Камбулат Бабаюртни районеена Рутул районна хив вобна. Мани хивее Сувал’ни маIгьалыле кочмишхьайн МуIхахыний КIуссурын джаIмаъат ешемишехьи.
МуIхахбы цаIхбы вобунбы, куссурбы – аварбы. ГьаIшде манбы сана-санбышиква са хивын джамаъаIт хьинне ешемишехьи. Мааъаб ешемишоохьени цIаIхбышикIле аварна миз’ ваацIа, аварбышикIле цIаIхна миз’. Югни писди йиъыл’ манбыше сана-санкъус мыга гьооли.
Сабара йигъбына гьихъа йишда сафарий Бабаюртни районеени цIаIхбы ешемишоохьени бинабышилхъа вухьа.
Камбулат федерал поштини йаIххъыс делесна цIеббыйна хив вобна. Манчихъа гора, ши, «Нур» кIазетын журналистар йишди санаъаIтна иш гьааъа манче гибгъыл. ЦIебба ши мактабеехъа йаIхъ авхъу. Урусаршихъаб мисала вобна: « Театр начинается с вешалки». Йишдаб ул’ цIебба мактабысахъа аIлгьаани поштини йаIххъылхъа хъабы. Манчиныб ши матавъу деш. Мани йаIххъыл къубий-къандах, голера, баттагъ къадже. Хивна либас йаIхъ-кьыIтикеб аIслыба . Хивни администрациейни хааIрункъве, мактабни директоре, Къизилюртни ТУО-йн манчилхъа фыкыр гьувее югда ихьес.
Камбулатни мактабна директор Рамазан маъаIллим мани йигъыл’ мактабее шасахъа авайкы деш. Мана мактабни ишбышди гьаIкIее МаIгьачкъалеехъайий гьаркIын. Ши мактабни маъаIллимаршиква, ишчершиква, цIаIхни мизен дарсбы гьелени Валий маъаIллимыква горушмишивхьа.
«Нур» кIазетнна редактор Байрам АIбдуллаев манбышиквани горушее наIгьадый агьаалий сиягьеехъа алебатIана ишиква, вакцинациейква марахламишхьа.
Мактабни завучни ГьуIсейн маъаIллимни увгьойка, гыргын ман ишбы пIланыква аIлгъаа водунбы. Манкъуни джуваббышихъа гора, сабара вахтна гьихъа МаIгьачкъалайни 51№ мактабе вухьайни гьааIдисайле хъийгъа , ёхламабы хаIдхъыхьа. Ушахаршис тербие гьелен лекциебы хъаIдхъас Къизилюртни ТУО-йн инспекторар, методистар, полициейн ишчера абайли. Йигъыс зенгбы гьаъа. Иш гьалеб хаIбхъувхьа.
Сен-сениле хив хъаIбхъоохьи вухьейиб, Камбулатыхъад аIдатый, гьаIшдийн тIабалбы гозетяъан мактаб дешин. Ушахаршис дарсбы йиссейни, даркашни, мыкIани гозеерше алгъайгьи. Гьел’бедти, мактабын регьберар чалышмишоохьенбы шарааитбы яратмишаъас, анджах гьоIкуматын кумагдена, мана дагъамийвалла гьаIллааъас вааIхас деш. Камбулатыс тезе аIдатый мактаб аляъас ыккан. Анджах гьалекийс манчеехъа вукIул’ абадчена дешда.
КьоIбъэсда дагъамийвалла мактабее цIаIхни, аварни мизекен тезе китаббы дехьай вобна. ГьаIшдеб йиссейни китаббышиква дарсбы аIлгъаа, йиджбыд къийхьар деш.
Хьебыдъэсда гьаIллааъас дяаIхана дагъамийвалла, мактабни автобусыква багълыбанана вобна. Ушахаршини деккяршейий едяарше шикаятбы гьаъа, автобусыква ушахар тIашмишааъа деш. Манчини кокалхъа ши гьибхьырийнбы. Мактабыс тезе автобус гьувона, анджах мана ивийкарааъасдимее са букум кагъызбышин саъас ыккан ва медын ишбы гьаъас ыккан. Манбыд гьаъас имкан гьооли деш. Автобус ивийкараъасдимее цIедда бензин ыккан, йигъыс ГИБДД-че путевка алебтIас вуккан, йигъыс рулилхъа гюъарассе гьихъа шофирна джанана давление, температура ёхламишаъас вуккан. Дохтурыкен справка ыккан. Ман гыргын ишбыд районни марказе гьаIаллаъа. ДжитIада, гыргын ишбы йыIкьале гьихъа гьаъа. АIрее ушахар пиядаба ивийкар, мактабни директорыныд ишбы ичIокIанаъа.
Агар мактабыс программайква гьувохье автобус, чисын бензиныд, докуменбыд гьелес ыккан. Дешхье нишисданнане мактабни маIгьалле илёозаравъуна мана «йивана къала»?
КьоIдле сен водун мактабни маIгьалле спортзал аляъан. Манчин баругбы къалхымишауйнбы, анджах адын ишбы гьаъасын имканбы дена авхуйнбы. Маныд хивни джегьилершини заIгьматбышиква, харджийбышиква аляу. Абыйни районни къуллухчерше, джурабаджур чиновникарше, ишкарарше джуваббы гьеленбы кумаг гьаъасынва, анджах абкIынмее гыргын кIелийханан.
Ши шадавъуйнбы Камбулатни хивни манзикын. Гьар элейс ши вуIххъасе мааъад тезе-тезе шарааитбы къурмишау къеджи. Манзикни маIгьалле тIаарат гьаъан джига, ад манзике къуIмани хьинекван гиджараIхийбы аляатIан
