Гьайни делесийвалее МаскIавни шагьарни са чапханее дойиквани Шейхни МуIгьаммад  Ярагъийни ыIмрени ва джуни ваIъазбышди гьаIкIеедын китаб къайиккы.

 Ман китаб Дагъыстан республикайни муфтиятни мислягьаIтыква ва иджаазайкава чапыс МаIгьачкъалее  М.П. ГьаIдживе гьазирау. Китабна редактор  А.М. Кахаев ворна. МислягьаIтын  уIзвыбы  М.М. МуIгаммадов ва З.А. Адилов  вухьа.

Мани китабее доюкани Дагъыстанни шейхна МуIгьаммад Ярагъийна ыIмрена йаIхъ ва вуджее къаджейн Исламни динни гьаIкIеедын ишбы водунбы ашкараъа. Мана суфершини тарикьатна йаIхъ авхъуна  динэгьлий  ва ааIлим ыхьа, иман еймышаъас чалышмышхьа. МуIгьаммад Ярагъий 18-ъэсди  асырни кьодъэсди сурал’, 19-ъэсди асырни цIеддыйни сурал’ ешемишхьа. Манкъвее гьаммаше Кавказыл’ни миллетбышда азадыйвалла гозетявъу ва исламын дин гьаIракатеехъа адчес чалышмишхьа. Динна темизийвалла, маIргьаматыйвалла , ачухыйвалла , хъобкуйвалла джуни ыIлим ишбышее гьаагу.  АIсас манкъуни ыIлимни ишни гьаIкIеедын  маIълумат китабее  « Асар аш-шайх аль- Яраги» гьели водун. Гьайни китабее сабара мани китабеенче алеетIуйн вааджидын ваъаIзбы руссни мизелхъа построчныда сакIалау гьели водунбы.

 Китаб кьоIни главайква къурмишхьа: 1 глава . ЫIмыр ва иш шейхна. 2 глава. Дин-ыIлимын шейхын мирасбы . Манчини гьаарни главе чин джурайн хабарбы гьелен параграфбы водунбы.Китаб къайдалхъа хъаляъассе гьихъа, автор медни ыIлим ишбышика, динни китаббышиква танышхьа, динэгьлершиква мислягьаIтбы гьау. 

Китабее МуIгьаммад Ярагъийни устазаршини ва джуни сохдабышди( телябабышди ) гьаIкIеедын параграф водун.  ХаIбна джига   мани китабее  йишди цIаIхбышди( йихъбышди) — Шейхни Магьмуд эфендий Алмалыйни  гьаIкIеени макьалейс гьооли вобна. Мааъаб цIебба урусни мизел’ манкъуни гьаIкIеедын кIоран маIълумат гьели водун. 

Зы инам гьаъан хаIббанани цIаIхбышис манн китаб хошехъа хъалесын. 

Хъийгъа хъалесди кIазетни нумрее ши урусни мизел’ Шейх Магьмуд эфендий Аламлыйни гьаIкIеена макьале, кьисмат вухьее, гьевлесда.