Россиейл’ санаъаlтбышиква багълыдани байрамбышди аlрайл’ сайид маъаlллимаршин йигъ водун. Мани байрамыхъад хаlдын таарых водун. Ман цlедда 1966-ъэсди сен Париж илгъечlуйни маъаlллимаршини конференциее тасдикь гьау. Аlрейнче хаlдда сенбы адкlынейид, къийнад маъаlллимаршин йигъ хаlдни тентейква гьаъан аlдат аху водун.
Россиейл’ ман йигъ октябрьни цlеддийни базарни йигъыл’ алгъайгьи. Мани йигъыл’ мактабейхъа хъавайлени ушахарше, аали мактаббышее хъаlдаххъани телебабыше джос дарс гьелен маъаlлимар табрик гьааъа. Мактаббышее манчис къадсырийн джурабаджура тадбырбы, йигъынджахбы, концертбы гьаъа.
Цlаlхбышди миллетыхъад гьаммаше мани санаъаlтыс къуллух гьавъуйн югун доюкан маъаlллимар вухьайнбы. Гьийдни сенбышее маъаlллимийвалла цlаlхбышди арайл’ доюкан санаъаlт ыхьа. Аlхирейни сенбышее мани сардан хаlдда бадалхьайбы ыхьа. Къийна тека-сейрак инсанее маъаlллимна пеше сечмишааъа. Гьаlшде геллесда дохтурун санаъаlт алятlас чалышмишехьа. Манчихъа ил’дяакы, джаванаршини аlрайл’ мани санаъаlтылхъа аlшкь гьагванбыб растына хъавайленбы.
Дадашев Ил’гарыхъад мани санаъаlтылхъан гьавас кlыл’валике гидгъыл. Дек’ маъаlллим ыхьайхъа гора, манкъве ушахарыб мани санаъаlтынбы гьааъас чалышмишхьа. Къийна Ил’гар Россиейни энки акьаlнани Ханты-Мансийскни автономный округни Лангепасни шагьарее 3 № лицее ишлемишехьи ворна.
Ил’гар 1992-ъэсди сен Гыл’мецlни хивее едике ыхьа. Манкъве 2009-ъэсди сен хивын мактаб таамау, геледжагъысын санаъаlт алятlасдимее Волгоградни шагьарейхъа йаlхъ авхъу. Мааъад санаъаlтбы шагьарни 34№ училищейхъа хъуво. Училищее автослесарын санаъаlт алятlуйле хъийгъа, ишлемишхьес Сургутни шагьарейхъа аркlын. Хъаlдхъыйлхъан маарах хаlдын ыхьайхъа гора, манкъве гьини элеес санаъаlтбы Сургутни девлетни университетейхъа хъуво. Мани сен манкъус аали мактабее хъаlдхъас кьисмат дехьайн. Лазымын мееган баллбы сидяуйхъа гора, мана университетейхъа ил’дяртlына. Вахт бейкараба идякlанаъасдимее, мана ишилхъа иккечlу. Манчика саджигее гуджанара имтагьаlнбышис гьаlзирехьи гиргъыл’.
2012-ъэсди сен Ил’гар джуни мурадалхъа гьирхьыл’на. Мана университетни таарыхни факультетейхъа кьабыл’хьа. 2012-ъэсди сен факультет таамау. Гьаманиджад сен манкъве санаъаlтбы магистратурейхъа хъуво. 2018-ъэсди сен югни кьийматбышика маныд быкырау, диплом алябтlу.
Ил’гар Лангепасни шагьарее ишлемишехьи гиргъыл’на хаlдда сенбы дешинбы. Амма манчихъа ил’дяакы, манкъве мактабее джун гьунар, ацlаал’ гьагуйн. Къийна манкъухъад хаlдда мактабни, шагьарни хъаlдхъыйни управлениейни сураке алятlуйн грамотабыйий мукафатбы водунбы. Джаван маъаlллимни баджарыхыс макатабни коллективын ахтына кьиймат гьооли вобна.
Къийна манкъвее таарыхыква саджигее ушахаршис алава обществознаниейн, шахматын дарсыбыд гьели водун. Манкъве гьаlзиравъуйни щыгыртарше, шахматистарше шагьарее илгъаlни джурабаджура олимпиадабыше, горушбышее югун джигабы аляатlа. Манкъухъад шечIбы ойкIанан талантыд водун.
Ил’гар гьамыр геер ватанпарвар инсан ыхьай, закlле манкъукани горушее ацlахьа. Мана едике ыхьайни хивыке нимее акьаlна ыхьейир, ватан кlеливханааъа деш. Гьар сен вахт тlабалавъу, деккисыхъайий едисхъа арайли. Гьайни сен манкъунимее геед угъатукан хъады. Ил’гарее цlаlхбышди аlдатыква уфтанна хизан къурмишавъу.
Манкъве заквани горушее увгьойн: «Зы сечмишауйни санаъаlтыле геер разийра ворна. Маъаlллимийвалла йизди ыlмрена йаlхъ вобна. Чалышмишхьесда мани санаъаlтылхъан гьавас, аlшкь гьаммаше ахтывалей гьуваджес.
«Нур» кlазетни редакциейн гыргын йишин маъаlллимар джони аlзизни байрамыква табрикааъа. Манбышис угъурбыйий джанана сагъвалла аlрзааъа.
