Гьайни йигъбышее ДР-ни ХаIрынкъуни ва Правительствайни Администрациейни Регьберни Алексей ГьаIсановни хаIбваликва «Гъамувхьайн байдах» ватанпарасваллайн акцие алгъагьас къадсырийн иджлас ыхьа.
Акцие республике регионни башчийни Сергей Меликовни теклифыка 2022 сениле Гъамувхьайни Йигъыле гьихъа алгъайгьи водун. АIсас гьаIдиса Берлине Рейхстагъни чардахыл’ ЧIаIрани Армиейни эскерарше 1945 сенни майни 1-чил байдах гихыIйка багълыба.
Гьайни сенийн таарыхын едигар гьуваджийниме тешкиляуйн хьебеъэсын акцие водун. Манчина иш майни 6-чил Каспийскни йыIкьнекни майдаме гивгъалас. ЗаIгьматни шарафни шагьаре ветеранар, республикайн чIакIынбы, депутатар, СВО-йн иштыракчер ва манбышин хизанбы, хаIбба ушахарнан едяар, джаIмаъатчер савалес. Мани маджлисейхъа гьаIшде Дагъыстанэ воохьен Белгородни вилаятенчен ва Палестинейнчен эл’черыб хъобтIул вобунбы.
Каспийскни майдаме тентенейкван тадбирбы ихьес. Манчее йыIкьнекна джига пиядабышди ивийкырийн ва маданиятни программайн авхъас. «Гъамувхьайн Байдах» акцие республикайни гыргыни муниципалитетбышее илгъечIес.
Гьайни сенийни акциейхъад сабара джурааллабы водунбы.СКФО-ни регионбышилхъа эстафета хъоолен машинбышин гьаъайкий тешкиляъас.Машинбышди къатарын Каспийскгъанче къонши Чеченни Республикайлхъа йаIхъ авхъас, хъийгъа — Ингушетиейлхъа, Къузайл’ни Осетие-Аланиейлхъа, Кабардино-Балкариейлхъа, Ставрополни крайилхъа ва Карачаево-Черкессиейлхъа.
Гьаарни субъекте фыкрее Гъамувхьайни Байдахын хаIдын копие ачмишаий водун. АIсасын копие ХаIдни Гъамувхьайни 80 сенийлхъаме гьуваджес РФ-ни Президентни СКФО-ени эл’чийни аппаратейхъа хъелес.
