Къийнийни йигъыл’ йишин цIаIхбы дюнйейни гьар сурал’ ешемишоохьи вобонбы. Манбышин хаIббананбы Азербайджан ва Россиейл’ гуд’мишоохьи. Совет гьоIкумат дагъылмышхьайле хъийгъа, йишин йихъбы хаариджи оIлкабышехъа ишлемишебхьес, хъаIдхъас абкIын ва мааъаб авху. Зы гьаммаше увгьойн ва медыд эйгьен: «Совет гьоIкумат дагъылмышхьай сабара карбышее йишди миллетниме югда ыхьа, няъас увгьее йишди джаванаршис бизнесыква маIшкьулувхьесын джурба-джур йаIхъбы ачмышхьа ва манбы Россиейни шагьарбышехъа хъаIдхъас, ишлемишебхьес абкIын, къийна мааъад къык къазанмышаъа.
Йизда йаIхъ Россиейни шагьарбышехъа гибхьыйнкъаI, зы чалышмышехьена мааъаб гуд’мишоохьени цIаIхбышиква горушмышхьес, манбы нишикайий маIшкьулоохьи ацIахьа ва манбышди гьаIкIее йишди кIазете маIълумат гьелес. ОIтмишувхьайни августни аIхырбышее йизда йаIхъ Москвайни шагьарехъа гибхьы.
Москвайни шагьарее къийнийни йигъыл’ 100 авадкьырийн йихъбышин хизанбы ещемишехьи. Манбышин хаIббананбы аIхрейни 20-30 сенбышее махъа Азербайджанни ва Дагъыстанени цIаIхбышди хиваршенче абкIын. Манбышда сайир ЫIсаев Сулейман Исламна дих ворна. Мумкум вобна, Сулейман чоджий Москвайни шагьарехъа Гуд’барагни (Гёзбарах) хивенче кочмишхъана цIеррыйна калелий эйхьи. Сулейман чоджийна кок Закаталайни районни Агъдам-Калел’гъанче вобна. Къийна мана хив, Дагъыстанена Баш-Калел’хьинне авху деш, амма мани хиваршенче хъигъебчIийни джаIмаъатын джо калел’бы вобонбыва эйгьи, няъас увгьее хивар джурайда ыхьейид джаIмаъат са водон.
Мана Москвайни шагьарехъа 1985-ъэсди сен мактаб таамаъуйле хъийгъа хъары ва сабара вахтна маа ишлемишхьа, гойне манче эскерейхъа аркIын. Эскерийвалла таамавъу хъарыйле хъийгъа, мана 1988-1996-ъэсди сенбышее Москвайни «НПО-Молния» донани заводе ишлемишхьа. Мани сенбышее мани заводе космосехъа аливхасда «Буран» донана гами гьаIзирааъа вухьа. Заводе ишлемишехьи Сулейман Исламна дих 1989-1995-ъэсди сенбышее Москвайни йаIхъбы ва машинбы таIмираъани институте (автодорожный) хаIмдийни шоIъбее хъаIдхъы ва ааIли таIгьсил алятIу.
Ман сенбы Россиейни экономикайниме геед дагъамынбы ыхьа ва мани вахтал’ ааIли таIгьсил алятIуйни джаванаршис ишбы ыхьа деш. Манчихъа гора Сулейман чоджий вудж ишлемишехьен завод къаледчу, тикинтийни ишбышиква маIшкуулехьи гиргъыл’ ва устадийвалла джус югба хаIбхъувхьайле хъийгъа, бригадабы саъу тикинтийн ишбы къеджи гиргъыл’. Манкъуни увгьойква, джуни бригадабышехъа Гуд’барагни ва менни йихъбышди хиваршенче ишдена авхуйн джаванар хъобтIул ишлемишебахьи вухьа. Эгьес эйхьи, манбы гыргынбы цIебба хъабыйнкъаI Сулейман чоджийни хаа аахва вухьа, гойне ишбы ыхьамее ишнани джигехъа авайкIан вухьа. МаIгьад, 30 сенни аIрее Сулейман чоджее хаIббанани йишди ватанэгьлершис ишбы гьуво, гыней къазанмишаъасын усулбы яратмишаъу. Мана гьаммаше манбышис кумагаъас чалышмышхьа ва гьаIшдер чалышмышехьи ворна. Мааъаб манкъуква ишлемишебхьа, Россиейна ватандашийвалла алябтIу хизанбы къурмишаъу ешемишоохьен цIаIхбы кIылба дешоб.
Къийнийни йигъылид Москвайни шагьаре джурбаджур тикинтибышее манкъун бригадабы ишлемишехьи водонбы. Манбышди сабаранбышиква зы мааъар горушмишхьа ва джо къеджени уфтанни тикинтийни ишбышиква танышхьана. Манбы гыргынбы Сулейман чоджийле разийбайий ва джойиб чалышмышоохьи воб джос ишбы гьелени йихъыйн до авхъа хъидяъас.
Манкъве лазымдананкъаI Гуд’барагни хивее джаIмаъатын хивыс хайирыс къеджени ишбышис вахт-вахтал’ кумаг гьелен ва мани ишбышди баеэ ахвана.
Сулейман Исламни духайхъаб уфтанна, мигьманыс гьуIрматнана хизанобна. Манкъве джуни хьунащейква саджигее кьоIйре аIкIеликван ва къанаджагъыкван духйебы чIакIы хъавъу. Манбы садджу Гуд’барагни хивынджаб деш, быкырни йишди миллетын арха водон ва умудааъана манбыб джона дек’хьинне хивыс, миллетыс хайир гьеленбы вухьес.
Йишди миллетыхъаб нимеега Сулейман чоджийхьиннен игит инсанар вухьее, гьаманимеега югда ихьес. Деккяршда месала вобна: «Кусяв гьимеега хылийда ыхьее, хыл’ гейхьанан деш».
Ши Сулейман Исламни духайс ва джуни хизаныс джанана сагъвалла, болвалаа ва къеджени ишбышее угъурбы арзуламышаъа!
