ЦIаIхбышин едар гьаммаше чалышмишивхьайнбы хаана баракат, къуIмаала гьувааджес. Манбыше адамершиква барабарба гьам чолеена иш гьавъу, гьамыд хизанее лампайн иших гьуваджы. Йишин, адамершин бордж водун манбышда гьуIрмат гьувааджий ва манбышди хатирес, тахсир дена, хъидётIуй. Гьел’бедти, гьихъа йишди Сувал’ни маIгьалыл’ едяарше хаIдда заIгьматбы цIыIаъы. МанбышикIле раIгьат, тавсун ацIа ыхьа деш. Манчихъа ил’дяакы, манбыше джон ушахар тербиейква, гьалални къыкыл’ чIакIы хъавъу.

Гьар сен дюнйел’ мартыни 8-чил’ Едаршин йигъ алгъайгьи. Манчина маIънаа вобна едаршини ешайишилхъа, гьаъани ыIмрелхъа, манбышди дагъамийвалилхъа фыкыр гьувой. Ман манбышин ихтиярбы гозетяъан йигъ водун. Анджах ши садджу мани йигъыл’джаб деш, гьаммаше едаршина гьуIрмат авхъас вуккан.
Къийна цIаIхбышихъаб джурабаджур къуллухбышил’ ишлемишоохьен, джурабаджур санаъаIтбы гьаъан йичибы, баджера, халера вобунбы. Манбы няаъаб ишлемишивхьейиб, джон гьаIракатбы саламатни сураке гьагва.
Къийнийна йизди макьалейна кьаIгьраман Мирзоева Рафига АIбдуллайна йиш ворна.
Мана Рутулни районени Гыл’мецIни хивее маъаIллимни хаIбни хизанее 1978 сен едике йихьа. Яраб ЦIаIхни дерайл’, Рутулни районе Мирзоеваршина насыл дяацIана инсан ыхьее. Манбыше джосда гьуIрмат , джони гьаIракатбышиква, мигьман ыккийкыныйква ва билигыква, тербиейква вуккеккани ыIмреква къазанмишавъу. Хизанни саIгьыбе, АIбдулла маъаIллиме, джуни ыIмрени гьамбазыква, Набат халайка, саджигее гьалални къыкыл’ 8 ушах чакIы хъавъу, манбышис хъаIдхъий гьувова эвлемишавъу.
АIбдулла маъаIллиме джуни ыIмрен 57 сен маъаIллимни санаъаIтыс къадсыр. Манкъвее Гыл’мецIни мактабее урусни мизений адабиятын дарсбы гьуво. Мани вахтни аIрее сабара сенбына мактабна директор ыхьа. Манкъуни ишис районни хъаIдхъийни управлениейн, Дагъыстанни хъаIдхъийни ва ыIлимни министерствайн ахтына кьиймат гьуво, грамотабышис, дипломбышис ва Дагъыстанни шарафукани маъаIллимни дойис лайикьаъу.
Эн хаIдын ыIмрен натийджад манкъун ыхьайн – вудже ацIаал’ ва тербие гьувойн ушахар. Къийна манкъве дарс гьувойн шыгыртар чIакIни къуллухбышил’ республике ишлемишоохьи вобунбы.
АIбдулла маъаIллим джуни ушахаршини ыIмрен сент’ ыхьа. Едейиб манкъус мыга гьуво, хизанее къуIмаала, баракат ва лампайн иших гьуваджы.
ХаIббанани ушахарше джос деккин санаъаIт сечмишаъа. ХааIрни духее, Сейфуллагь Мирзоеве, педагожи институт таамаъы. ГьаIшде мана урусни мизена ва адабиятна маъаIллимна Краснодарни 63 йыIкьнекни мактабе ишлемишехьи ворна, гьамыр мана директорна маIъвын ворна.
КьоIдъэсди духейид – АIбдулкерим Мирзоеве джус филологын санаъаIт сечмишаъу. ГьаIшде манкъвее Гыл’мецIни йыIкьнекни мактабее урусни мизен ва адабиятын дарсбы гьели, гьамыр директорна маIъвын — тербиечий ворна.
Хьебыдъэсди духее, ГьаIджимагьаммад Мирзоеве, джус экономистын санаъаIт сечмишаъы. Мана ДДТУ снабжениейни шоIъбайна хааIрна ворна.
Ёьудъэсди духайн — Мирзоев Музаферын санаъаIт юрист водун. Джуна джегьилийвалла гьоIкуматни силагьбышди ташкилатбышее ишлемишехьи абкIын. Мана майорни званиее пенсиехъа хъигъечIу. Музафер Чечнее вухьайни давIъийна иштыракчий ыхьа. Мана гьамыр Украине аIлгъаани СВО-на иштыракчий ворна. Музаферын гьаIракатбы ва гьунарбы къадже, гьоIкуматын мана орденбышис ва медалбышис лайикьаъы. Гьамбазаршини аIрее манкъухъаб хаIбна гьуIрмат вухьа, няъас увгьее мана джегьилершил’ гьаммаше мугъаетхьана. Вуруш ааIни джигее, нягьаIбый душманыке къорамишивхьес хаIбхъавъу. Музаферын до Дагъыстанни таарыхе сувахъан игит’ хьинне ахвас.
ЧIакIни йишбыше, Рукьиятейий Зейнабее, джона ыIмыр хизанбышис кьабсыр. Манбыше йишди цIаIхбышди хизанбышин югун аIдатбы ва адаббы гьуваджи водунбы.
Хизанеедын эн кIылин ушах — йиш Рафига йихьа. Гьел’бедти, мана декке едее, чIакIни чоджарше, йичибыше эркекра хаIрхъайъы. Деккинайий едина энки хаIбна умуд хизанеени энки кIынинкъулхъа воохьи.
Рефига ителлигентный хизанее хаIрхъийхьа. МаIнкъын хъаIдхъийлхъан, ацIаалилхъан гьавас кIыл’валееджад ачмишхьа. ЦIеррыйна джена маъаIллим джена дек’ АIбдулла Мирзоев ыхьа. ЧIакIни сыныфбышее хъаIдаххъанкъа Рафигайс урусни мизен ва адабиятын дарсбы джени чодже АIбдулкерим маъаIллиме гьуво. Мана гьамыр джени сыныфна регьбер ыхьа. Манчихъа гора, медын санаъаIт сечмишаъасда фыкыр вухьа деш. Рафига джени деккини ва чоджаршини «говахъар» хъигьна аркIын. МаIнкъейид джес маъаIллимын санаъаIт сечмишаъы. 1994 ъэсди сен мана Дербентни педагожи колледжехъа иккейчIу ва 1998 сен ман таамаъы. Диплом алебтIу, мана ишлемишийхьес хъарына Гыл’мецIни мактабеехъа. Мана мааъар дагъайдни сыныфбышис дарсбы гьели гиргъыл’. 2001 сен Рафига маъаIллима заочныра ДДУ-ни филологиейни факультетехъа иккейчIу. Мааъад хъаIдаххъани вахтал’, Гыл’мецIни мактабее урусни мизен ва адабиятын дарсбы гьели гиргъыл’. Анджах манчиква хъаIдхъийлхъан ва ацIаалилхъан гьавас даянмишхьа деш, гьалед ыIлимылхъан, аали мактаббышееъар ишлемишийхьесын гьавас гуджлемишхьа. 2007 сен мактабеенче аIрза обкIун, хъигъейчIу Магьачкъалеехъа хъары. Гьиняаъар мана маъаIллимна ДДПУ ишлемишехьи гиргъыл’. Джена дараджа гьалеб ахтыхъааъасдиме маIнкъее мани университетын факультет таамаъы ва манчина диплом алебтIу. Хъийгъа мана педагогиквайни кафедрее соискатель хьинне кьабылийхьа ва кандидатни минимумын интагьаIмбы хъуво. Диссертацие гьалекийс мудафия гьааъас усулыйхьа деш. Ин ша Аллагь, манаб кьисматувхьесда.
ГьаIшде маIнкъее ДДПУ гьам дарсбы телябабышис гьели, гьамыр ФК БЖ деканна ыIлимни ишна ва цифровизациейна маIъвынна ишлемишеехьи. Рафига АIбдуллайни йищехъад хаIдда одкIунийн ыIлимын макьаалебы, къурмишаъыйн программабы водунбы. МаIнкъыни телябабыше конкурсбышее, олимпиадабыше цIеддыйн джигабы аххъаххъа.
Р. Мирзоевае ыIлимни конференциебышее чыхышбы гьаъа, сборникбышеехъан макьаалебы гьазираъа.
Къийна Рафига Мирзоевайхъаб телябабышди, кафедрайни, факультетни маъаIллимаршини, институтни ректоратни ишчершини аIрее хаIбна гьуIрмат вобна. Хьулехьее мана педагожи университетбышди дипломбышис, грамотабышис . мукафатбышис лайикьайъы.
Рефига маъаIллимае джени санаъаIтыле гъайре университете джамаъаIтна ишиб гьаммаше вуккекка. МаIнкъее джени телябабышиква джурабаджур акциебы: «Эскерылхъан кагъыз» , «Эскерысын басиркIа» ва медынбы алгъайгьи . Манбышее СВО-хъа гуманитар кумаг оIтираъа. Эскераршини едяаршиква, деккяршиква, хьунащерщиква хъызааха ва аIхан кумаг гьели ва джуваббышиква умыдбы гьели.
Р. Мирзоевайни меега мана тема ваджибна вобна. МанкъыIна чодж Музафер СВО-на иштыракчий ворна. ГьаIшде джен эмогълер, халогълер, гогьарбы ва хивын джегьилер Украине йишди гьоIкуматын ихтиярбы къорамишаъа, душманаршиква – укранацистаршиквайий хаариджийни оIлкабышеенче хъабыйни наемникаршиква вурушмишоохьи вобунбы.
Рафига маъаIллимае джена ватаныб, едина мизиб мысаджаб кIеливханааъа деш. Мункум, вахт вухьайнкъаI маIнкъее миллетиква багълыданани йигъынджагъбышее иштыракаъан. МаIнкъее тербиейква ва билигыква джена йишир хаIрхъееъи ворна.
Рафига Мирзоевае эйгьен: «Къийна йишди йыIкьале хъооIни джегьилерше хъаIдхъийлхъа, ацIаалилхъа кIылба фыкыр гьооли гибгъыл. ОIгийл’ гьар джегьил’ни гьийбна мурад вухьана институт ва университет таамаъы, снаъаIт алетIу, гьоIкуматыс, миллетни, хизанни хайирыс ишлемишхьай. Анджах къийна гыргына пылыхъар хъигьна, ыIмаратбышихъар, девлетихъар хъигьна «къадайхьван» ворна. Манбыд ыккананбы. Анджах манчиква гыргын таамехьи деш. Миллетин генофонд гьуваджесдимее шахъаб ишкарар джаб деш, манбышиле гъайре ааIлимар, югун маъаIллимар, язычера, шааирар, журналистар, дохтурар, индженерар ва мебынбыб лазымба вобунбы. Къийна дюнйейл’ эхьен гьаIдисабы шакIле къедженбы. Ши манчис гьазирба вухьес вуккан . Къирагъыл’ китIобкIул илёбзурийке хайир не вас, не йигъни миллетис ихьес деш. Ши гьихъа вуIххъани джегьилершис хыл’авхъас вуккан, манбышикIле хъобкуна йаIхъ гьаагвас вуккан….»

Ши Рафига маъаIллима ва джека барабарба гыргын цIаIхбышин едяар, йичибы, йишбы 8 МАРТНИ байрамыква табрикааъа! Джанана сагъвалла, йикIена шадвалла, хизанбышее саакитыйвалла, баракат арзуламишааъа. Дюнйейлин даIвъийбы таамхьенбы, гьаарна джегьил’ джуни едисахъа сагъра, саламатра хъалена.!