Шаца ши «Нур» кIазете рубрика «Хиваршее ишлемишехьен фондбы» ачмпишавъу. ШакIле ацIан мани фондбышди гьаIракатбышиква хил’дже хайирыкван ишбы къадже.  Гьиджо йишбыйий гьаъы, нен ишбыйий аххъы ниятее гьаъас ацIахьесдимее, редакциехъа фондбышин чIакIынбы хъобтIул. Шаца йишин мигьманар ЦIаIхни хивни фондына хааIрна Фаик АIзизов, Муслагъни хивни фондына хааIрна  Шериф Мамедов, Аттални хивни фондына хааIрна Надир Асланов, Калел’ни хивни  фондна эл’чий вухьа. Манбыше шас  фондыни ва манчини кумагыква гьаъыйни йишбышин аIтрафлы маIълумат гьувы.

Гьайни сен ши йишда рубрика меб тезелемишааъана. Гьайни элейсда йишда мигьман Гыл’мецIни хивни фондына хааIрна Менаф Исрафилов ворна.  М. Исрафилов  хивее ешемишехьи ыхьайхъа гора, манкъукана йишда  гаф телефоненче  вухьа.Гьайни сен ши йишда рубрика меб тезелемишааъана. Гьайни элейсда йишда мигьман Гыл’мецIни хивни фондына хааIрна Менаф Исрафилов ворна.  М. Исрафилов  хивее ешемишехьи ыхьайхъа гора, манкъукана йишда  гаф телефоненче  вухьа.
— Менаф чодж, ассалам аллейкум! ШакIле къайиххыйн Гыл’мецIни хивни хайирхагь фондына хааIрна гъу ворна. Ши вас хааиш гьаъан йишди суалбышис джаваббы хъелес. Вушди фондын до гьиджон водун ва ман мысане ачмишаы?
— Вааллекум салам ! Йишди хивни фондын до «Гыл’мецI» водун . Ман ши ачухауйн 2020-ъэсди сенни январьни вуза. Фонд ачмишаъасда мислягьаIт Ширинов Ширине, Байрамов Мустафе, Керимов Халиле ва мебни хивни джегьил’ адамерше къавдже.
-Къийнийни йигъыл’ фондни гьыIсабее  хьулейре инсанне ворна, ва махъа нени ешеебын инсанарне гябакIа?
— Гьалекийс «Гыл’мецI» фонде 57 инсанее иштыракаъа. Манбышин гелесынбы Урсиятыл’ни шагьарее ешемишебаххьен гыл’мецIбы вобунбы. АIсс манбы 35-50  ешбышеебын инсанар вобунбы.  Манбышда география  хивеенче гибгъыл АIкьанани Машрыкьылхъаме вобна.
-Вушди фондыни гьийд нен метлеббыйий везифабыне водунбы?

ШокIле къооджена  дюнйейна вазият. Гыргын кар деш садибда ва вахтал’ гьаъас гьоIкумат усылехьи. Манчихъа гора, ши мислягьаIтеехъа хъабыйнбы, хивни аIреедын сабара ишбы фондыни кумагыква ва гьаIракатыква гьаъас. Масалан, йахъ-кьыIт’ хъахас, гьыIгъадкырыйн джига хъаъас, гармабы хъаъас, вейхбы хъаъас, малкъара оIршеехъа гьайкIанан йаIхъбы, агъылбы, бинабы хъаъас, гьыIгъадкырийн токIан истолбабы илёзараъас, хивни аIреедын майдамбы, гимгабы абрелхъа адчес ва медынбы. Йизди увгьойква, аIсас фондына макьсад, касиб-кусиб инсанаршис, чIырынбышис, дареехъа гябкIуйни инсанаршис, етимба авхуйни ушахаршис кумаг гьувой вихьес вуккан. Геледжагъыл’ ши ман ишбы гьаъас чалышмишивхьес.

Ман ишбы гьаъасдимее харджийбы гьаъас ыккан. Къийна фондыни кисее водунбыне маIгьдын пылбы?

Ман гейд йыIкьын суал вод.  Гьел’бедти гъу хъоркура ворна. Гьаманчихъа гора ши фонд ачмишаъы. Къийна йишди фондыни хазнеехъа 86 аазыр манат пылна сабы вобна.  2020–ъэсын сен гыргынкъулхъа дагъамда хъады. Са сураке коронавирусын, шени суракеб мани чIырывалин яратмишауйни экономикайни кризисын сыхмишавъу. Ишбы дехьайхъа гора, хаIббананбышин къел’-хыл’ гьитIылыйн. Манчихъа ил’дяаку, йишди чубабыше фондыс пылыква кумаг гьувойн. Мани вазиятыхъва гора, ниятее аххъыйн ишбы шаке гьаъас аIхы деш. Масалан , ши сувал’ малкъара гьуваджесын агъыл аляуй фыкрее ыхьа. Мааъад пешекарар, къоранар, наIхирванар, бызавчера аахвасын хав (дега) аляуй ыхьа. ШокIле ацIа ихьес, ман сувал’ гейд лазымын кар водун. ОIт’мишхьайни сен фондын  мактабеехъа аIлхъаан кьыIтIера аляу. Манчисын материал фондын алищу. МаъаIллимаршини кумагыква ши манбы аляу. Манаб са хайирыквана иш вобна.

— Ваке фондыс кумаг гьелени игитершин добы алядхъаIс аIхасынбыне ?

— Гьел’бедти.  Шаца шас хыл’ авхъуна  Мирзоев Халиле ( Сургут) , ГьаIшимов ГьаIджимагьаIммаде ( Белгород), ПирмагьаIммадов Джамале ( Астархань), Кьурбанов Кьурбане ( Благовещенск) , Байрамов Мустафе (МаIгьачкъала) , ЫIсмаилов Назире (Благовещенск), Рамазанов  Шагьвеледе (Новосибирск), Байрамов Рафике (Новосибирск), Рамазанов Мухтаре (Иркутск) , Мамедов Сулеймане, Ширинов Ширине, Мирзоев Яшаре, Мирзоев Музафере, Мирзоев Ризване, ДжуIмаев  Гейруддине, Имранов Гъейбуллагье  ва мебынбыше. Гьаарункъве джуни кьул’пеенче гехьан садакьа гьуво.  Ман хаIдын сувааб водун.

— Гыргыни фондбышди чIакIынбышилхъа  ши гьайин суал гьели: «Фондбыше  Хивни администрациебыше гьаъасын ишбы дишее джолхъа аляатIа?»  Гьар хиваршини администрациебышди бюджете  тасарруфат ишбы гьаъасын пылбы водунбы. Агар ишбы фондбыше гьаъахьее, администрациебышди ишин до гьиджон водун?

— Мани суалысын джаваб администрациейни ишчерше хъеледжин. Йишда метлеб вобна хивни джамаъаIтна ыIмыр , ешайиш сыкIылдахьейид вахарий хъаый.Фондыс угъурбы аIрз­уламишаъа. Хивыс, джа­маъаIтыс хайирыкван  ишбы гьаъас кьисматхьенбы !