Февральни 26-чил Дагъыстанни девлет педагъожи университете «Тезе язынан агъулна, рутулна, цIаIхна мизяар Дагъыстан Республике: гьаIшдийна вазият ва геледжагъылхъан умудбы» маджлис вухьа.
Мана Дагъыстан Республикайни ДжаIмаъатни палатайн ва ДДПУ тешкилявъу. Мааъад республикайни къуллухчерше, депутатарше, ааIлимарше, джаIмаъатчерше, журналистарше телябабыше иштыракау. Маджлис Дагъпедуниверситетни профессоре АIлисултIан АIлисултIанове вукку.
ЦIедда джуваб ДР-ни ДжаIмаъатни палатайни садрыйс АIзизбег’ Черкесовыс гьуво. Манкъве республике един мизяар гьуваджийниме ва артмишаийниме къийнийни маджлисна ваджибыйвалла агъмишавъу. Дагъыстанни Халкьни Маджлисни таIгьсилни ва ыIлимни Комитетни садрее АIбдулваIгьид Лабазанове джуни чыхышейид къалхмишаийни темайс кьувват гьуво ва мани сардан вудже хаIбвалла гьааъани комитетын регионе едини мизяаршини инкишафниме къеджени тадбырбышди гьаIкIее юшенау.
Маджлисе аIсасна джига хьебни мизяаршини къийнийни и вазиятни ва къаджесди ишбышди аллани докладбыше авхъу. Агъулни миз’ни вазиятна хабар филологиейни ыIлимбышди докторе, ДДУ-ни профессоре Салминат ГьаIсановае гьавъу. Рутулни мизени вазиятыка багълыданан чыхыш филологиейни ыIлимбышди докторе, РАН-ни ДФИЦ-ни баш ыIлми ишчее Мариза Ибрагьимовае гьау.
А. А. Тахо-Годийни дойил’ни Дагъыстанни педагогикайни институтни хааIрни ыIлми къуллухчее, «НУР» кIазетни отделни редакторе Кьурбан Омаханове цIаIхни мизени ва адабиятни къийнийна гьаIлна дурустна хабаравъу. Джун чыхыш цIаIхни мизени таарыхыле гидгъыл. Хъийгъа манкъве едини мизени языйс диб гиххьыйнбышди гьаIкIее юшенау. Кьурбан маIъаллимни чыхышее ваджибна джига аIхреени хьебцIал’ни сенее къаджейни ишбыше авхъу. Манкъуни увгьойка,таарыхни оIл’чибышиква мана хаIбна вахт дешобна. Анджах мани манзилее едина миз’, адабият, маданият гьуваджийниме ва артмишаийниме еттыгъна иш къавджу.
ГыргынкъукIле ацIанки, цIаIхни миллетын хаIббананбы Азербайджаныл’ ешемишоохьи. Маадыд цIаIхни мизелин китаббы чапыке хъигъечIи водунбы. Амма манбы латинни графикайл’ одкIунийнбы водунбы. Кьурбан маIъаллимни джуваббышихъа гора, са миллетыхъад кьоIни графикайлин язы ихьес ыккан деш. Манчиныд са мизел’ юшенааъан инсанар аIкьана хъааъа. Дюнйейл’ни практикайн гьагванки, халкьын гьихъа адкIыний мизекени ва оодкIунийкени садибыйваликед аIслыда.
Джуни ихтелетее Кь. Омаханове къейд гьаийн, едини мизяаршиква багълыданан гьаллаъасын хаIдда суаалбы водунбы. Манчини ыIгьтейнче хъабыйниме гьоIкуматна программа кьабыляаъас вуккан ва кумагыд гьаIкIебаб едини мизяаршини балее аахванбышис гьелес ыккан.
Хъийгъа едини мизяаршини гьуваджийниме ва инкишаф гьайиниме джон фыкырбы Дагъыстан девлет педагъожи университетни мизяаршини кафедрайни хаIрынкъве, профессор МаIгьаммад МаIгьаммадове, »НУР» кIазетни хааIрни редакторе Байрам АIбдуллаеве, ДР-ни едаршини Союзни хаIрынкъе Интизар Мамутаевае, джаIмаъатчий Вагьаб Къазибекове ва мебынбыше агъмишау.
Чыхышбышиле гъайре мани йигъынджагъыс ярашугъ цIаIхни, агъулни, рутулни мизяаршил’ телябабыше йикIеке хъаIдхъыйни шечIбыше гьуво.
Маджлисни аIхрее джурбаджурни теклифбышиквана резолюция кьаблявъу.
