Къийна дюнйе быкырда сайидкьыл водун. Няхъа иляакее даIвъий — дарама къооджи. Архайнда нафас алеетIу, къихъийни йигъылхъана умуд дешда. Дюнйейлхъа гъийбат, гьыIдчат, фитнаа яранмишивхьа. АIрее тахсир дешин угъул’-ушах, джегьил’ гадебы гябтIу-гябху аIлгьаа вобунбы. Дюнйейни миллетбышикIле ацIа водун, манчин тахсиркарар, анджах джуваб эгьес аIха деш. Месала вобна: «Гуджнанкъуни гьийр, гудждешда гьаммаше тахсиркар эхьи». АллагьыкIле гыргын къеджи, къийхьи водун. Тахсиркарар гьищубыйий, манбыше лайикьна джазаа алебтIасда. Манчее шакламишивхьес вуккан деш. Шавухъадджад ихтияр дешин мерынкъуна ыIмыр алебтIас.
Ёкьудъэсын сен эчIу Украине спецоперацие гидгъылыйн. Манчина метлеб вобна Украина нацистаршини ва фашистаршини режимыке азадауй. Къийна Россиия мааъад Америкайн ва Авропайн ярахыква, наёмникIаршиква кумаг гьелени Украинайни армиейква вурушмишехьи водун. Агар хъодкуда алеетIе, Россия НАТО-йква мааъад вурушмишехьи водун. Украинайна паччагь ва регьберар Америкайн шигыртар вобунбы. НАТО-на метлеб Россия украиналыбышди хылеббышиква гьыIгъаккарау ва маадын маIъданбы аххъый вобна. Мани оIюнееманбы гуллейни гьихъа гьувойн лашагбы водунбы. Мани кьоIни чодж оIлкабышди аIреедын ледж амерканлыбыше джони авропеени соталитаршиква адчы. Вахт хъавалесда, манке манбыше джон каллебы гетас, джо алдамишавъуйхъа гора. Гьалекийс йигъыс ваIшбышиква мааъаб гьам украиналыбы, гьам россиянлыбы гуллейке гьабатIа вобунбы. Мед зы эйгьен: урусарайий украиналыбы са эбан , са динын чоджар вобунбы.
Къийна Россия маджбырба вобна мани писти хастаалин оIги ыIхас, дешхьее манчин кIарын хылли шалхъад гьихьарасын. ШакIле къеджен йигъыс Украинеехъа НАТО-хъа эчIуйни оIлкабыше сан-гьыIсаб дена ярах кIяъа водун. Гьар элейс гуджнакван гьели. ГьаIшде ООН-ын къадагъа гивхьуйн кассетный топпар йаIхъыIляъа. Англиейн ураныкван ракетабы, Германиейн танкбы ва аIкьанахъа айгьен ракетабы оIтираъа. Манчина аагьана месафаб хыллийна вобна. Амеркайни ва НАТО-ни пушкабышеенче авгьуйн топпар Белгородни, Курскни, Ростовни вилаетбышил’ къитIойкIал ва хайбышисджад деш зиян гьели, манчин инсанарыб гьаIлакааъа. ГьаIшде военный самолетбы F-16 мислягьаIтбы къеджи водунбы. НАТО-хъа эчIуйни гьоIкуматбышил’ манчин лётчикар гьазирааъа. Агар манбышис оIги гьувее, мункум вобна гьоIкуматни адни шагьарбышеехъад манбыше манбы агьас. Манчиле гъайре, Америкайний Авропайн Россиейква экономика гьыIгъаккараъас чалышмишоохьена даIвъий вуккекка вобна. Манчихъа гора, къийна ши гыргынбы са мислягьаIтеехъа Россиейни армиейква хъабы, саджигее душманын «йыIкь гьакьвараъас» ыккан. Йишин эскерар энки ламусыкванбы, раIгьымыкванбы вобунбы. Гьел’бедти, манбышди аIрее хаIбба цIаIхбышин игитер вобунбы. Манбышис кьиймат джони командирарше, саджигее вурушмишоохьени дост-эскерарше гьооли. ХаIббананбышис гьоIкуматын орденбы, медалбы гьувы. Манбы гыргынбы йишди миллетын кьаIгьраманар вобунбы. Ши чалышмишоохьенбы йишди кIазеее манбышди игитийвал’ни гьаIкIее окIанас. Къийнийна йишди макьалейна кьаIгьраман хыIягъалий Кьурбанов Алескер Рамазанна дих ворна.
Урусаршихъаб мисала вобна: «Через огонь и медные трубы прошёл». Эле Алескерык’ мана аваакьына мисала вобна.
Алескер Кьурбанов Рутул районни ХыIягъни хивее хаIбни хизанее едике ыхьа. Манкъуна дек’ раIгьматтыгъ Рамазан дайий ва ед’ Шагьнигар халай гейб гьуIрматыкван , мигьман кьабыляъан инсанар вухьа. Рамазан дайий дяцIана инсан Сувал’ни маIгьалыл’ дешда. Манкъвее джуни кьаварчершини дестейква хаIдда дават –давлатбышее иштыракаъы ва инсанаршис шадвалла абы. Алескерыле гъайре, манбыше гьалални кьыкыква кьоIйре дихий хьебыйре йиш чIакIы хъавъу. ГьаIшде манбы хизанбышин ессибы вобунбы.
Алескер Кьурбанове ЦIаIхни йыIкьнекни мактабее хъаIдхъы. 2000 сенни майни вуза мана эскереехъа хъортIул’. ЦIеддыйни ыIмрени сыныгъенче (манчин матор харабхьа. Призывникаршиква гяцIыйни самолет хъихьуйн. Лётчикарше ман гейдни дагъамийваликва чIиелхъа гихаъы. Манке Алескерна ед’ ва авхуйни призывникваршин едяар кубе вухьа. Аллагье манбы баляаке гьуваджийнбы. Хъийгъа манбы медни рейсыква Хабаровскни шагьареехъа хъувку. Мааъад кьоIдле сенна Алескере Ватаныс эскерын бордж хъувы. Эскеренче хъарымее, мана сабара сенбына Челябинскни шагьаре къуIванан мебель гьаъани цехе ишлемишхьа.
2006 сенни цывылихъа А. Кьурбанове РФ-ни Миллетни гвардийква контракт одкIун. Манкъвее джуна ыIмыр эскерни къуллухыква гьибтIыл. Манкъвее эскерна къуллух гьааъана военный часть Чечен Республике водун.
СВО Украине гидгъылни ( 24.02. 2022) йигъыке мана манчина иштыракчий ворна. Хьейибле вазна мана командировке джуни гьамбазаршиква Украина фашистаршике, нацистаршике темизяаъа СВО эхьи, хьейибле вазна къуллух гьааъа частил’. Мани вахтни аIрее АлескерыкIле хаIдда кар къадже ва къайиххьы. Манбыше Украинайни нацистаршике азадаъыйн шагьарбы ва ваджибын бинаабы къорамишаъа водунбы. Донецкни, Луганскни Республикабышил’ ва Запорожьейни, Херсонни вилаетбышил’ джун эскерын бордж быкыраъа ыхьа.
Мысаджаб манкъвее джуна йаIгь-ламус къувобхьыр деш. Гьаммаше манкъвее джигайл’ни джамаъаIтыква югун алакьабы гьуваджы. Джуке аIхан кумагбы гьаъы. Сержант Алескерыхъаб гьамбазаршини, командираршини аIрее хаIбна гьуIрмат вобна. Манкъулхъа ыIгьтибар гьаъы далбы хъадаченнбы. Дагъамийвалеехъа гябкIыйнкъаI , мана мысаджар йыIкьалхъа хъехьи деш , не мерынкъуни йыIкьалхъа дюгылехьи деш. Алескере тезеба хъабыйни джегьил эскераршис гьаммаше хыл-авхъааххъа, манбы хаIбхъааъанбы нягьаIбый вурушее вуккейс , нягьаIбый душманни гуллейке , топыке дроныке къорамишивхьес. Алескерыхъад мани карее хаIдын къулай водун. Манкъве, гьале СВО гигъаллассе гихъа, джурабаджур йишди гьоIкуматыл’ ва хаариджийл’ ыхьайни спецоперациебышее иштырак гьаъы.
Алескер Кьурбановыхъад хаIдда ведомствайн орденбы, медалбы водунбы.
Джуни игит’ гьаIракатбышди гьаIкIеедын хабарбы манкъус гьаъас ыккийкан деш. Амма джуни гьамбазарше манкъуни гьаIкIее садджу кьаIгьраманни гьунербышин гафбы гьаъа. Алескерын даягъ джуна хизан вобна. Ёлдашыква саджигее кьоIйре ушах чIакIы хъааъа вобунбы.
Ши Алекер Кьурбановыс ва джука садибда гыргыни йишди миллетни эскереени джегьилершис джанана сагъвалла аIрзуламишааъа. Сагъба, саламатбы джони хизанбышеехъа савкIалас кьисматааъанбы.
