Санаъаlтыхъад югуний писин эйхьен деш. Манчини гьааринчилхъан чина вааджибийвалла, гыранийвалла, ахтывалла вобна.
Гьар сен ноябрьни 21-чил Россиейл’ бухгалтераршин йигъ алгъайгьи. Йишди оlлкайл’ мани пешейква милйонбышиквани инсанаршина ыlмыр багълыба. Къийнийни йигъыл’ манбы гыргыни ташкилатбышее лазымба вобунбы, няъас увгьее бухгалтераршини ишике гьуlкуматын артмихьай аlслыда.
Имкан гибхьы зас ыlмырын хьебцlалиле агъаллан сенбы бухгалтерни санаъаlтыс къадсырыйни Уlмарова Нарынгул’ Уlмарни йищени гьаlкlее окlанас ыккан. Йизда маlнкъыкана танышийвалла 1997-ъэсди сенни апрельни 1-чил вухьа. Манке «Нур» кlазетни хааlрни редакторни Гьарун Ибрагьимовни амрыква зы ишилхъа аляртlу. Н. Уlмарова редакцие къурмишхьайни цlеддыйни йигъыле хааlрни бухгалтерни къуллухул’ ишлемишейхьи ворна.
ХХ асырни ючlаlлъэсын сенбы быкырни оlлкайс хьинне, бухгалтераршисыд дагъамын сенбы ыхьа. Манчихъа ил’дяакы, Нарынгуле ши доннухбы дена ненкеджаб гьабсыр деш. Маlнкъыхъаб министерствайни къуллухчершини гьийб хаlбна гьуlрмат вухьа. Маlгьабна гьуlрмат маlнкъее гьаракатукани ишиква къазанмишавъу. Гьелбетте, ахтыйни къуллухчершиква миз тlабалавъуй хаlдын гьунар водун.
2005 сен Нарыгул’ Уlмаровайс джени пешейни устадыйвалис «Дагъыстан Республикайни лайикьыквана экономист» до гьуво. Маlгьдыни ахтыйни дараджайлхъа гьирхьылийнимее маlнкъее хаlбна заlгьмат гьавъу.
Ыlмыр джигайл’ илёозар дешда, санаъаlтбыд къийнийний тlалаббышис уйгъунда ихьес ыккан. Мани сардан бухгалтерна ишиб сениле-сенилхъассе дагъам хъоохьи. Агар вас гьаlкlена санаъаlткар ихьес ыкканхьее, гъу пешейс ааидын бадалыйваллабышиква танышра ихьес ыккан, манбы ишекечирмишааъас ахаlс ыккан.
Гьаlшдийни вахтыл’ бугалтераршина иш джурабаджурни программабышиква багълыба. Манчихъа горад пешейква багълыданан ацlалал’бы гьар вахтал’ артмишааъас лазымда. Мани карее Нарынгул’ Уlмарни йищехъаб дагъамийвалла дешда, няъас увгьее мана чалышмишейхьена бухгалтераршини семинарбыше иштыракаъас, санаъаlтни адабиятыква танышийхьес.
Ахтыйни дараджайквана санаъаlткарыле гъайре, манчиле гьихъа, Н. уlмарова югна ед’ ворна. Маlнкъее ыlмырни гьамбазыква кьоlйре духйебы хаlбхъааъа. Дора маlнкъыс ишил’ угъурбы, хизанее саламатийвалла аlрзааъас.
