Гьар сен октябрьни 21-чил’ йишди республике Дагъыстанни маданиятын ва мизяаршин йигъ алгъайгьи. Ман байрам 2016 сен республикайни кIалендареехъа адчы ва манчина макьсад вухьана республике ешемишехьени миллетбышин маданият ва мизяар гьуваджий ва артымишаый.
Мани йигъыл’ республикайни шагьарбышее, районбышее, хиваршее тербие, насигьаIт гьелен маджлисбы, агъсаххъаларшикван, ааIлимаршикван, язычершикван, шааираршикван, маданиятни ишчершикван гафбы, шечIбышин конкурсбы, маIънийбышин, мыкIаршин тамашебы, китаббышин, шикыл’бышин, аIдатбышин гьагуйбы илгъечIи.
Гьар сен мани байрамни йигъыл’, аIдатейхъа гидхьу, республикайни мактаббышее, аали мактаббышее ва медни хъаIдхъийни, маданиятни ташкилатбышее едини мизелин диктанбы ойкIан. Манчисда гьазирыйвалла гьихъаджаб къооджи.
Гьайни сен мани байрамыс къадсырыйн диктант кьоIни министерствабыше — ДР-ни хъаIдхъийни ва ыIлимни, ДР-ни миллетбышди сиясатни ва динни ишбышди министерствабыше — сана-санкъуке джурайда ташкиляъы.
ХъаIдхъийни ва ыIлимни министерствайн къурмишаыйн диктант мактаббышее, педагожи училищебышее, колледжбышее одкIун. АIсас ман диктант мааъад шигыртарше, телябабыше, маъаIллимарше одкIун.
Милли сиясатни ва динни ишбышди министерствайн ташкиляийн диктант Дагъыстанни педагожи университетни дагъыстанни филологиейни факультете одкIун. Едини мизяаршилин диктант окIанас махъа ааIлимар, джамаъаIтчер, динэгьлер, къуллучера, журналистар ва мебынбы абы.
Едини мизелин диктант окIанас абыйнбышди аIрее цIаIхбыб, кIылба вухьейиб, вухьайнбы. ЦIаIхни мизелин диктант окIанас абыйнбышди аIрее ЦIаIхни дерайна имам Эл’дар Сулейманов, джамаъаIтчий Темрез АIлиев, «Нур» кIазетна хааIрна редактор Байрам АIбдуллаев, джавабдар каатиб Камил’ Шамхалов, шоIъбайна редактор Кьурбан Омаханов, мухбирар – Юсуф Бабаев, Наргиз Гьамзаева; ГТРК цIаIхни мизелин теле-радио верлишбы ыккеккан Юсуф Бабаевый Гул’нара Керимова; РГВК цIаIхни мизелин теле- верлишбы ыккеккана Бейдуллагь Ибрагьимов; цIаIхни мизел’ чапыке хъыгьааIни ушахаршини журнална мухбир, рутулни мизелин радио-теле- верлишбы ыккейкана Шефига Бабаева. Йишди увгьойква , гьаIкIен едини мизехъа джан гёдхьанан инсанар гьаманбы вобунбы.
Диктант «Нур» кIазетни шоIъбайни редакторе, ДДУ-тын филологиейни факультетын цIа1хни мизен шоIъба таамауйни Наргиз Гьамзаевае хъаIдхъы. Диктантын до: «Едигарыс до гьадсырна дохтур» ыхьа. Ман текст ЦIаIхни дерайл ишлемишхьайни раIгьматтыгъ МаIгьаммад Рамазановни едигарыс къадсырыйн текст ыхьа. Манчиле гъайре ёкьудле медын хъаIдхъас гьазирауйн текстбыд ыхьайнбы.
Диктант одкIун таамхьайле хъийгъа цIаIхбышисахъа саламыс ДР-ни милли сиясатна ва динни ишбышда министр Энрик Муслимов, ДДПУ-на ректор Нариман Асваров, ДДПУ проректорар: Ибрагьим Дибиров, Руслан Гереев, филологиейни факультетна декан Руслан Кьадимов, дагъыстанни филологиейни факультетна декан Зайнаб ЫIмарова ва мебынбы абы.
Манбыше джони сураке джуваб гьувы цIаIхна миз инкишафаъасын , китаббы, лугъатбы къайиккасын кумагбы гьувой. Мизеква багълыданан суалбы абыйни мигьманаршилхъа Темрез АIлиеве гьувы.
Диктант одкIунни инсанаршис, мани йигъыл сертификатбы гьувы.
Ашкарда эгьес, ман маданиятын ва мизяаршин байрам ДДПУ марахыква илгъечIу. Университетни абни маIгьалле тамашейс дагъыстанни миллетбышин мыкIар, оIюнбы, хорагбы гьагу, мIаънийбы гьекIу ва симаварын чейбы гьувы.
Гьаманиджад майдама агъуларшини, рутуларшини гьаIйкалбышисана хьебни чуба миллетбышин – цIаIхбышин, рутулбышин, агъуларшин – диктант окIанас абыйн инсанар сабы. Теми’ни гьаваал’на маджлис профессор АIлисултан АIлисултанове вукку. Манкъвее сабыйнбышди гьийб йишди хьебни миллетни мизяаршикена, адабиятыкена, маданиятыкена дагъамийвалла агъмишавъу ва нягьаIбый мана садибба гьаIллаъасда мислягьаIт агъмишавъу. Манкъуни увгьойква, манчини гьаIкIеедын хаIдын иджлас алгъагьас ыккан. Махъа республикайни правительствайн, министерствабышин къуллухчера, депутатар, джмаъаIтчера, ааIлимар, журналистар сааъас вуккан. Гьасре йишин сес манбышикIле къайиххьеджин. Мани мизеква, адабиятыква, маданиятыква багълыдани дагъамийвал’бышди гьаIкIеедын чыхышбы ДДУ-ни профессоре Салминат Гьа1сановае, ДНЦ-ни аIсас ыIлимни ишчее Мариза Ибрагьимовае, «Нур» кIазетни хааIрни редакторе ва мебынбыше гьаъы. МислягьаIтеехъа хъабыйнбы февральни вуза мана ниятеехъа алебтIуна иш быкырааъас.
Гьамани джад йигъыл’ Сувал’ни дерайл’ цIаIхни мизелин диктант ЦIаIхни йыIкьнекни мактабее, Мишлешни йыIкьнекни мактабее илгъечIу. Манчини гьаIкIеена хабар шас ЦIаIхни мактабни директоре АIбдулгьаIмид ГьаIджиеве ва Мишлешни мактабни цIаIхни мизен дарсбы гьелени маъаIллимае Мина Ибрагьимовае гьуво. Манбышди увгьойква, диктант мактаббышди маъаIллимаршейий ушахарше одкIун. Муслагъни мактабни маъаIллимарше ва ушахаршед диктант Мишлеше одкIун. Анджах няаъад, нягьаIд едини мизелин диктант ДжинаIгъни, Гыл’мецIни, Лекни мактаббышее илгъечIи ыхьай шас хабароолена ыхьа деш. Гьасре манчика Рутул районни хъаIдхъийн управление ваяхуд ДР-ни хъаIдхъийн ва ыIлимын министерства маIшкьулхьеджин.
Бабаюртни районее ешемишоохьени цIаIхбышди ушахарше ва маъаIллимарше диктант Бабаюртни хивни мактаб-интернате одкIун. Мани карее мааъаб ешемишоохьен цIаIхбы гьаммаше гьаIрактыква воохьи. Манбышилхъан суалбы шахъад дешинбы. НягьаIдый диктант джо одкIун, манчини гьаIкIеена хабар ва шикылIбы Калел’ни йыIкьнекни мактабни цIаIхни мизени маъаIллиме гьувы.
P.S. Мани йигъыл’ едини мизеква багълыданани акциейс хыл’авхъас вааIхасын, едини мизел диктант оканас аIхасын инсанар МаIгьачкъале ва медни шагьарбышее кIылба дешобунбы. Мани акциейни гьаIкIее ши джамаъаIтыс кIазетеенче, соцсетьбышеенче хабар гьувына. ГьаIмагьаб шас йишда едина миз’ вуккан!!! Едина миз’ девканни инсаныс едир, Ватаныб вуккийканас мункум дешда. Едина миз’ садджу къуллухбы алетIас, пыл даватбышее къазаммишаъас шас лазымоохьи… Няхъане вухьа «коксибы гетан ватанпарасар»: къуллухчера, ишкарар, депутатар, ааIлимар, джаIмаъатчера, артистар, блогерар, телябабы?
