Мишлеш цIаIхбышда Сувал’ни магьаIлыл’на эн хаIбна хив вобна, ва манбышин джамаъаIт хивыс лазымын ишбы къедженкьаI гьаммаше гьавасуква ыхьа.
АIхреени вахтал’ мишлешни джаванарше мани сардан хаIдда ишбы къадже водонбы. Масалан, оIтмишхьайни сенни ноябрьни вуза манбыше хивни къаршеедын Хейгъва эйгьени джигеехъа трахторуква йаIхъ цIыцIавъу ва ата-бабайн сук, сикIыл’, кIартIоф, ва медын одхьанан тасарруфат эзан джигабы тезелемишаъу ва мааъад лазымын карбы эзасын ишбы къадже водунбы.
Манбыше махъа ишыгъ, хьян цIыцIаъасда мислягьаIт къооджи вобна. Манчиле савагьийда мани хивни джаванарше юххьан гидгъылийква КьыIджал донани сувалхъа, ивийкарна йаIхъ ремонт гьавъу ва махъа ишыгъен диракбы, бадалаъу.
Гьайни йигъбышее хивни джаванарше мани сувал’ чобанар аахван хав ремонт гьаъу. Махъа лазымын материал аIмалершиква гьаххъы ва мани хавын даха ва диварбы тезелемишаъу.
Манбышди увгьойква, ман чобанаршин хав аляъуйле хъийгъа ремонт гьаъу дешдий ва мумкум вобний манчин диварбы отIкIул авур инсан ахвас. ГьаIшде мааъаб сувалхъа кокаъас хъыкийн малбишкан чобанаршис гёгъийке, кулякыке ва шейике къорху дешда.
Мишлешни джаIмаъатын садджу къышлагъбышее джад деш хивни аIредын ишбы къаджесын имааджийбыд гьаъанбы. Манбыше гьайни уIл’джумее Султан шейх — Эмирни зияратын даха краскIаламишаъу ва ман уфтан хъау.
Хивее къеджени ишбышин хаIддананбы хивни администрациейна хааIрна Ислам Ибрагьимове тешкиляъа ва мани ишее манкъус хивни джаванарше хаIдын кумаг гьели водун.
Гьелбетти манбыше ман ишбы хивни агъсаххъаларшика мислягьаIт гьавъу гьаъа водонбы, ва манбышин сабарабы мани ишбышис къошилмишеебахьенбы.
Гьар хивын ярашугъ джаIмаъат, манбышин мигьманар къаршыламишавъуй, уфтанын хайбы, темизин кучебы ва хааIрна — кIынна ацIахай водон. Ман гыргын карбы Мишлешни хивее водонбы.
Мишлешни хивыс Э. Лачинове уфтанна шечI къабсыр.
Мишлешна хив
Сура гунайл’на, сура къузайл’на
Самур дамайн кьоIна къавъуна
Са джигеехъа йигъаIрше савъуна
Уфтанна Мишлешна хив.
Йанак’ ахтын сувабы,
ЧIалагбы, дерабы, тепабы,
ТIуджвайна цIахьинне йыIкьнее,
Уфтанна Мишлешна хив.
