Джегьил’на игитийвалла Ватан дареенанкъаI ваацIохьи. Инсанаршихъад джурабы водунбы — сабы оIгунбышеебахьенбы, шенсанбыше вукIул’ кIебчу ишбы къеджи. ХааIрра ющенаъани, вуджееджар вудж оIгунмишаъани инсанылхъа ыIгьтибар гьимаъа. Дюнйе бадалхьамее, манбышда либасыб, хасиятыд игъийкIаланбы.
Къийнийни йизди макьалейна кьаIгьраман Ватаныс, миллетис, хизаныс джан гийхьена, архайнда далбы хъадчес аIхасда джегьил’ КIамазов Саакит ГьаIджиэфендийна дих ворна. Деккее- ГьаIджиэфендий чоджее, едее — Ханум баджее гьувойн гьалалын къык, темизин тербие, ватанылхъан аIшкь манкъвее мыкIык авхъа гьувы деш.
Йишди гьIокуматын Украине СВО алгъайгьен хьебыдъэсын сен аIлгьаа водун. Манчина сабабыб шакIле ваацIана, нишихъа горайий ман гидгъыл. Къийна йишди гьоIкуматын ихтиярбы, вар-девлет’ гьайни дюнйейл’ гьуваджесдимее ши маджбырба вобунбы Украинее Америкайкайий Авропайква вурушмишивхьес. Садджу манбы шаква джони ярахыква ва укранацистаршиква вурушмишоохьи вобунбы. Мани даIвъийни цIайее, гьел’бедти, тахсирдешин инсанарыб гьабатIа вобунбы.
2022 сенни цывлихъа йишди гьоIкуматыл’ мобилизацие гидгъыл. Украинее аIлгъани СВО-хъа кумагыс сабара военный санаъаIт водун джегьилера хъобтIул. Манбышди аIрее цIаIхбыб кIылба дешобунбы. Мани вахтни аIрее йишди джегьилерше джо гьаIкIен адамер хьинне гьаагу. Гьелбедти, манбышди аIрее Ватаныс джан гьувы шагьидар хьинне гьабтIуйнбыб вухьайнбы. Джос дженнет, деккяршисый едяршис сабыр Аллагье гьелен. МаIгьдын гьааIдисабы аIхреедынбы ихьенбы.
Сакит КIамазов СВО-хъа 2022 сенни октябрьни вуза аркIын. Мана Каспийскни флотилиейна морской пехотинец ворна. Манче мана эскераршини дестейква СВО иштыракаъас манкийни Украинайни Донецкни республикеехъа оIтираъы. Къийна Донецкын, Луганскын республикабы ва Херсонын, Запорожьейн вилаетбы Россиейни таркибеехъа джони гьавасыква эчIу водунбы. Сааките джуни эскер гьамбазаршиква Донецкна республика укранацистаршике къорамишааъа вобна. Манкъуква саджигее эскерна къуллух йишди миллетын духйерше АIлий Сулейманове, Азан АIшураIлиеве ( ЦIаIхни хивеенченбы), МагьаIммад Къубалыеве (Мишлешни хивеенчена), Мурад Баширове ( Муслагъни хивеенчена) гьааъа вобна. Къийна манбы са хизанын чоджархьинне сана-санкъука вуккекка. Сана-санкъун далбы душманыке къорамишаъа.
Гьайни йигъбышее 15 йигъыйн истирагьаIт гьаъас джуни хизанеехъа Саакит КIамазов хъары. Мана декке едее, гогьарбыше, достарше хивни джамаъаIтын майдама накьра-зурнайква кьаIгьраман хьинне къаршламишаъы. Гьайин манкъун кьоIдъэсын отпуск водун.
Саакитни увгьойква, вазият гьар фронтее са къайдайл’ вобна. Гагьани джигее йишинбы гьихъа аIлгьаа вобунбы. Укранацистаршике хивар, шагьарбы азадаъа. Сабара участокбышее мудафие авхъу илёбзур вобунбы. ГьуIджумыква хъооIна душманаршина къошун гьаIлакаъана. ГьаIшдийни даIвъийна аIсас душман-эскер хаIйбышее учмишехьен дронбы водунбы. Манчин хаIбба инсанар гьаIлакааъа, манчихъа гора аIгьтият манчикена къооджи.
— Шахъаб одхьунийкена, аляуйкена, ярахыкена, техникайкена, янаджагъыкена кесетийвалла ва дагъамийвалла дешда. Лазымын кар вахтал’ позициебышилхъа гьихьараъан. Агар яраламишхьана, чIырыхъихьана эскер ыхьее, вахтал’ госпиталеехъа гьихьараъана. Шакасана военный фельшер гьаммаше эхьена. ОфицераршикIле джона иш лап югба ваацIана. Шинад йишди гъамувхьайлхъа инам гьаъан. Ши гьааъана иш хъобкуна вобна, манчихъа гора шинаб нацистаршиле гъамувхьесынбы. Гыргын эскерар, офицерар утIумни инамыква вобунбы. Джанэъаб къорху дешда. Вахтал’ йишди карточкабышилхъа шас гехьан доннух хъадайлен. Манчилеб ши разийба вобунбы. Анджах ман ( пыл) ыIмрее аIсас кар дешёдун. Эн аIсас кар водун- джанана сагъвалла. Зас гьаман эгьес ыккан : цIеддыйке, гыргынкъус шадна, саакитна ыIмыр, ачухын лагарын хаIйбы аIрзуламишаъа; кьоIдъэс, ши йишди дидерше нацистаршиква, фашистаршиква вуккуна даIвъий таамаъа вобна; хьебыдъэсыд, ши йыIкьале хъооIни архайс баракатыквана ыIмыр аIрзуламиашааъа. Гьасре манбыше йишди баба — дидершин аIдатбы, едина миз гьувааджеджин. ШакIле къаджейн ярахын сес, манбышикIле не къидеджен , не къидийххьен. ЧIакIынбышихъа кIырыгяххъас ыккан, манбышда гьоIрмат гьувааджес вуккан, терсинани ишбышике , йаIхъбышике, гьаIракатбышике аIгьтият гьуваджес вуккан., — Сааките шакани гафее увгьу.
Шинаб Саакитни джуваббышиква ваIш фааизна разийба вобунбы. ДаIвъий таамувхьена. Азгъунувхьайн инсанар инсафеехъа хъавайленбы. Гыргын духйе, ишбы джони деккяршисахъа, едяаршисахъа сагъба-саламатба хъаваленбы. Саакит хьиннен джегьилера вобнанкъаI, шахъаб къийхъийни йигъылхъана умуд вобна. Ааферин, джегьилер!
