Къийна СВО контрактникаршиква саджигее хаIбба мобилизациейхъа гябкIыйнбышейий джони хаишиква гьабкIынни джаванарше иштыракаъа. Манбышди гыргынбыше са иш вуккекка – Россия азгъунувхьайни миллетчершике, манбышис кумаг гьелени хаариджи оIлкабышике къорамишааъа.
Къийна Ватанни гьийд джон бордж хъеленбышди аIрайл’ цIаIхни халкьын джаванарыб гьеххаалика вобунбы. Манбышда гьарна игит ворна. Йишди кIазетын манбыше СВО гьагвани джомардийвалике, гьокуIматни сураке алятIани наградабышике хабар гьоолена. Къийнийна йишда гаф мобилизациейхъа гирхьуна Муслагъни хивейнчена сержант ФерзаIлиев Ферман Мавлидинни духайни гьаIкIее вухьес.
Сержант Ф. ФерзаIлиевын до мобилизациейхъа гябкIыйны джаванаршини джаргее водон. Манкъулхъан СВО повестка 2022-ъэсди сенни сентябрни вуза Ростовни вилаетылыхъа хъады. Повестка алятIуме мана явашдехьа, хизаныква саламатламишхьа военкоматейхъа хъары. Манче мана военный ишин азыбы хаIдхъихьесдимее учебный марказейхъа аркIын. Сабара гагьна гьаIзирийвалла вуккуйле хъийгъа, Ферман джуни гьамбазаршиква СВО хъыккы.
Ферман 1987-ъэсди сен Муслагъни хивее едике ыхьа. Манкъве Тезе-Муслагъын 2004 -ъэсди сен мактаб быкырау. Са сенна джурабаджура ишбышил’ ишлемишхьа. 2025-ъэсди сен эскерийвалейхъа аркIын. Манкъуна эскерийвалла Хабаровскни шагьарее илгъевчIу. КьоIдле сенна Ватаныс къуллух гьавъуйле хъийгъа, Ферман хаахъа саркIыл’. Манчиле хъийгъа мана даватбы гьау, Ростовни шагьарейхъа кочмишхьа.
СВО гидгъылыйнкъа мана Ростовни шагьарей гьам ешемишехьи, гьамыр ишлемишехьи ыхьа. Мана СВО хъортIул’ ыхьай, декикIлейий едикIле аIрейнче сабара вахт абкIынийле хъийгъа ацIахьа. Манкъве манбы наIрагьат гьидяаъасдимее, хабар гьевлес телесмишхьа деш. Ферман эскерийвалейхъа аркIынийна хабар дёлесынбышикIле хъийгъаI къавуххьу.
Ферман джуни гьамбазаршиква югба гьаIзиравъуйле хъийгъа, эскерни пешейн къулай хаIдхъыхьамее, Донецкни Халкьни Республикейхъа къахову. Манкъве эскерийвалла гьааъани частын гуджнаква миллетчершиква вурушбы ыккекка ыхьа. Мани вахтыке гаф гьаъанкъаI, Фермане увгьойн: «СВО цIеддыйн вузар дагъамынбы ыхьа. Ши махъа цIебба хъабыйнкьаI сабара дагъамийвал’бышиква растына хъабы. АIрейнче сабара вахт абкIынмее, манбыд адкIыныйнбы. Къийна зы СВО вардишхьана. ГьаIшде захъад вурушбыше иштыракаъасдимее гьеххааликва таджруба вобна.
Ферман Донецкни Халкьни Республикейнче душманаршике темизявъуйле хъийгъа, джуни гьамбазаршиква Запорожьейни вилаетеехъа иккебчIы. Маайиб йишин эскерар гуджнаквани атышбышиква растына хъабы. Манчихъа ил’дяакы, миллетчерше аххъыйн шагьарбы, районбы, хивар манбыше азадауйнбы.
СВО гьаагуйни игитийвалис, джомардийвалис Ферманыхъад хаIдда гьокуIматын гьувойн джурабаджура грамотабыйий медалбы водонбы. Командирарше Ферманее гьагвани дирибашийвалисыб ахтына кьиймат гьооли. Манбыше Ферманын до гьаммаше югни сураке агъмишаъа. КомандираршикIле, гьамбазаршикIле мана Ватанылхъа, торпахылхъа аIшкь гьагвана инсан хьинне ацIа. Манбыше эйгьен: «Гуджнана эскер Ватан дарейнанкъаI мана къорамишааъана ворна. Манкъве Ватаныква саджигее джуна торпах, хав, хизан гьувааджес чалышмишехьи».
2024-ъэсди сен Украинайни дестебыше Россиейни Курскни вилаетылхъа басхунау. Манбыше Курскни вилаетыл’ ешемишоохьени тахсир денани инсанаршилхъа атыш аахъы. Манбы гябатIа гибгъыл. Курскни вилаетылхъа кумагыс хъабыйни Россиейни дестебышди аIрайл’ Фермане къуллух гьааъан частын эскерарыб вухьайнбы. Манбыше миллетчершини къошунбышин оIги явашауйн.
Къийна Ферман Курскни вилаетыл’ комендатурайни кьошунбышда эскер ворна. Манбышда иш вилаетыл’ саакитийвалла гьувааджийка багълыба. Миллетчершике азад гьауйни торпахбышил’ инсанаршина саламатийвалла къорамишааъа.
Гьайни дёлесийвалей сержант Ф. ФерзаIлиев сабара гагьна истираIгьатыс хаахъа хъары. Гьин манкъун хьебыдъэсын отпуск ыхьа. Мана хааъар джуни хьунащее, ушахарше, деккей, едей, Ростовни вилаетыл’ ешемишоохьени гугьаргьамбазын къаршиламишау. Деккини хаахъа хъарыйс гыргункъуле хаIбба ушахар шадувхьа. Ферманыхъаб кьоIйре духба вобонбы. Манбышди санкъухъад 8, кьоIдъэсынкъухъад 4 сен водон. Манбы хуруба вухьейиб, дек’ СВО хаана хаIбвалла джони оIгьтейхъа алябатIа. Манбыше гыргыни карее едис кумаг гьелен. МанбышикIле ацIан, гьаIкIени игитин духба деккик’ акар вухьес вуккан.
Заква телефонейнче гьавъуйни ихтелете Фермане ватанпарварыйвалике йишонхьа. Манкъуни увгьойка, ватанпарвар вудж едике ыхьайни хивыс, юрдыс, миллетыс гьаммаше хаIдын мугьуIб гьагвана инсан ворна. Ватанпарварийвалла инсанни мизел’ деш, йикIел’ ихьес ыккан. Гойнед увгьойн: «ДёлесынбышикIле эгьес ыккан, йизда фыкыр цIыцIаъас вуккан деш. ГьокуIматын шас декканан гьаъа деш. Шахъаб гьар каракена болвалла вобна. Къийна йишда макьсад СВО гъамувхьай вобна. Маныд шаке аIхасын.
Фермана дек’; Мавлидин чоджий ва ед’, Нафизат баджий, Бабаюрт «Правдайни» бинал’ ешемишоохьи. Манбы ишбышихъа ил’дяакы гадейни хошгелдийс Ростовхъа гьабкIын. Ферманын манбышикван горуш хаIдни тентенейква илгъечIу. Манбышди увгьойква эскер СВО хъарыйни баракайс хаIбба инсанар абы. Манбы Ростовни вилаетыл’ ешемишоохьен цIаIхбы вухьа. Зы манбышди гыргынбышикIле сагъулва эйгьи. ШакIле мани вилаетыл’ ешемишоохьени йишди инсанршина гьаIкIена садибийвалла къавджуна. Манчиле гъайре, ши Ростовни вилаетыл’ СВО воохьени эскераршини хизанбышис кумагбы гьелен джурабаджура ташкилатбышди ишикаб танышувхьайнбы. Манбы гьар вахтал’ эскераршини хизанбышиква хъызаханбы. Манбышис гьокуIматни суракен гехьан кумагбы манбышди аилебышилхъа гьихьараъанбы.
Сабара йигъбына хааъар истирагьаIт гьауйле хъийгъа, Ферман мер СВО сакIалас. Мана Курскни вилаетыл’ джуни гьамбазаршилхъа сарчес. Манкъус джанана сагъвалла аIрзааъа. Дявъий таамувхьа, гыргыни йишди эскераршис сагъба-саламатба хаахъа сабкIылый кьисматхьен.
