ЦIаIхни дерайл’ «Инсан» фондын джона иш явашааъа дешобна. Йишди кIазетни гьийдни нумрее ши манбыше СВО воохьени эскераршини хизанбышиква хъызаахыва одкIунний. Гьайни йигъбышее манбыше дагъамба ешемишоохьени хизанбышис одхьанни карбышин пайбы битIалау.

Гьини элес фондын эл’чер МиххьегIни хивее ешемишоохьени Исмаиловаршини хизане вухьа. Къийна мани хизанее ёкьуйре йичибы ешемишоохьи. «Инсан» фондна ЦIаIхыйни дерайл’на хааIрна АIсадуллагь Рамазанов, ЦIаIхыйни дерайл’на имам Эл’дар Сулейманов, МиххьегIни хивна имам Джелил Сафаров йичибышда вазият вацIавхьесдимее манбишысана вухьа.
А. Рамазанове фондыкена пай хъувойле хъийгъа, йичибышди дагъамийвал’бышике хъидгIынбы гьау. Манбыше абыйни мигьманаршис гьалзугар йишонавъу. Абыйни пайис йичибыше фондни ишчершис миннатдарийвалла агъмишавъу. Манбыше фондни ишчершини хайирхагьни ишис алхышбы гьау.
ЦIаIхыйни дерайл’ни хиваршен хаIбба дагъамба ешмишхьен хизанбы водунбы. Фондыхъад манбышди аллан сиягьый водун. Имкан вухьайнкъаI, фондни эл’черше маIгьадни аилебышис лазымын кумаг гьагван.
А.Рамазанове увгьойн: «Шавае фондыс кумаг дешди инсанаршис садакьа битIалаъас хыл’ авхъаахъа, сагъба вухьенбы. Джони счётейхъа хъабына гьар са манат мани саягъыл’ни ишбышис ишлемишаъасда. Манчике инсанаршис охьанасын мал ва сабара медын манбышис лазымын карбы алищес».
Фондын вуккеккани хайирхагьни ишбышис хиваршеее ешемишоохьени инсанарше ахтына кьиймат гьооли. МанбышикIле ацIан, дагъамийвалейхъа гирхьуйни инсаныс кумаг гьелес фонд гьаммаше гьаIзирда водун.