Октябрьни 9-чил’ Дагъыстанни девлет педагожи университетни (ДДПУ) хаариджий мизяршини факультете цIаIхна, рутулна, агъулна адабиятын мизар артымишаъас ва гьуваджес къабсырна кIыл’на маджлис вухьа.
МагьаIбни мислягьаIтыква ДДПУ профессор, ДР-ни джамаъаIтни палатайна уIзву АIлисултан АIлисултанов хъигъечIу. Махъа иштыракаъас агъулни, рутулни, цIаIхни миллетбышин эл’чера абы. Джони аIрее вухьайнбы М.О. Ибрагьимова, д.ф.н, ИЯЛИ ДФИЦ РАН-на хааIрна ыIлимна ишчий, С. Гь. Сулейманов , шааир, «Рутулбышин хабарбы» кIазетна мухбир; Б.С. АIбдуллаев, «НУР» кIазетна хааIрна редактор, Ю.И. Бабаев, «Нур» кIазетна, цIаIхбышди теле-радиойна мухбир; «Нур» кIазетна редактор отдела, ДНИИП-на хааIрна ыIлимна ишчий; С. Дж. Маллаева, к.ф.н., ИЯЛИ ДФИЦ РАН-на хааIрна ыIлимна ишчий, Н. Р. Исрафилов, к.ф.н., доцент ДДПУ .
АIлисултан АIлисултанове абыйн мигьманар саламыквайий чейиква къаршламишавъуйле хъийгъа, савъуна метлеб ющенавъу. Манкъвее джуни гафее увгьойн : « Къийна шу, йишди хьебни (агъуларшини, рутуларшини, цIаIхбышди) миллетбышин эл’чер, интеллигентар, ааIлимар хьинне мислягьаIтыс савъу вобунбы. Йишди фыкрее водун гьайни сенни аIхрейс мани миллетбышди мизяршикена, маданиятыкена, адабиятыкена хаIбна маджлис алгъавгьуй. Манчихъа гора, ши гьазирувхьес вуккан нени къайдайлий мана вуккейс. Шахъад хаIдда мани сардан гьаIллаъасын суалбы водунбы. Ман дагъамийвал’бы къулайква къалхымишаъас ыккан ва гьаIллаъасын гьаIракатбы къаджес лазымда водунбы. Фыкрее водун махъа ДР-ни Правительствайн къуллухчера, ДР-ни сабара профильный министерствайн чIакIынбы, ааIлимар, депутатар, районбышин чIакIынбы, хъаIдхъийни ташкилатбышин къуллухчера , журналистар, джамаъаIтчер ва мебынбы савъуй. Гьасре гыргынкъукIле йишди миллетбышди дагъамийвал’бышин сесид къайиххьеджин. Манчихъа гора , йишин тIабалбыд кьаануныс уйгъунынбы ихьес ыккан. Шинаб республикайн титулный миллетбы водунбы. Медни дагъыстанни миллетбышихъад гьиджо ихтиярбыйий ва гьиджо борджбыйий шахъадыд гьаманбы ихьес ыккан. Къийна хаIдданани хайрхагь ишбы гьаъасын имканбы шахъад дешинбы. АIсас манбы едини мизяаршиква, мактабни китаббышиква, маданиятыква, адабиятыква, джегьилершиква . къуллухбышиква багълыданан суалбы водунбы …».
АI. АIлисултIановни чыхышиле хъийгъа джон фыкырбы Б. АIбдуллаеве, Кь.Омаханове, Н. Исрафилове, С. Сулейманове увгьы.
Манбы мислягьаIтеехъа хъабыйнбы алебтIуна вааджибна иш аIхреехъаме быкырааъас. ХаIбна маджлис алгъагьассе гьихъа , меб савалес мислягьаIтеехъа хъабы ва махъа мебын миллетбышин эл’чераб хъоотIаласва увгьы. Ниятеехъа алеетIуйн, 2024 сенни ахреехъассе хаIбна маджлис алгъавгьу.
МислягьаIтна кIыл’на маджлис едигарыс цIыIцаыйни шикыл’бышиква таамувхьа.
