Гьайни йигъбышее Калел’ни йыlкьнекни мактабее ед’ни мизес кьассырыйн хаlдын тадбыр илгъечlу. Йигъынджагъее  дагъайдни сыныфбишди шигыртарше иштиракау. Мактабни айванее шигыртарше джони едяаршикайий, маъаlллимаршиква санад йиссейни къаббышин гьагуй алгъавгьу.

Мани йигъыл’ ушахар йихъбышее йиссейда ишлемишааъани къаббышиква, авала вахтал’ ишлемишаъани ыlгьтаджбышиква, таналхъа хъаляаъан батlрайни ыlмаршиква ва сабар менни карбышиква делесийвалейнче танышувхьа.Шигыртар мааъаб йиисейда йихъбышее ухара гьаъани, габабы, хурджинбы гьоодахарни къулайбышика танышувхьа. Хаlдын маарах ушахарше  ата-бабайни вахтал’ заргарарше гьауйни нукlрайни ишбышис гьагу. Гойне хьинне, дагъайдни сыныфни шигыртарше ед’ни мизелидын бейтбы, шечlбы, меххьвар хъаlдхъыl.  Сана-санкъулхъа тапмаджебы гьуво. Ёкьудъэсди сыныфни шигыртарше «Къабах-тlабах» донани хабарына  тамаше гьаагу. Махъа сабыйнбышис ушахаршин тамаше гееб кьабыливхьа. Мани йигъыл’ тадбырее Калел’ни хивни йыlкьнекни мактабни шигыртарше ед’на миз гьувааджесдимее хаlдда джурабаджурайн марахукан оlюнбы гьагу. Йигъынджагъейхъа сабыйнбышис ушахарше гьаlзирауйн гьагуй, хъаlдхъыйн шечlбы, меххвар геед кьабыл’хьа. Геледжагъыл’ маlгьдын тадбырбы экlда-экlда алгъаъасди мыслягьаlтейхъа хъабы.Тадбыр ташкил гьауйнбышис ахтыйна кьиймат гьуво. Манбы Калел’ни хивни йыlкьнекни мактабни директорна маlъвын Навруз Раджабовый, ед’ни мизелидын дарсыбы гьелена Гуляра Асланова вобунбы. Гьаlкlедда, къийна Кадел’ни мактабын ед’на миз гьуваджесдимее хаlбна иш вуккекка вобна. Манбыше йихъсумыс гьувойн сааъаlтбы чини кьайдайл’ ишлемишаъа.Мактабее  дагъайдни сыныфбышенче гидгъыл аlхырейхъамее  ед’ни мизелин дарсыбы ыккекка водунбы. Мани карее, хаlбна заlгьмат дарсыбы ыккеккана Гуляра маъаlллимае гьааъа. Маlнкъыни ишис гыргынбыше ахтына кьиймат гьооли.