Гьар йигъыс Россиейл’ ваIщеле хаIрра джаване Миноборонайква контракт ойкIан. Манбышди джаргее Дагъыстанын духйебы кIыл’ба дешобунбы. Маныд эгьес, Дагъыстане 2023-ъэсди сенни феврал’ни вузани 15-чиле «Каспий» батальонын ман иш вуккекка. Батальон республикайни хааIрынкъуни Сергей Меликовни тапшырыгъыква къурмишау.
Ман ишлемишехьи гидгъылни йигъыле къийнийлхъамее батальонейхъа хаIбба Дагъыстанейнчен джаванар аттамишивхьа. Къийна манбышин гыргынбы СВО иштыракчер вобунбы. Манбыше гьокуIматын гьагуйн мисалабы гьаллаъа.
Миноборонайква контракт одкIунийнбышди сыранее йишди элин джаванарыб хаIбба вобунбы. Манбышди хаIббананбышди гьаIкIее ши йишди кIазетей хабар гьувона. Гьайни делесвалей республикейнче СВО вуххъаIс контракт одкIунийнбышди 15 джаванаршини аIрайл’ ЦIаIхни дерайл’ни Гыл’мецIни хивее ешемишехьена Рамазанов Ибрагьимыр ыхьана.
Шаквани горушее Ибрагьимее къийнийни йигъыл’ СВО ваIщеле агъаллани цIаIхни халкьни игитерше иштыракаъава агъмишау. Манбышис миллетчершике ватан темизяаъасдимее кумаг гьаъас, зынад гьайни делесвалей контракт одкIун. Россиейни Федерациейна санабыйвалла гьувааджий, Ватан къорамишавъуй, делесынбышда сагъвалла гозетявъуй гьар инсанын бордж водун. ГьаIшде йизди миллетыке хаIбба джаванарше контракт одкIун, махъа гьабкIын. Манчиле гъайре СВО иштыракаъас вуххъаIс гьаIзиривхьайнбышин сиягьыйид кIылин дешинва, — И. Рамазанове увгьо.
ШакIле ацIан хаIббанани йишди джаванарше СВО гигъалассе гьихъа контракт одкIун, эскерийвалла вуккекка вухьа. Манбы СВО гидгъылни цIеббыйни йигъыле мааъаб вобунбы. Манбышда сайир Аттални хивейнчена Асланов Кьурбан ворна. Гьайни йигъбышее зы манкъуква вудж едике ыхьайни Аттални хивее хъызаххы. Мана сабара йигъбышис истирагьаIтыс хъары ыхьа. Кьурбанни увгьойка, вудже контрактыква эскерийвалла вуккекка 2016- сениле гиргъыл’. СВО гидгъылийле хъийгъа, мааъар экIра-экIра эйхьи. Сабара йигъбышиле мер махъа сакIаласда. Кьурбане увгьойн: «Заква саджигее хаIбба Рутул районейнчен гадебы вобунбы. Манбы Атталгъанченбы, КIуссургъанченбы, Калел’гъанченбы ва сабара менни хиваршейнченбы вобунбы. Са джувабыка, йишди батальоне гыргыба Дагъыстанейнче контрактыква, мобилизациейква, зы хьинне джуни хаишиква хъабыйн джаванар вобунбы. Манбышди гьарункъве уфтанба эскерийвалла вуккекка. Шавусый контракт окIанас ыккан хаIрра фыкрамишхьес лазымра деш, геджвалейхъа гьимайсар. Са кар кIелиханаъас ыккан деш – йишда Ватан ши къорамишааъас вуккан. ЦIедда дагъамдавод эйхьи. АIрейнче сабара вахт абкIынийле хъийгъа, вардишил гехьана. Гъунар йигъын гьамбазар хьинне вурушмишехьена», — Кь. Асланове къейдау.
Кьурбан Аслановыка хъызаххыйни йигъыл’, Аттални хивын адамер «Гадик» донани джигейхъа сабы вухьа. Манбыше джони хивна игит къаршиламишаъас хъигъебчIы. Эскерни хъарыйс хивни джамаъаIтын къарг гювкIу, садакьа гьуво. Манчиле хъийгъа балканаршин джидырбы ыхьа.
Са-кьоIлле кал’ма контрактни гьаIкIее эгьес ыккан. Къийна республикее контракт окIанас гьаIзирувхьыйнбышис гьарджура имканбы водунбы. ГьаIшде стационар пунктыка саджигее мобильный пунктыд ишлемишехьи водун. Манбыше гьар йигъыс муниципалетбышейхъа гьавайкIан, инсанаршини аIрайл’ агитация ыккекка. Манбыше 18 ешейнче 65 ешейхъа гьибхьырыйнбышиква контракт ойкIан. Контракт 6 вузале 12 вузалхъамее окIанасын имканбы гьели.
Эскерийвалей дешди инсанршихъад, контракт окIанасдимее лазымын документбы хъели. Манчиле хъийгъа манбыш контракт одкIунийнбышис , лазымын саIъанат гьели. Мааъад геледжагъыл’ эскерийвалла гьаъас наIхъа оIтираъас ыхьай гьагва.
Контракт одкIунни инсанаршихъад Дагъыстанее саэлейсын кумаг гьели. 500 азыр манат республикайни хааIрынкъве, 400 ааазырыб федерал хазнайн гьооли. Манчиле гъайре 100 аазыр манат муниципалетын гьооли. Контрактна вахт быкырывхьамее, манкъус ветеранын статус гьели. Манчиле гъайре контракт одкIунийбышихъад федерал, регионын социал кумаг гьели. Манбы коммунал пылбы хъеленкъаI вая ушахар аали мактаббышейхъа гивийхьенкъаI, ушахаршин бахчейхъа хъоооленкъаI гьелен кумагбы водунбы. Манчин аIрайл’ энки хаIдын кумаг СВО иштыракчершис хайбы алищесдимее льготыква гьелен ипотекайн аххъаххъа.
Шавае дурустна йаIхъ авхъу, къырагъыл’ идяху оIлкайна санабыйвалла гьувааджесдимее военный контракт одкIун мана гьаIкIена ватанпарвар инсан ворна. Ватан къорамишавъуй гьар исанын бордж водун. Ватанылхъан мугьуIб садджу джуваббышиква деш, гьаъани ишиква гьагвас ыккан.
Шавусый контракт окIанас ыккан 117 нумралхъа зенг гьаъас ахаI. Манчиле гъайре СЛУЖБА ПО КОНТРАКТУ РФ и ОБЪЯСНЯЕМ РФ сайте алава маIълумат алятIасын имканбы водунбы.
