Гьайни йигъбышее Россиейни Федерациейни Федерални къуллухни милли гвардиейни къошунбышди чIакIынбышди амрука прапорщик ГьаIджиев Юзбег МаIгьаммадрасулна дих «За отличие в службе I степени» медалыс лайикьра къаджы.

Ю. ГьаIджиев 1975 сен Джинагъни хивее едике ыхьа. Мана хизане ушахаршини арее хааIрна ыхьа, манчини аллад джегьиликIле заIгьматна кьиймат кIыл’валике джаб ваацIавхьана. Мактаб таамауйнчиле хъийгъа, Юзбег йицIыдле сенна Дагъыстан Республикайни МЧС-ее радиостанциейни хаIрынкъуни къуллухыл’ ишлемишхьа. 2004 сенике манкъве джуна ыIмыр эскерни саIнаъатыс къабсыр. Ватаныс къуллухааъани къани сенее манкъве МаIгьачкъалэ еррашмишхьайни бригадайни таркибеени эскерни частьбышди камандираршини ва гьамбазаршини гьийб хаIбна гьуIрмат къазанмишавъу. Мани сабабыхъа горад, Юзбегилхъа манбыше джурбаджурни къуллухбышил’ ишлемишхьес ыIгьтибарау.
2008 сен Ю. ГьаIджиев Ростовни шагьарейхъа прапорщикаршини мактабе хъаIдхъас къахову. Ман мактаб угъадука быкырауйле хъийгъа, мана в\ч 6752 ротайни старшинайни къуллыхылхъа гиххьы. 2011 сениле 2021 сенилхъаме Юзбег мааъар палтарни искаладна хааIрна ыхьа. Гойне джанани вазиятыка алакьара манкъве аIрза обкIун частьни камандирни ыIгьтеехъа илгъечIу.
Юзбег ГьаIджиев чеченни гьадисабышда иштыракчий ворна. МанкъукIле мааъаб ыIмырна кьадир ваацIавхьа, няъас увгьее мана хаIдданани йигъ-ешбышеенче илгъечIу. Манкъуни джуваббышихъа гора,адамийкIле ыIмрее гыргын къаджес ыккан.
Юзбег хьебни ушахна дек’ ворна. Манкъве ыIмырна ёлдаш Хадиджатыка игит джегьилер чIакIы хъавъу, манбышис лайикьыкван тербие ва хъаIдхъый гьуво. Декий ед’ ушахаршиле гуянмишоохьи вобунбы, ушахаршед джо хъобкуни ыIмырни йаIххъылхъа гявгьуйс, гьалалын къык гьувойс миннатдарийвалла агъмишааъа.
Шинад Юзбег ГьаIджиев гьавъуйни заIгьматыс гьувойни медалыка табрикаъа ва геледжагыл’ тезе угъурбы аIрзуламишаъа!