Рамандина ваз таамувхьес хаIбба вахт авху дешобна. Гьалекийс инсанаршихъад мани аIзизни вуза Аллагьылхъа доъаIбы гьаъас ва дилягбы гьеххъас имканбы водунбы, няъас увгьее мани вуза ыIбадат гьаъани инсанын дилягбы къабыляъанбы.
Рамандина ваз эн аIзизна ваз вобна. Мани вуза Аллагьее джилда джилдана маляаикыква Пейгъанбар МуIгьаммадылхъа (с.аIл.с) Кьуръан къахувы. Дин утIумаъасдимее ва еймишаъасдимее мани вуза кубаршилейий сиваршиле гъайре, диныква багълыданан маджлисбы, ифтарбы саджигеедын гьаъас ыккан. Нимеега мааъаб хаIбба динын чоджар вухьее, гьаманимеега маIгьадни маджлисбышихъаб гудж, баракат хаIбба вобна. ТараIвийни кубарше, ифтарбыше инсанаршин муIгьуббат, аIрабы утIумаъа.
ОIгийл’ чапыке хъигъечIуни «НУР» кIазетни 15№ ши макьале «ЦIаIхбышин ифтарбы Урсиятыл’» гьуво. Къийнад маIгьдын маджлисбы мааъад аIлгьаа водунбы. ЧIакIын ифтарбы гьайни йигъбышее Волгоградни, Саратовни шагьарбышее илгъечIу. Манбы Дагъыстанни динни управлениейни мислягьаIтыква ЦIаIхни дерайни имаме Эл’дар гьаIджее ыккекка водунбы. Мани шагьарбышее илгъечIуйни ифтарбышее Ислам динни гьаIкIеени ваъаIзбышиле гъайре, музаинее АIбдулла гьаIджее нашидбы хъаIдхъы.
Волгоградни, Саратовни, Ростовни шагьарбышее хаIбба гьар хиваршеенче хъигъебчIуйн цIаIхбы ешемишоохьи вобунбы. Ифтарбы алгъайгьени йигъыл’ махъа хаIббананбы сабы. Манбы чалышмишивхьайнбы ифтарбы чини къайдайл’ уфтанда алгъагьас. Сабарабы манбышинбы хизанбышиква абы. Ман маджлисбы сиваар гьахувойква ва саджигеени кубаршиква таамхьа.
Ниятее водун гьайни дёлесийвалее ифтар Астарханни шагьарее алгъавгьуй. Мааъаб ешемишоохьен инсанарыб гьазироохьи вобунбы. Гьар инсанее джуни кьул’пеенче гехьан садакьайс пыл гьели, мана маджлис къурмишааъасдимее.
Гьел’бедти, маIгьдын маджлисбы Дагъыстанее ешемишоохьени цIаIхбышед алгъайгьи водунбы.
Апрельни 18-чил’ ифтар Къызларни районеени Мирный донани хивни манзике илгъечIу. Ман ихьесда хабар гьихъа-гьихъа соцсетьбышеенче, исмаришбышиква манзикни имаме Исламее хъобтIул. Мани йигъыл’ ифтареехъа Къызларни районеени медни хиваршее ешемишебаххьен цIаIхбыб абы. Маджлис Саидее вукку. Манкъвее сабыйн мигьманар Рамандини вузыква табрикавъуйле хъийгъа, гыргынбы хъобтIулыйнбы гуджнан диныс ыIбадат гьаыйс.
Гойне манкъвее ваъаIзбы динни гьаIкIеедын гьелесдимее джуваббы гьувойн Къызларни районни имамни маIъвыныс АIгьмадрасул гьаIджийс, Черняевка хивни имамыс Магьмуд Хизроевыс, Мишлешни хивни (Бабаюртни районеени) имамыс Вагиф гьаIджийс. Манбыше джони чыхышбышее инсанар хъобтIулыйнбы ыIбаадат гьаъас, кубар гьаъас, сивар аххъас, садакьа гьелес, раIгьымийвалла гозетяаъас, сана-санкъус писин гьидяъас, гунагьбы гьидяъас, гьаIрамни караке тууба гьааъас. Манбышди чыхышбышди аIрее нашидбы муадзинарше хъаIдхъыI.
Гойне маджлис вуккекканкъвее ифтареехъа абыйни инсанаршини аIрее диникени ацIааликена викторина алгъавгьу. Хъодкуда джуваббы хъувойнбышис пайисы ширынныгъ, китаббы гьуво.
Он аляумее сивар гьахувы, гойне саджигее хаIнелин кубар гьау.
Сабара йигъбына гьихъа ифтар ДжинаIгъни хивее вухьа. Манчини гьаIкIеена хабар шас хивни имаме Закир гьаIдже гьувы. Манкъуни увгьойка джони хивна маджлисыб Исламын тIабалбы гозетяу илгъевчIу. Хивни джамаъаIтын саджигее сивар гьахувы ва гойне кубар гьаы.
Апрельни 20-чил’ ифтар Гыл’мецни хивни джамаъаIтын алгъавгьу. Мана маджлис хивни имаме АIсадуллагь гьаIджее вукку. Абыйн инсанар гыргынбы разийба авху. Исламни динни гьаIкIеедын ваъаIзбы гьувойле хъийгъа , он аляу. ДжамаъаIтын саджиге сивар гьахувы ва гойне джаIмаъат куб гьавъу. АIсадуллагь гьаIджийни увгьойка, вудж, хивын джамаъаIт разийда аху. Манчиле гъайре, АIсадуллагь гьаIджее ифтар къурмишаъас кумаг гьауйнбышис, хорагбы хъодхьурийнбышис хаIбна кьиймат гьуво. Гьауйн заIгьматбы суваабыс окIананбыва увгьо.
Ин ша Аллагь, ахуйн йигъбыд Рамандини вузан Исламни диныс ыIбаадатьаъа темиз’ни ниятбышиква илгъечIес. Амин!
