Июнни 13-чил’, МагьачIкъалайни Красноармейскни поселокни «Спарта» донани стадионе цIаIхбышди футболни лигайни (ЦФЛ) чемпионатын хьебыдъэсди сезонын екунбы ыIхы.

ЦФЛ-ын чемпионат екьудле сен водун алгъайгьен ва мааъад гьайни зарбас 10 камандайн иштыракаъу. ОIтмишхьайни кьоIни чемпионате ФК «Цахуры» донани камандайн цIеббыйна джига авхъу, хъийгъийни элейс гыргынчиле югба ФК «Микик» гьувагу ва цIеббыйна джига авхъу. Гьайни зарбас меб «Микик/Цахуры» донани камандайн цIеббыйна джига авхъу. КьоIбъэсда джига ФК «Ихва» ва хьебыдъэсда джига ФК «Хатайспор» донани камандайн авхъу.
Гьар сен ЦФЛ-ын турнир алгъагьас хаIдын кумаг Имам Рамазанове, Мустафа Байрамове, Рамазан Шихамирове ва сабара камандабышди уIзвыбыше гьели. МаIълуматын кумаг «Нур» кIазетын гьаъа.
Ненджад идманын турнир спонсораршини кумагдена алгъагьас эхьи деш. Гьайни зарбас гъамедхьайни камандабышис(1,2,3 джига) ва югба гьуваагыйни оIйинчершис гьелесди мукафатбышис пылыкван кумаг Имам Рамазанове, Мустафа Байрамове, Адил Давудове, АIлим Раджабове, Алик Мамедове, МагьаIммадзагир Джанаеве, Ферман ШаIъбанове, Эмирджан ШаIъбанове гьуво. Манбышди аIрее сайир до дешда спонсор ыхьа.
Манбышис Оргкомитетни сураке ташакурийвалла агъмишааъан кагъызбы гьуво. МаIгьдын кагъызбы ФК «Гыл’мецI» донани командайни оIйинчийс ЫIсмаил ШаIъбановыс телеграмм-канал вуккыйхъа гора ва чемпионатын дизайн гьауйхъа гора гьуво. Манчиле савагьийда, грамотабы гьар камандайни хурни гьаваскараршед гьуво. Манбы манчиле гееб шадеебхьа.
Гьайни сенийни чемпионатна эн югна ойинчий Руслан РаIгьимов (ФК «Ихва») къапычий— МагьаIммад Юсубов (ФК «Ихва»), мудафийечий — Радик Наврузов (ФК «Микик/ Цахуры»), сурамудафиечий МухаIммад Кьурбанов («Микик/ЦIахуры ва хаIдда топпар ыIхына (бомбардир) Насир Рамазанов (ФК «Ихва»). Манбышис пылын мукафатбы ва грамотабы гьуво.
Гойне 1,2,3 джига авхъуйни командабышис медалбы, грамотабы ва пылыкван мукафатбы гьуво. ЦIеббыйна джига авхъуйни ФК «Микик/Цахуры» -50 аазыр манат, кьоIбъэсда джига ФК «Ихва» — 30 аазыр манат, ва хьебыдъэсда джига ФК «Хатайспор» — 20 аазыр манат.

Умуд гьааъана, хъооIни сен мани турнире иштыракаъан камандабы хаIдда ихьес. МаIгьдын спортун маджлисбы алгъавгьуй геед югда водон йишди джаванаршдимее. Манчин санансанкъукIле ваацIавхьес имн гьооли. манбыше вахт бейкараба авакIанааъа деш. АIхреени вахтал’ йишди джаванарше идманылхъа хаIбба фыкыр гьооли вобна. Гьасре маIгьдын спортун, маданиятын маджлисбы шахъад хаIдда ихьеджен ва мааъад хаIдда йишди миллетни эл’чеерше иштыракаъас кьисматаъан! Аамин!