Аlхырейни сенбышее цlаlхбы дюнйейни джурабаджура оlлкабыше растына хъавайли. Манбышди аlрайл’ ишкарар, дохтурар, къуллухчер, маъаlллимарыб хаlбба вобунбы. Къийнийна йишда гаф Германиейни Берлинни шагьарее ешемишехьенат Раlгьимов Имран Османни духайни гьаlкlеена вобна.Аlхырейни сенбышее цlаlхбы дюнйейни джурабаджура оlлкабыше растына хъавайли. Манбышди аlрайл’ ишкарар, дохтурар, къуллухчер, маъаlллимарыб хаlбба вобунбы. Къийнийна йишда гаф Германиейни Берлинни шагьарее ешемишехьенат Раlгьимов Имран Османни духайни гьаlкlеена вобна.
Раlгьимов Имран доюкана химиейнайий биологиейна маъаlллим ворна. Мана едике Къах районни Лекит-Кутюклийни хивее маъаlллимаршини хизанее 1954-ъэсди сен ыхьа. Манкъуна дек Раlгьимов Осман хивни мактабна директор ишлемишхьа. Мана гьам районее, гьамыр республикее доюкана маъаlллим ыхьа. Гьавъуйни заlгьматыс мана гьокlуматни джурабаджура мукафатбышисый добышис лайикьра къаджы.
Имран маъаlллимее 1969-ъэсди сен хивын молюдле сеннан мактаб быкырау. Манчиле хъийгъа таlгьсил Бакуйни шагьарей давамау. Мааъад манкъве химиейний биологиейни интернатехъа иккечlу. 1973-ъэсди сен мани предметбышин ацlаал’бы гьалед гьеххаъасдиме Азербайджанни маъаlллимар гьаlзирааъани институни химиейни факультетейхъа кьабыл’хьа.
Институте хъаlдаххъани сенбышее манкъве хаlдын баджарух гьагу. Мана ыlлимни ишбышика марахламишехьи гиргъыл. «Решение задач квантовой химии» донана ыlлимна иш обкlун. Мани ишис институтни ааlлимарше ахтына кьиймат гьуво. Республикайни ыlлимни марказын Имран маъаlллим ll дараджайни дипломыс лайикьра къаджы.
Мана Бакуйни шагьарее, СССР-ыл’ илгъечlуйни хаlдданани олимпиадабышда иштиракчий ыхьа ва мааъад манкъве ахтыйн джигабы аххъы.
Манкъус 1977-1981 ъэсдыйий 1985-2000-ъэсди сенбышее манкъус Къах районни Лекитни, Лекит-Кутюклийни, Зарнайни, Илисуйни хиваршее маъаlллимийваллаб гьааъас кьисматхьайн. Ёкьудле сенна 1981-85 сенбышее Перьмни вилаетил ишлемишхьа. Мана Перьмни маъаlллимар гьаlзирааъани институтни химиейни кафедре чалышмишхьа. 2000-2017-ъэсди сенбышил Бакуйни шагьарее джурабаджура мактаббышее, лицейбышее дарсыбы гьуво. Мани сенбышее Имран маъаlллиме баджарухыкван шыгыртар гьаlзиравъу. Химиейнийий биологиейн санаъаlткарар къоокани лицейе манкъве шыгыртар олимпиадабышис гьаlзиравъу. Геледжагъыл’ манбышда гьарна доюкани аали мактаббышда телеба ыхьа. Химиейнийи биологиейни лицейе манкъве шыгыртар олимпиадабышис гьаlзирааъа вухьа. Шыгыртарше джос ацlаал’ гьувойни маъаlллимна дараджа ахтывалейхъа алхъавгьу. Манбышди санкъве дюнйейни олимпиаде кьоlбъэсда джига авхъу. Шыгырт медалыс лайикьра къаджы.
Имран маъаlллимыхъад хаlдда одкlунийн китаббыд водунбы. Манкъве алидни сыныфни шыгыртаршисый абитуриентаршис 1913-ъэсди сен «Общая химия», 2021-ъэсди сен «Повторим химию. 212 таблиц», Сумгаитни девлетни университете ишлемишехьенкъаl маъаlллимаршисый телебабышис «Химия. Окислительно-восстановительные реакции. Электролиз» китаббы одкlун. Гьаlшде манкъве сайид тезе китаб одкlун водун. Маныд гьайни делесвалей чапейнче хъигъечlесын. «Повторим химию.212 таблиц» пособие урусни мизелхъа сакlалау водун. Маныд хъоо1ни сен чапейнче хъигъечlесын.
Гьаlшде Имран маъаlллим пенсиее ихьейир, гуджнаква ушахар гьаlзирааъа вобунбы. Манкъве Германиейнче интернете Фейсбукни странице ушахаршис «Химия кlооралейнче хаlдхъихьес» дарсыбы алгъааlни дестейс хаlбвалла гьааъа. Мани дестее 5500 иштиракчий ворна. Манкъве манбышис онлайн дарсыбы алгъааl. Манчиле гъайре манкъве маъаllлимаршисыд дарсыбы ыккекканбы.
Имран маъаlллим хааlрна хайирхагь ва ватанпарвас инсан ворнава хаlббананбыше эйгьи. Манкъве касибни хизанбышейнче хъигъебчlыйни ушахаршис дарсыбы кьаlрад ыккекка. Заквани ихтилетее манкъве увгьойн: «Зы гьар вахтал’ цlаlхни халкьыни ушахаршис химиейнийий биологиейн дарсыбы ыккейс гьаlзирра ворна. Къийнийни йигъыл’ захъар цlаlхбышди са ичершина телеба ворна. Манбышин сай геледжагъыл’ хаlдхъыхьа ыккан. Манбышис захъад водун биологиейний химиейн ацlаал’ гьелес чалышмишхьесда».
Йишди редакциейн Имран Османни духайс угъурбы аlрзаъа. Геледжагъыл’ фыкрее аххъыйн ишбы аlхырейхъамее быкыраъас Оорункъуке джанана сагъвалла гьоохъа.
