Гьар сен, октябрьни санчил’, Дюнйейл’ кьаIсинбышин Йигъ алгъайгьи.
КьаIсин инсанар хавна, хизанна, хивна баракат вобна. Манбышди гьалалыйвалике, каамил’ни ихтелетике духйебышди, йишбышди, невабышди ыlмрен накьыш аlслыда. Тохумена, насылна гьуlрматий дараджа джони кьаlсинбышди гьаlракатбышике ва къеджени хайир ишбышике аlслыба. Неджодти вааджибын ишбы къаджессе гьихъа, цlедта мислягьаlтбы, йишди дагъыстанни миллетин, кьаlсди агъсаххъаларшика гьаъа. Гьел’бедти, цlаlхбыб мани сыранеехъа гябакlа.
КьаIс’валла ыIмрен екунбы гьааъана девыр вобна. КьаIсда инсан ыIмыр къавджена инсан ворна. ЫIмрее джурабаджур югун-писин гьаадисабы эйхьи. Мана манчина шагьад ворна. КьаIсда инсан каамил’ра эйхьи. Манкъве ыIмрее эхьени саIгьвбышике къорамишааъа.
Оlгийл’ гьар хивыхаб чина гимга вухьа. Гимгайн ярашугъ кьаlсинбы вухьа. Сасса вахтал’ хивыс ааидын суалбы гимгее гьаlллаъа ыхьа. Хивеехъа арына мигьман цlерра гимгехъа салам гьевлес кьаlсинбышисахъа хъарайли ыхьа.
Дагъыстане кьаIсинбышда гьуIрмат гьаммаше ахтывале вухьа. Къийнад ман югун аIдат мейид водун. Шинад, цIаIхбышед ешли инсанаршин джуваб оIгиилид, гьаIшдед дараджайка гьуваджи. Са хаIбна иш гьааъассе гьихъа, цIебба мислягьаIт кьаIсинбышиква гьааъа. Дават-давлатее, суннате, доъаIнани джиге, медни хайир ишбыше манбы гьийдни джаргабише водунбы. КьаIсинкъун джуваб мысаджад къел’бышике авхъа гьувойн деш. Умыд гьааъана геледжагъылид гьаIмагьад ихьес.
ОIгее шахъад аIдатний водун чубара хизанеенче джуроохьенкъаI, кьаIсин едий дек’ кIыл’ни духайквани аахванбы. Деккин хавыд манкъусний ахван. ГьаIшде гыргынанкъаI, ман аIдат аху дешодун. Сабара хизанбышее кьаIсинбы текба аахва. Ушахар гьаар суралхъа дагъылмишивхьа авайкIананбы. ГьаIмагьабна вазият гьаIшде Сувал’ни маIгьалыл’ яратмишивхьа вобна. Садджу инсанарджаб деш, маадын хиваарыд кьаIс’хъыхьа. Сасса хиварджад сувал’ аху деш. Мани сабабыхъа гора, мааъаб ешемишебаххьен кьаIсин инсанарыб шагьареехъа кочмишоохье. Сувабышике манбы джуравъуйнкъаI, джанана тавуб бадалоохьена. Манбышди йикIее пчат хьинне джона ыIмыр абкIынийн джига ахва. Шагьареехъа кочмишивхьайн кьаIсинбы сенис цIыцIоохьенбы ейлягъыс хиваршеехъа аIлгьаас. Ненкъухъабый кьаIсин инсанар, манбышикIле манн кар ацIа водун.
Анджах гьайни сен инсанаршилхъа югда хъады деш. Ман дюнйейлхъа еймишивхьайни чIырываликва коронавирусыква багълыда ыхьа. Эн хаIдын зиян мани азарыке кьаIсди инсанаршис хъетIу. Къийнад манбы джамаъаIтын эн бошен джига водун.
Телевизоренче сасса вахтал’ кьаIсинбышди гьаIкIеедын верлишбы гьагванкъаI, йикI дарыхмишаъа гийгъал. Джанани ушахарше манбы хаанче хъыгъааъа, гёотанбы, манбышике сихбы гьаъа, кьаIсибышди хаахъа хъооли. Дора гьалеки манбышди сагъвалее джон йикIбы шадаъас, манбышил’ мугъаетувхьес. Шинаб манбышди дараджайлхъа хъавалесынбы. Гыргынкъус шадна, саакитна, баракайкана кьаIс’валла аIрзуламишааъа!
Кьаlсинбышда гьалалыйвалла девхьее, ши къыкынбы, гуртынбы вухьес деш. Эн писин кар, деккинайий едина гьалалыйвалла девхьай водун.
«Нур» кIазетни редакциейн цIаIхбышин дидера, адера джони Йигъыква табрикааъа! Джанас сагъвалла , йикIес сабырбы аIрзуламишаъа.
