Мисала вобна: «КьаIсинбы вобни джигее барака воохьена». Ман гьаIкеIн ихтелет водун. Манбы садджу баракаджаб деш, гьамыб хаIбна девлет вобна. Манбышда дараджа, джига цIаIхни халкьын гьаммаше кьома гьувааджи. Манбышда гьуIрмат авхъаххъана. Гьайни йигъбышее кIазетна корреспондент Калел’ни бинайл’ ешемишейхьена Къараева Ана адийква хъызаххы. Ана адийни ыIмырни, хизанни, ушахаршини гьаIкIее гаф гьавъу.
Ана адий аварбышда йиш ворна. МаIнкъына ушахийвалла Закаталайни Даначийни хивее илгъевчIу. Амма маIнкъыс адамийс цIаIхыйгъалийс хъигъейчIес кьисматхьа. РаIгьматтыгъ Къараев Халил Сулейманни духайква мана гьинчиле хаIдда сенбына гьихъа танышийхьа. Джони джаванийвалике гаф гьааъанкъа, Ана адее увгьойн: «Манке зы едике йихьайни хивее дерзигнаний ишлемишейхьи. Халил хизаныква шас делесни аIракьсовхозейний ешемишехьи. МаIнкъына йичи йизда энки дёлесна гьамбазний. Йигъбышди са йигъыл’ Халил йичейква шинкъаI ийхьвасди палтарыс заказ гьелес абы. Ман йигъ зас къийнийн хьинне йикIел’ водун. Ман йишин цIеддыйн горуш ыхьа. АIрейнче сабара вахт абкIынийле хъийгъа, ши даватбы гьау, хизан къурмишавъу. Ши цIебба аIракьсовхозее ешемишувхьа. Гойне сувал’ни Калел’ни хивейхъа кочмишувхьа хъабы. Тезеданда сувал’юрд абаччи гибгъыл. Манкъве маъаIллимийвалла гьавъу, зынар тасарруфатее ишлемишийхьа. Манчика саджигее дерзигын санаъаIтыд гьауйн. Едаршис донбы, адамейршис хаIлетбы, ушахаршис джилеткIабы ва сабар медын карбы ийхьу. Йихьыдле сенна мааъаб ешемишувхьа. Манке сувал’ ешемишувхьай дагъамданий. ГьаIшдийна хьинне машнена йаIхъ вухьа деш. Хивын джамаъаIт кIылда-кIылда Бабаюртхъаний кочмишехьи. Манбышди аIрайл’ йишда хизаныб вухьана. Мед гьиняа хайбы аляу, тасарруфат къурмишау.
Ана адийна адамий Къараев Халил хаIдда сенбы мактабее маъаIллимна эйгьен. МанкъукIле гыргынбыше Халил маъаIллиимваний онгьаъан. Манкъус сабара сенбына Калел’ни хивни мактабыс директорийвалла гьааъасыб кьисматувхьана. Манкъве директорийвалла гьааъани сенбышее мактабни ыIмырее хаIдда бадалхьайбы ыхьа. Халил маъаIллиме мактаб йыIкьнекин ыхьайниме хаIбна заIгьмат гьавъу. Манчиле савагьийда манкъве мактабни маIгьалле ушахаршикайий мактабни коллективыка саджигее уфтанын мейвабышин багъ адчы. ГьаIшде мани багъее уфтанын мейвабы аляйли. Халил маъаIллимыс хаIбна ыIмыр гьааъас кьисмат девхьана. Мана экIра раIгьматыххъа аркIын. Къийнад багъейнче мейва хъоохьанкъве манкъус раIгьмат къихооли.
Ана адий хизаныква Бабаюртхъа кочмишийхьайн хьебцIалиле агъаллан сенбы водунбы. Мани сенбышее маIнкъее тасарруфат къелилхъа хъау. Манчика саджигее дерзигийваллаб гьавъуна. МаIна йихьни духйеьышда ед’ ворна. Ушахаршини кьома адамий дехьейир, маIнкъе ушахаршис касибийвалла гьаагу деш. Манбы уфтанба чIакIы хъавъу, манбышис хъаIдхъый гьувойн. Халил маъаIллимни сагъвалее кьоIни гадейс даватбы гьау. Хьебни гадейс даватбы гойнехьинне гьау. Заквани горушее джена мураад кIыл’ни гадейн даватбы къаджый водунва маIнкъее агъмышау. Къийна А. Къараева йицIни невайна адий ворна. Манбышис джен мактаб алгъайгьи, тербие гьели водун.
ГьаIшде Ана адий нейинки Бабаюртни бинабышил’, манчиле къырагъылир югра ейцIа ворна. Мана доюквана аIрагьаким ворна. МаIнкьее хаIббани исанаршис кумаг гьуво. Увгьойбышихъа гора, дагъамын чIырынбы кьелилхъа хъавъу. Йидж са ешбышее йихьейир, маIнкъысхъа дарман алябтIас вуххъаIни чIырынбышин сай камехьи деш. Мана шавнуджар хатрек’ хъейтIа деш. Чалышмишейхьена гыргынбышис югун маалидже гьаъас. Мани сардан гаф гьааъанкъаI, Ана адее эйгьен: «Ман зас Аллагье гьувойн гьунар водун. МаIгьдын баджарух джени кьаIсди едихъад ыхьайн. Гойне хьинне маIнкъыке джес илгъевчIу. Мумкум вобна, аIрейнче хаIдда сенбы адкIынийле хъийгъа, йизди невабышди санкъухъад маIгьдын гьунар ихьес. Манчинимее хъаIдхъас ыккан деш. ГьаIшде Ана адей кумаг гьувойни чIырынбыше манчике джос ыхьайни кумагыке йишонебахьи. Гыргынбыше маIнкъыс миннатдарийвалла агъмышааъа.
Къийнийна йизда гафчий гьамыр кьаIгьраман эскераршина игит ед’ ворна. Къийна маIнкъын ёкьуйре духба СВО иштыракчер вобунбы. Манбышике гаф гьаъанкъаI, эйгьен: «Эскераршина ед’ йихьай дагъамна иш вобна. Манбы СВО, ед’ хааъар. ХаIм-йигъна зы манбышда фыкыр гьааъа. Манбышике зенг хъадыйнкъаI геер шадейхьена. Бирданхьессе, кьоIлле йигъна зенг дехьее, хаIмдыйн някI айкIанан. ЗакIле манбышда дагъамийвалла ваацIана. Амма гьиччуджад гьаъас ахаI деш. Сабырыква манбышда хаахъана йаIхъ гозетааъа. Мааъаб садджу йизын духйеджаб деш, хаIбба эскерар вобунбы. Манбышин едярыб зы хьинненбы вобунбы. Манчил алла, зы экIда СВО таамхьеджинва дилягбы гьеххъа. Гыргыба мааъаб вобун духйе сагъба-саламатба хайбышейхъа савкIаланбыва эйгьи.
Горушни аIхырее Ана адее увгьойн: «ЗакIле хаIдда дагъамийваллабы къаджы. Манчихъа ил’дяакы, зы гьавъуйни ыIмрыле разийра ворна. Зы аварбышда йиш цIаIхни халкьын геер уфтанра къаршиламишейъы. Къийна зы манбышди аIрайл’ ешемишейхьена хаIдда сенбы водунбы. Мани сенбышее зы манбышис, манбыб зас аIзиз хъувхьа. Йишди аIрайл’ хаIбна мугьуIббатна йыIгъ гивхьу вобна. Мани йыIгъын йишда доствалла сыкыIлбаб утIумавъуна. Са кар ненкеджад кIелиханаъас ыккан деш. Йишда гыргына гьайни дюнйейлхъа арына мигьман ворна. Манчихъа гора, ши гьаммаше мугьуIббатыква ешемишувхьес чалушмишувхьес вуккан. Манчиле гъайре, гьаарункъве ахаIни саягъыл’ сана-санкъус кумаг гьелес гьаIзирба вуккан. Югун гьаъанкъус гьаммаше югун авайкес. Ман йизын кьанун водун. Мани къайдал’ зы йизын духйе, соссар, невабы хаIбхъааъа.
Йишди редакциейн, Ана адийс хылийна ва югна ыIмыр аIрзаъа. Йиджее гьаъуйн гыргын югун ишбы суваабыс ойкIананбыва эйгьи.
