Гьайни йигъбышее Ростовни шагьарее джаванаршини аIрайлин боксын ва кикбогсингын турнир илгъечIу. Турнир Ростовни шагьарее ешемишехьени Мишлешни хивейнчени тайский боксни спортсмене Залимхан МагьаIммаджанове тренирийвалла гьааъани «Кубок Королей» донани клубын тешкиляу.

Мани йигъыл’клубейхъа баIстбы ыккейс джурабаджура джигабышейнче абыйн хаIбба спортсменар сабы. Манбышди аIрайл’ Мишлешни хивейнче гьабкIынийн спортсменарыб вухьайнбы. Манбышди гыргынбыше ахтыйн джигабы аххъы. Манбы Рамазанов Самир, Рамазанов Саид, Магьмудов Расим вобунбы. Манбыше магьаIдни турнире цIедда водун иштыракаъа. Манчихъа ил’дяакы, джаванарше Ростовни шагьарее джон гьунар гагуйн.
Турнире Мишлешни хивейнчен мебын гадебыб вухьайнбы. Манбы Ростовни шагьарее ешемишоохьенбы вухьа. ГьаIйдаров Саид, Къаратов Сабир, Маллеев ЫIса Залимхан МагьаIммаджановын телебабы вобунбы. Манбышед кьомани джигабышис лайикьба къавджу.
Мишлешни хивее сачахаранбышин секция аахъыйн хаIбба вахт дешда. Махъа хъавайлени ушахаршин сай хаIдын водун. Гьихъа хивее маIгьдын секция ыхьа деш. Ман мактабни джаван физкультурайни маъаIллиме Рамазан Ибрагьимовее аахъы. Манкъве гьамыд секциейхъа хъавайлени ушахаршис тренерийвалла гьааъа.
Манкъуни увгьойка, вуджее хаIбхъааъан спортсменаршин ман цIеддыйн турнир ыхьа. Манбыше югун натийджабы гьагуйхъа гора, вудж геер разийра ворна.
Дора йишди Мишлешни хивейнчени джаван спортсменаршис, манбышди тренерыс угъурбы аIрзаъас. Гьасре манбыше геледжагъылиб джони гьунарбышиква ши шадееъэджен!