Йишди миллетыхъаб ХаIбни Ватанни даIвъийна агь хъидёотIуна,уцIур цIыцIдявъуна хизан дешда. Немец-фашистаршиквани даIвъийе гьабтIыйни эскераршин добы садджу мармарни къаейл’джад одкIун дешодунбы, манбы гьар цIаIхийгъаIлийни йикIбышее одкIун водунбы. Гьайни, 2025 сен, азгъун душманыле гъамувхьайн 80 сенийнбайрам алгъагьас. Манчиле гъайре гьайин сен РФ-ни Президентни П кьарарыка Ватан къорамишааъанбышин сен эълан гьау.
Фашизмайн оIги ыIхас, мани кьияматыке Ватан корамишааъас Советни гыргыни миллетбышиква янашеда йишди халкьын игитерыб сугъооцу. Ёкьудле сенна цIыцIавхьайни даIвъийн милйонбышиква ыIмырбы алятIу. Хъийгъыйни насылбышда ыIмыр саламатна вухьайниме джон аIзизын джанбы гьувойнбы йикIел’хъавалявъуй, манбышди кьаIгьраманийваллайни гьаIкIее одкIуний йишин бордж водун. Ненаджар кIелирхын дешорна, ненджад кIелидхын дешод.
Къийнийна йишда гаф Сувагыл’ни дерайл’ еррашмишивхьайни Кьаркьвайни хивеенчени ХаIбни Ватанни ДаIвъийни иштыракчийни РаIгьымов ГьаIджираIгьым Рамазанни духайни гьаIкIеена вухьес.
Гь. РаIгьымов 1920 сен Закаталайни Кьаркьвайни хивее едике ыхьа. Манкъуна дек’, Рамазан, доюкана динэгьлий, хивна дибырний. Манкъве джун ушахараб кIыл’валике исламни диныс къуллухааъас хаIбхъааъа вухьа. ГьаIджираIгьыме йигIыдле сеннан мактаб таамаийле хъийгъа, джун хъаIдхъый Закаталайни педагъожи училищее давамау.
1941 сенни апрельни 15-чил Гь. РаIгьымов эскереехъа хъортIул. Манкъуниме даIвъий Совет гьоIкуматнийий Польшайни сергьатыл’ гибгъыл. Мана генерал Кузнецове хаIбвалла гьааъани 111-ъэсди десантни дивизиейни таркибее вурушмишхьа. Рамазанна дих ГьаIджираIгьыме немец-фашистаршиквани цIеддыйни вурушбышеджад джомардийвалла гьаагу ва манчика эскер гьамбазаршини арайл’ хаIбна гьуIрмат къазанмишавъу. Командирарше манкъуна игитийвалла гвардийни сержантни званиейква лайикьавъу.
ДаIвъиийн цIеддыйн вузар Советни армиейс гейб йыIкьна вахт вухьа. Няъас увгьее ярах еттыгъда ыхьа деш. Немцар мани даIвъийс гьихъаджаб гьаIзироохьи вухьа.Гь. РаIгьымов вурушмишехьени 111-ъэсди дивизиейс мани сардан хаIдын зарал хъетIу.Геллесди эскерарше Ватанниме джон аIзизын джанбы гьуво. ГьаIджираIгьымыс душманни цIайике сагъра хъигъечIес кьисматхьайн.
Хъийгъа сержант РаIгьымове даIвъийна йаIхъ ёкьудъэсди Украинайни фронтни 122-ъэсди Житомирни дивизиее давамавъу. Манкъве Ленинградыле гиргъыл’, Берлинхъаме шарафукана, дагъамна эскерна йаIхъ илгъевчIу. Гьаагуни игитийвалис гвардийна сержант Гь. РаIгьымов гьоIкуматын орденбышис, медалбышис, пайбышис лайикьау.
Рамазанна дих ГьаIджираIгьыме Авропайн хаIдданнан шагьарбы азадаъанкъаI иштыракау. ХаIбна Ватанна даIвъий таамувхьайнчиле хъийгъа, 1946 сенни майни вуза мана едике ыхьайни хивеехъа саркIыл. Манкъус мактабе маIъаллимна иш теклифавъу. МаIгьар Гь. РаIгьымове Кьаркьвайни хивее маIъаллимийвалла гьааъа гиргъыл’. Гьаманиджад сен ГьаIджираIгьым маIъаллиме хизан къурмишавъу.
Сабара вахтыле Сувагыл’ни дерайл’ин Кьаркьвайн, Къалалын, Кьасын хивар дюзилхъа кочмишааъа гибгъыл. Мани хиваршенче кочмишебхьайнбыше АIлибайрамлыйна хив къурмишавъу. ГьаIшде мани хивын до Дагълы водун. Гь. РаIгьымове хъийгъа джун саIнаъат АIлибайрамлыйни йыIкьнекни мактабе давамаъу ва мани пешейс хьебцIалиле агъаллан сенбы къадсыр.ГьаIджираIгьым маIъаллиме гьаммаше ушахаршис югун ацIаал’бы гьелес чалышмишхьа. 1980 сен мана пенсиейхъа хъигъечIу.
Манкъуни фыкрей кIыл’рананкъаIджар исламни диныс къуллух гьавъуй вухьа, няъас увгьее мана доюкани дибырни хаанче хъигъечIу. Хивни джаIмаъатни аIрайл’ ГьаIджираIгьым маIъаллимыхъа хаIбна гьуIрмат вухьайхъа гора, мана имамна сечмишау. Манкъве ыIмырни ёлдашиква Фатма ханымыка йигIыйре ушахар чIакIы хъавъу, манбышис хъаIдхъыйбы гьуво, евлемиш гьавъу.
