Ноябрьни 13-чил’ МагьаIчкъале, Урус театре дагъыстанни халкьни шааирни МаIгьаммад АIгьмадони 70 сенни юбилейис къабсырна хаIбна маджлис вухьа.
М. АIгьмадов раIгьматыххъа 2023 сенни февральни 21-чил’ аркIын. Манкъуна ыIмыр, шааирна йаIхъ, одкIунийн асарбы йикIел’хъаляаъас джун гогьарбы, республикайн чIакIын къуллухчера, кьаламын гьамбазар: шааирар, язычер , адабиятчер, публицистар,тарджумачер, журналистар, адабиятын ва М. АIгьмадовни поэзиейн гьаваскарар сабы. Шааирни рыIгьыс хабар гьевлес Урсиятни вилаетбышиле ва Къузайни Кавказни республикIабышиле джун кьаламын гьамбазар, саджигее хъаIдхъийн шааирар абы.
АIгьмадов МаIгьаммад АIгьмадна дих 1955-ъэсди сенни ноябрьни 13-чил Дагъыстанни Гунибни районни Гонодайни хивее едике ыхьа. М. АIгьмадове Максим Горькийни дойилин МаскIавын адабиятын институт таамаъы. Мана дойиквана шааир, тарджумачий, адабиятна тенкьитчий, публицист ыхьа. Мана 1984-ъэсди сенике СССР-ни язычершини Союзна уIзвы , 2018 сенике Россиейни язычершини Союзна каатиб ыхьа. 2004-2023 сенбышее Дагъыстан Республикайни язычершини Союзна садры ыхьа.2005 сен даъыстанни халкьынии шааирна дараджа гьувы.
Манкъвее джун асарбы аварни ва урусни мизяаршил одкIун. Аварбышди мизелхъа урусаршини, хаариджий, дагъыстанни адабиятни классикаршин асарбы сакIалаъы. М. АIгьмадов чIакIни адабиятни мукафатбышда лауреат ыхьа. Манкъун цIеддыйн китаб « ХаIмдийн кагъызбы» ( «Ночные письма» ) 1979 сен чапыке хъигъечIу.
Маджлис М. АIгьмадове обкIунни шечIиква маIъний гьааъа МаIгьаммадамир Синдикьове ачухавъу. Гойне маджлис вуккеканкъвее РФ-ни Президентни аппаратенче къахувына телеграмма хъабхъы.
Маджлисе аIтрафлы чыхышбы оIтмишхьайни сенбышее республикайс регьберийвалла гьавъуйни Муху Алиевейий Рамазан АIбдулатипове гьаъы. Манбыше М. АIгьмадовни асарбышис ахтына кьиймат гьувы ва манчин анализ гьаъы. Шааирни ыIмрени ва хасиятбышди гьаIкIее агъмишаъы ва гьиджо хайирый республикайс гьувова увгьы.
М. АIгьмадовни гьаIкIеедын чыхышбы ва манкъвее одкIунийн шечIбы джуни кьаламни достарше хъаIдхъы. Манкъуна джегьилийвалла йикIел’хъавалявъу. РФ-ни язычершини садрее НикIалай Иванове шечIни къайдайл’ раIгьматтыгъ МаIгьаммад АIгьмадовни дойилхъа одкIунийн кагъыз хъаIдхъы.
Югун чыхышбы Къузайни Кавказни республикабышди язычершини Союзбышди садрыбыше гьаъы. Манбы зараба-зараба адабиятыква багълыданани маджлисбышее сана-санкъука хъызааха вухьа.
Маджлисее дагъыстанни эстрадайни артистарше М. АIгьмадове одкIунни шечIбышикван маIънийбы хъаIдхъы.
Маджлисеехъа абыйни мигьманаршис, кагъызбы ва телеграммабы оIтираъыйни инсанаршикIле сагъул-варул эйгьен чыхыш, шааирни дихе Мурад АIгьмадове гьаъы.
М. АIгьмадове югун из цIаIхни адабиятейид гьадсырыйн. Манкъуни мислягьаIтыква ва регьберийваликва Дагъыстанни язычершини Союзее ЦIаIхни адабиятын секцие ачмишаъы. Манкъуни мислягьаIтыква хьебыйре цIаIхбышин шааирарый язычер РФ-ни язычершини Союзеехъа кьабылявъу. Эгьес эйхьи , хаIдни дюнйейни аIдабиятеехъана йишди миллетна адабиятна джигъыр , ишыгъ манкъвее ачмишаъа.
М. АIгьамадове гьар адабиятни маджлисбышее йишди миллетни язычершини ва джо одкIунни китаббышди гьаIкIее агъмишаъанний. МаIгьаб йишди шааираршини, язычершини асарбышиква менни миллетбышин адабиятын гьаваскарар, устадар, шааирар, язычер, сакIалчера танышивхьа. Йишди шааираршин асарбы менни мизяаршилхъа сакIалаъа гибгъыл, манчис ахтыйна кьиймат гьувы. Къийна йишди миллетын адабият , дюнйейни миллетбышди адабиятбышиква са джаргее водун. Йишди шааираршини китаббыше джурабаджур республикайни, гьоIкуматни, хаариджий китаббышди гьагуйбышее иштыракаъа ва чIакIни китабханабышее водунбы.
Йишди шааираршин асарбы Россиейни, Къузайни Кавказни ва республике чапыке къайиккыйни адабиятни антологиебышеехъа гядкIу водунбы. Гьелбедти, мана миллетнимее хаIбна иш вобна. Мысаджад йишди миллетни таарыхее адабият манимеега гьихъа адкIынийн деш. Амма къийна шаке эгьес аIхасын : « 30 сенни аIрее ши цIаIхын адабият фольклорылейий аIшукьаршини поэзиейле классик адабиятылхъа къалхымишаъы». Гьелбедти, гьале ман чини къайдайлхъа гьихьараъасдимее хаIбба иш къавджес вуккан. Манаб йыIкьале хъооIни архайке аIслыда водун. Адабият- миллетна къийнийна сифат ва къийхъийн таарых водун. Адабиятна лампа гьаммаше хъибхьу вухьес вуккан.
М. АIгьмадовни ниятее ыхьайни ЦIаIхни дерайлхъа гьаркIыний ва мааъаб адабиятна маджлис алгъавгьуй, анджах аIджалын мана иш гьааъас имкан гьувы деш.
Ши шааир М. АIгьмадовыла раIгьмат къухооли. Йигъын гьаIракатбы цIаIхни адабиятни сардан къаджейн, ши кIелиханаъас деш.
