит мамогълийий даёгълий вобунбы. КьоIйирсана са БТР вобунбы. АIлий шофир ворна, Сакит наводчик.
9 вузани аIрее манбы цIайикейий хьинеке илгъебчIу. Къидеджесын кар аху деш, анджах манбышин цIаIхийгъалин хасият гьакьвараъас аIхы деш. Манбыше джона игитийвалла нацистаршиквани дёлесни вурушее гьаагва. Са атдымна джаб йыIкьалхъа хъебаххьи деш. Гьел’бедти, гьаIшдийн вурушбы, даIвъийбы меннаIгьдынбы водунбы. АIсас дагъамийвалла хаIйбышее илийкIарни дронбыше, коптербыше гьооли.
АIлээ къуллух гьааъани роте мебын гьар цIаIхбышди хиваршенчен джегьилерыб: МагьаIммад, Казбег, Адам, АIзиз, Азан вобунбы. Манбышда гьаарна са йишди миллетна, республикайна, гьоIкуматна игит’ ворна. Джегьилер сана-санкъул’ мугъаетоохьенбы.
АIлийни увгьойква, дагъамийвалихъа ил’дяакы, джо Ватанын кIеливханааъа деш. Охьанасын кар, аляъасын палтар, ярах, техникайс ишлемишаъан янаджагъ вахтал’ позициебышилхъа хъайлен. Агар тыл уIумда ыхьее, манке эскераршин умудбы, гьаIракатбы, гьавасбы гуджнада эхьи.
— Зы гьайняхъа Ватан къорамишааъас ары. Зы не дюгыл’хьа деш, не далыйлхъа хъыхьа деш. Махъа зы йикIен хъортIул. Агар зы гьидяркIыннахьий, манчин йизда фыкыр гьаргьаммаше оохьанасданий. Шукур Аллагьылхъа, манкъвее ши гьувааджи вобунбы. Садджу, соцсетбыше терсинан, лезимдешин ихтелет’бы йишди инсанарше гьаъанкъаI, ман кар хъета. Ши пылни меега деш гьиняхъа абы, Ватан душманыке гьувааджес абы. Шас йикIбы гьеленбыб хаIбба вобунбы. Вахт аIрайле абкIынмеега инсанаршике, мактабни шигыртаршике басиркIабы, кагъызбы хъадайли. Манбышис сагъул,- АIлээ эйгьи.
Сабара йигъбышиле АIлий мер джун джитIан отпуск таамхьамее ааIсда. Мана аркIынмее ши Сакит гозетяъас ва манкъукван горуш, Ин ша Аллагь, алгъагьас.
Нениджаб даIвъийн садджу уцIурый нагъбы адайли. Ши садджу са кар аIрзуламишаъа : даIвъий экIба таамувхьена, гьарна джегил’ джони хизанбышеехъа сагъба-саламатба хъаваленбы. Аамин!
