Гьар сен февральни 21-чил’ йишди дюнйейл’ни хаIдданани оIкабышее ед’ни мизен йигъ алгъайгьи. Мани йигъыл республикайни майданбышее, хъаIдхъийни ташкилатбышее, мактаббышее ед’ни мизяршика ва адабиятыква алаакьан конкурсбы, маджлисбы, тамашебы илгъечIи. ЦIаIхни миллетни «Нур» кIазетыныд ман аIдатбы гьувадженбы.
Сенис цIаIхбышди мактаббышее профессор Ибрагьимов Гьарун Халил’ни духайни доюлин конкурс алгъайгьи. Са сен Сувал’ни маIгьалыл’ни мактаббышее алгъайгьи, кьоIдъэсди сен Бабаюртни районеени, Кизилюртни ТУНО эчIуйни цIаIхбышди мактаббышее алгъайгьи. Гьайни сен, эле гьамаани Калел’ни йыIкьнекни мактабее алгъавгьу.
Нени къайдайлий, нени усулбышиквайий конкурс алгъагьас, ши «Нур» кIазетее гьихъа-гьихъа чапауйн. Манчиле гъайре, телефонеенче мани мактаббышди директораршиква, едини мизелин дарсбы гьелени маъаIллимаршиква ши мислягьаIтбы къаджейнбы.
Гивхьуйни вахтал’, саъаIт 10-чис конкурсее иштыракаъас Калел’ни, Теземуслагъни, Камбулатни йыIкьнекни мактаббышин шигыртар джони маъаIллимаршиква абы гьибхьырийнбы. Гьамани вахтасыб ши, «Нур» кIазетын журналистар, кьома хааIрни редакторыква Байрам АIбдуллаевыква данышмишивхьайни джигеехъа гьибхьырийнбы.
Калелин йыIкьнекин мактаб конкурс алгъагьас гьазирдайий. Конкурс гигъалассе гьихъа кIыл’на маджлис вухьа. Мактабни директоре Фергьад АIлиеве абыйн мигьманар, маъаIллимар, шигыртар саламыква къаршламишавъу ва гыргынкъус угъурбы арзуламишаы. Гойне чыхыш «Нур» кIазетни хааIрни редакторе Б. АIбдуллаеве гьаы: «Ши къийна абыйнбы шосаххъа югни хабарбышиква. ЦIебба, гыргын маъаIллимар, ушахар едини мизяаршини йигъыква табрикааъа. Алгъайгьен конкурс профессор Гьарун Ибрагьимовни доюлин водун. Ман гьар сен ши алгъайгьен. Манчика ши едини мизяаршина вааджибийвалла ва лазымийвалла гьаагва. Югун натийджебы гьагуйни ушахаршис грамотабы, пайбы гьелес. Шос угъурбы аIрзуламишаъа!»
Мани табрик чыхышбышиле хъийгъа, Кьурбан Омаханове конкурсее иштыракаъас абыйнбы шигыртар манчини усулбышиква танышавъу.
Гьайни элейсын конкурс медни форматыква алгъавгьу. Манбы кьоIни дестейлхъа джуравъу — са дагъайдни сыныфбышда (1-4) десте, сайиб чIакIни сыныфбышдайий маъаIллимаршина десте.
Манбышин тапширыгъбыд джурайнбы ыхьа. Дагъайдни сыныфбышди ушахарше конкурсее цIаIхбышди шааираршин шечIбы йикIеке хъаIдхъы, китабеенче друстда адабиятни мизел’ одкIунийн текст хъаIдхъы, суалбышис джаваббы хъувы. Ушахаршин джаваббы ашкарда ёхламишаъасдимее ёкьни маъаIллимыкван жюри къурмишау. Манбышди гьаарункъве джурайба гьаарни шигыртыни джаваббышис кьийматбы гиххьы. Кьийматбы балбышди къайдайл’ гиххьы. Гойне манбы гыргыда саджигеехъа саъы, шигыртыни ацIаалис, гьаIракатыс гёохьана кьиймат гьувы. Ман гыргын ишбы ашкарда, темизда илгъечIу. Акьва-хатир гьаъасда мункум мааъаб шавухъаб джаб вухьа деш. ГьаIкIебаб конкурсее югун ацIаал’нан ушахар гъамувхьа.
Кьоманче кIаняхъамее мана маджлис камереехъа ГТРК «Дагъыстан» канални цIаIхбышин теле-радио верлишбы ыккеккани журналисте Юсуф Бабаеве цIыIцавъу.
Гьайни элейс угъурбы гьайни шигыртаршини сурал’ ыхьа:
1 джига – Къараева Тамам
(Калелин мактаб, 4 сыныф);
2 джига – Кьурбанова Асият
(Калелин мактаб, 4 сыныф);
2 джига — Рамазанова Джамиля
(Калелин мактаб, 4 сыныф);
3 джига – АIгьмадов УIмар
(Теземуслагъын мактаб, 1 сыныф);
3 джига — Мамедов Саид
(Камбулатын мактаб, 4 сыныф).
Гьайни элейс, иштырак конкурсее гьаъанбышди аIрее, лапджаб хаIбба ушахар Калел’ни мактабынбы вухьа. Манчихъа гора ман конкурс цIыцIахьайн. Конкурсын екунбы мактабни айванее алгъавгьу. Махъа гыргын мактабын ушахар, абыйн маъаIллимар сабы ва кIыл’на маджлис вухьа.
«Нур» казетни хааIрни редакторе Б. АIбдуллаеве, Калел’ни мактабни директоре Ф. АIлиеве, Теземуслагъни мактабни директоре С. Наврузове конкурсее гъамувхьайни ушахаршис пайис китаббы, пылыкван кIанвертбы, дипломбы гьувы. Мани конкурсна спонсор ишкар П. А. Высоцкий ыхьа.
Югба иш къурмишавъуйхъа гора мактаббышди директораршис, сабара маъаIллимаршис «Нур» кIазетни доюле грамотабы гьувы.
Манчиле хъийгъа, мактабни хаIдни утагъее чIакIни сыныфни шигыртарше, мактабни маъаIллимарше тотальный диктант одкIун. Ман манбышис Калел’ни йыIкьнекни мактабни цIаIхни мизени маъаIллиме Гуляра Аслановае хъаIдхъы. Диктантын до «Йишда Ватан» ыхьа. Гьайни дёлесийвале ши ман диктант ёхламишаъасын. Ненкъусый ваацIавхьес вуккан джуна едини мизекена ацIаал’, ман шаке хусусыда эгьес аIхасын.
Маджлис таамувхьайле хъийгъа, саджигеедын шикыл’бы цIыцIаъы.
Йишин аIдатбы гьуваджи, Калел’ни мактабни маъаIллимарше абыйн мигьманарши, ушахаршис миллетын хорагбы охьанас гиххьы. Ши манбышикIле заIгьматбы гьаъыва сагъул-варул эйгьи.
