Гьар сен, 26-ъэсди июлил’, Дагъыстанее Конституциейн йигъ алгъайгьи. Мани йигъыл’ ДР-йн джос аIсас Кьаанун кьабылявъу.
Къайимолид сенна гьихъа, 1994-ъэсди сен йишди республикее Конституциейн Иджлас ыхьа. Манбы Совет гьоIкумат дагъылмишхьайн сенбы ыхьа. Йишди гьоIкуматна йаIхъ медни сентелхъа сабкIыл. Манчихъа гора Дагъыстаныныб чисда геледжагъыл’ артымишивхьесда йаIхъ тIабалавъу. Хил’дже фыкырамишивхьайле хъийгъа, оIл’чи-бичи гьауйле хъийгъа, Дагъыстанын Россияйни таркибе чисда Конституция яратмишавъу.
Конституция ешайиш къурмишаъан кьаанун водун. Дагъыстанни миллетбыше джос демократик йаIххъыл’ аIл’гьаасын сент’ аххъы. 26-ъэсди июлил’ тезе Конституцие кьабылявъу. Мана кьабылявъуйка ешайишин диб тезе варакьыле гидгъыл, гьамыд ман йигъ Дагъыстанни миллетин байрам хьинне гьыIсабаъа гидгъыл. Конституцие одкIун водун нен иджазабыйи ва нен борджбыйий инсанылхъа бирмишаъа. Мана йишди ыIмрен кьаанун водун. АIсас манчин инсанын ихтиярбы ва аазадыйвалла гозетяъа. 2003-ъэсди сенни 10 июле ДР-на Конституцие тезелемишавъуна. 26 июле мана гьаIракатеехъа къавукку. Манчеедын макьаалебы тезелемишауйнбы ва сабарабы вахтас сикIы бадалауйнбы. Манчина сабаб вухьана инсанни ыIмрен, ешайишин гыргын сурабы гозетяуй.
Тезе Конституциейн Дагъыстанын экономика, сиясат, маданият, хъаIдхъий, джанана саламатыйвалла артымишхьесын диб утIумау. Конституциейка ши ешемишоохьихьее, манке йишин ешайиш нимеехье оIгеехъа аIл’гьаас. Мана шас обкIун вобна ва мана шакIле вацIавхьес вуккан. Агар шакIле манчина кьуват ваацIа вухьее, манке шаке йишин ихтиярбы гозетяъас раIгьатда аIхас. Анджах хаIббананбыше манчике истифада гьаъас аIха деш ва манчиле «къел’ къадчу» илгъечIи. Геллесди вахтал’ манна къуллухчерше, бизнесменарше, чIакIни ташкилатбышди регьберарше ва мебынбыше карас гьыIсаб гьидявъу, джон кIарын ишбы къеджи. МанбышикIле нягьаIрий Конституцие гьаIррама гьааъас ваацIа воохьи. Манбышди джанее къорху воохьи деш, няъас увгьее бирданхьессе дареехъа гирхьвее, рушват гьуво къадтихьанасда.
КьоIбъэсда йишда дагъамийвалла йишди джамаъаIтын къанаджагъ водун. Дагъыстане гьини фыкреква ешемишоохьи – «Хылен хыл’гьойгъал, хыленыд акьва гьойгъал». ЙаIъни агар вас ман кар хъидетIахье, гыргынчилхъа «улепбы гядахха». ГьоIкуматна хазна соймушааъани инсаныс, кьабыляуйн садибын кьаанунбы гьид’ваджени инсанаршис джазаа гьааъа деш. Гьале манбышике « кьаIгьраманар» гьааъа. Дюгыл’ нишисне гьааъас, къийна йишди республикее Конституциейка садджу фагър, касиб-кусиб инсанар ешемишоохьи вобунбы. Анджах Конституцие гыргынкъус обкIун вобна ва мана гыргынкъве гьуваджес вуккан. Манке гьам саакитыйвалла, гьам инсафийвалла хъавалес.
Инам гьаъас ыкканий, Дагъыстаныс хаIбвалла гьааъани Сергей Меликовыке гыргынбы Конституциейква ешемишивхьес аливкас хаIбхъааъас вааIхасынбы. Садджу гибгъылна иш аIхреехъаме гьивхьарааъас вуккан. Къуллухыл’ иш ваацIана инсан ишлемишхьес ыккан. Дагъыстанлыбы, йишин кIазет хъаIдаххъанбы Дагъыстанни Конституциейни йигъыква табрикааъа! Гьасре аIсас Каанун шас эксина деш, йишди хайирыс ишлемишивхьеджин!
