Байрам Абдуллаев
Гьайни вузани 5-чил’ МагьачIкъалайни Красноармейскни поселокни «Спарта» донани стадионе цIаIхбышди ешлибышин (40 сеныле оохъани) Гъамеебхьайни Йигъыс къадсырыйн футболын турнир илгъечIу.
Ман турнир «Нур» кIазетин тешкиляу ва ман илгъечIесдимее сабара йишди миллетни эл’чеерше кумагбы гьувойнбы.
Турнире 6 командайн иштырак гьаъу: «МиххьегI», «Согют», «Гыл’мецI», «ЦIаIхий», «Муслагъ» ва «ЦIаIхни магьаIлна сборная». Ши гозетяуйн медни хиваршенчеб махъа командабы салесынбы, амма няъасмы манбы ыхьа деш.
Умуд гьааъана, хъооIни сен мани турнире иштырак гьаъан командабы хаIдда ихьес.
Турнире цIедда командабы санасанкъуква гьувагыйле хъийгъа, полуфиналеехъа ёкьубле команда илгъевчIу. Мани полуфинале цIебба «Гыл’мецI» ва «МиххьегI» гьувагы. Манбышди аIрее «Гыл’мецI» 1-0 гьыIсабыква гъамувхьа. КьоIдъэсди полуфинале «ЦIаIхий» ва «ЦIаIхни магьаIлна сборная» гьувагы. Маайид гьыIсаб 1-0 «ЦIаIхий» командайни хайиреехъа ыхьа. Гойне хьебыдъэсди джигайнимее «МиххьегI» ва «ЦIаIхни магьаIлна сборная» гьувагы, ва мааъад савъуна команда гьихъа вухьа.
Турнирни финале «ЦIаIхий» ва «Гыл’мецI» горушмишедхъа. Мани горушен гьыIсаб 2-0 ыхьа. Турнире «ЦIаIхий» гъамувхьа. Гъамедхьайни командабышис кIазетни сураке кубок ва грамотабы гьуво.
Мани турнире иштырак гьауйнбышди аIрее ешес хааIрна Айдын Бабаев — «Согют», югна вратарь Расим РаIгьимов — «ЦIаIхий», югна мудафиечий Абакар Алхасов — «ЦIаIхий», югна гьуIджумчий РаIгьим Рамазанов — «Гыл’мецI» вухьа.
Футболын турнир алгъагьас Имам Рамазанове — «МиххьегI», Адил’ Давудове — «Гыл’мецI», Магьмуд Рашидове — «Муслагъ», Фикрет Раджабове, Айдын Бабаеве — «Согют», Сабир ЫIсаеве — «ЦIаIхни магьаIлна сборная» хыл’ авхъу.
Турнир гьазираъас, йидж алгъагьас шас хаIдын кумаг Мустафа Байрамове гьуво. Мана Благовещенскни шагьаренче йишди турнире иштыракаъас ва йидж алгъагьас кумагыс хъары ыхьа.
Манбышди гыргынкъукIле ши сагъулва эйгьи. Сайид зас сагъулва эгьес ыкканан мани турнире судйевалла гьавъуйни чоджершикIле Рафаил’ ЭмирджановыкIле ва Закир КьурбановыкIле.
Турниреехъа абыйни иштыракчеершис ва мигьманаршис плав ва чей гьуво. Мани ишихъа иляккана АIбдуллагь-гьаIджий Эфендиев ыхьа. МаншаАллагь, гееб дадуквана плавий манкъве хъобхьур. Шавае мани йишди турнире иштырак гьаъу ва махъа мигьманра ары манбышис ташаккурийвалла агъмишааъа ва ИншаАллагь са сениле ши меб мани стадионе горушмишеебхьесынбы ва ман йишин турнир гьар сен кечирмишаъасын.
Гьайни элес цIедда ыхьайхъа гора мумкум вобна къайиккыйн саIфбыд ихьес. Сайид хъооIни сен ман саIфбы къайиккас деш ва манчис ши югба гьазиреебхьесынбы.
МаIгьдын спортун маджлисбы алгъавгьуй геед югда водон йишди джаванаршдиме, няъас увгьее санансанкъукIле вацIоохьи, гойнед манбыше вахт бейкараба авакIанааъа деш.
АIхреени вахтал’ йишди джаванарше идманыс хаIбба фыкыр гьооли вобна. Масалан, къоIдъэсын сен водун цIаIбышин чемпионат алгъааI ва мани чемпионатее 12 команда гьуваага вобна. Гьар уIл’джумни йихьыдьэсди йигъыл’ Красноармейскни «Спарта» донани стадионе чемпионатын тур илгъечIи водун.
Манчиле савагьийда гьар сен майни вуза гьаманиджад стадионе ХаIбни Ватанни даIвъийс ва СВО гьабтIуйни йишди йихъбышис къадсырыйн турнир алгъайгьи. Гьайни зарбас ман майни 12-че водон.
МаIхудни идманни турнирбыше джаванар саджигеехъа сааъа ва манбы сана-санкъуква танышеебахьенбы. Гьасре махуIдын спортун, маданиятын маджлисбы шахьад хаIдда ихьенбы ва мааъад хаIдда йишди миллетни эл’чеерше иштыракаъас кьисматаъан! Аамин!
