Миллет’ хьебни каран – Ватанын, торпагъын, мизен гьуваджи. Манчин хьебыдъэсын кар, къийнийни йигъыл’, вааджибын водун. Ааlлимаршини увгьойка, дюнйейил’ 5 аазырле агъаллана мизний. Анджах сен-сениле манчин сай къат-къатна кIыл’хъехьи водун. Манчиква саджигее быкырни миллет’бышин адабиятбы, маданият, таарых батмишехьи.
Агар ши манчин оlги даянмишаъасын чараабы къидеджее, ааlлимар гьаlхълыба вобунбы, са ваIш сениле дюнйейл’ мизаршин сай тlубаршиква гьыlсабаъас. Миз’ аlрайле абкlынмее, миллетна джинсыб аlрайле авайкlанна. ЦIеддыйнбыд мани мыгрее йишин дагъыстанын мизара ихьес. Гьел’бедти, ман дехьесдиме, ши аlгьтиятбы, чараабы къаджес ыккан.АIхреени 25-30 сенни аIрее йишда ед’на миз гьувааджесдимее ва гьаIракатеехъа абчесдимее хаIдда ишбы къадже. Ши манчини гьаIкIее хаIдда макьалебы одкIун, манчихъа гора текрар гьауйхъаб маIъна дешда. Миз’, маданият, адабият, таарых гьуваджий инсанни йикIее ихьес ыккан. Маныд хизанеенче цIедда гигъалас ыккан. Интернет йишди ыIмреехъа эчIуйле хъийгъа, мана иш гьалеб вахарий хъувхьа ва гьаIракатеехъа эвчIу. Къийна шахъад хаIдда имканбы водунбы, манчике истифаада гьаъас ыккан. Ши садджу юшенааъана миз’ джаб деш , оокIанна адабиятна мизиб артымишааъас вуккан.Гьайин оIтмишхьайн уIлджум ,эгьес эйхьи, ед’ни мизаршис къассырыйн ыхьа. Республике манчиква алакьан хаIдда йигъынджагъбы илгъечIу. Гьел’бедти , Сувал’ни маIгьалылид ман Мизаршин байрам джурабаджур конкурсбышиква, тамашебышиква, маджлисбышиква алгъавгьу. Сен-сениле мана иш къулайква гьааъа гибгъыл. ЦIаIхни, Мишлешни, Муслагъни , ДжинаIгъни йыIкьнекни мактаббыше, Лекни мактабе цIаIхбышди шааираршин шечIбы хъаIдаххъан конкурсбы илгъечIу. Манчиле гъайре директораршини мислягьаIтыква цIаIхни мизен дарсбы гьелени маъаIллимарше китаббышин гьагуй (выставка) алгъавгьу. Мактаббышди шигыртарше Валегь Гьамзатын, АIчлей Гьарунын, АIшукь Сафарын, АIбдурагьман УлуцIахийн, ВаIгьыд’ Мирзоевын, АIбдурагьим Дадашевын, Лекий Юсуфын, Элескер ГьаIджиевын ва мебынбышин шечIбы друстда хъаIдхъы. МаъаIллимарше манбы интернетеехъа гиххьы. Ненкъухъадый гьавас манчилхъа кIырыгяххъас «Нур» кIазетни сайте, Инстаграмеени дестебыше «ЦНКА-культура», «Дневник цахурки», «Цахурская долина» ва медынче водунбы. Месала вобна: «Ши йишда гома дамайлхъа саакIал гьидявъе, шавааджад мана гьаъас деш». «Нур» кIазетни редакциейн мани конкурсбышее иштырак гьауйни ушахаршис, маъаIллимаршис угъурбы аIрзуламишаъа ва джанана сагъвалла гьоохъа!.
