Февральни 19-чил’ Дагъыстанни миллет китабханее чапыке хъигъечуйни Рутулни-урусни мизел’ни лугъатын презентация илгъечIу.
Ман лугъат Дагъыстанни педагожи университетни ааIлиме, филоложи ыIлимбышди докторе АIлисултIанов АIлисултIан СултIанмурадни дихее ва Дагъыстанни техник университетни ааIлиме, филоложи ыIлимбышди кандидате Сулейманова Таисие АIлисултIанни йище одкIун. Манбыше къурмишауйни лугъатеехъа 30 аазыр адабиятни рутулни (мыIхабышди) мизен джуваббы ва йигьракни, мюхрекни, шиназни, быршнийий хновни лугъадбышин сабара джуваббы гядкIу.Мани йигъынджагъыс къабсырни маджлисеехъа ДДУ-ын, ДДПУ-ын, ДНЦ–ын, ДТУ-ын, ДМА-йн ааIлимар, Дагъыстанни халкьни маджлисын депутатар, Дагъыстанни джамаъаIтни палатайн уIзвубы, Рутул районын къуллухчера, журналистар, шааирар, ишкарар, телябабы ва лугъат одкIунийнбышин гогьарбы абы.Маджлис Дагъыстанни парламентни депутате Давуд Сулейманове ачухавъу. Манкъве авторар табрикавъуйле хъийгъа ва маджлисеехъа абыйни инсанаршис хошгел’дий гьавъуйле хъийгъа, маджлис вуккейс ДНЦ-ни ааIлимыс, филоложи ыIлимбышди докторыс Мариза Ибрагьимовайс гьуво. М. Ибрагьимовае джен чыхыш лугъатни гьаIкIее, манчини къурлышни гьаIкIее ва авторарше гьавъуйни заIгьматни гьаIкIее гьау. МаIнкъыни увгьойка, ман лугъат цIеддыйн адабиятни мизел’ одкIунийн водун. Лугъатеехъа 30 аазыр джуваб эчIу. Авторарше ман ойкIананкъа гыргын мизен , языйн кьаанунбы ва тIабалбы гозетяу. Лугъатна редактор ааIлим, филоложи ыIлимбышда доктор С.М. Магьмудова ва рецензентар ааIлим , педагожи ыIлимбышда доктор К. Э. Джамалов, ааIлим, филоложи ыIлимбышда доктор М.О. Ибрагьимова вобунбы. Лугъатни къома сифтана гаф (предисловие) , лугъатын къурлыш ( структура словаря) , джитIахъауйни джуваббышин сиягьий ( список условных сокращений) одкIун водунбы. Хъийгъа йидж лугъат «А» гьаIрфыле гийгъал ва «Я» таамехьи. Манчиле хъийгъа рутылбышди адабиятни мизени гьаIкIеедын джитIан грамматик очерк гьели водун. Хъийгъа лугъате рутулбышди мизени орфографиейни къайдабышин усулбы гьели . АIхрее ишлемишауйни адабиятын сиягьий гьели. Рутулни–урусни мизелин лугъат чапыке МаIгьачкъалее, «Алеф» чапханее къайиккы.Дурустын чыхыш гьауйле хъийгъа, маджлис вуккекканкъее лугъатни гьаIкIеедын маIълумат гьелес ва ман одкIунийн таарых йишонаъас АI. С. АIлисултIановыс хааишау. Манкъвее сабыйнбышис аIтрафлы маIълумат гьуво. Гойне югни маIънайкван чыхышбы ааIлимарше К.Э. Джамалове( ДДУ), Р. Гь. Кадимове (ДДПУ), А.Т. Акамове ( директор ИЯЛИ ДФИЦ. РАН), Ф. Гъ. Раджабове ( ДР ХМ депутат), ЫI. Х. АIбдуллаеве (ИЯЛИ ДФИЦ. РАН), Ф.М. Ибрагьимовае (ИЯЛИ ДФИЦ. РАН), М. А. ГьаIсанова (ДДУ), Т.Э. Къафарове (ДДМА), В.М. Загьирове (ДДПУ), Б. Б.МаIгьаммадове ( рутулбышди кIазетна хааIрна редактор), Э.И. Исмаиловае ((ИЯЛИ ДФИЦ. РАН), Кь.З. Омаханове ( язычий, «Нур» кIазет журналист) , Я. Г. Таибове ( Рутулни 1–ни мактабна директор), Ш.М. Ибрагьимове (шааир, композитор), Б.С. Рамазановае (рутулбышда шааир), С. Гь. Сулейманове( шааир, журналист ) ва мебынбыше гьау.Маджлисни аIхрее абыйни мигьманаршис АIлисултIан маъаIллиме абыйнбышикIле сагъул-варул увгьо ва пайис джуни къолакван лугъатбы гьуво.
