«Нур» кIазетни редакциейн ишчер вахтыле-вахтыйлхъассе джаIмаъатысхъа хъигъеебачIен аIдат водун. Манбы джигабышил’ инсанаршиква горушмишоохьи. Хиваршее ишлемишехьени мактаббышее, ушахаршини бахчебышее, больницабышее, амбулаториебышее, ФАП-бышее, китабханабышее, клуббышее, хивни тасарруфатбышее воохьи. Халкьыни ишбышике делёсвалейнче танышоохьи. СВО воохьени эскераршини хизанбышиква хъызааха.
Гьайни йигъбышее редакциейн ишчер Бабаюртни зонайл’ цIаIхбы ешемишоохьени хиваршее вухьа. Гьини элеесын йишин горушбы Тезе Муслагъни хивейнче гидгъыл. Тезе Муслагъна хив къийна хаIбна хивобна. Мааъад ишлемишехьен энки хаIдын ташкилат йыIкьнекин мактаб водон. Сабара вахтна гьихъа манчина директор бадалхьана. ГьаIшде мактабыс хаIбвалла Наврузов Ширинбег Селимни духэй гьааъа. Гьихъа мана хаIдда сенбына мактабей маъаIллимна ишлемишхьа. «Нур» кIазетни ишчерше Ширинбег маъаIллим тезе ахтыйни къуллухуква табрик гьау. Манкъус геледжагъыл’ угъурбы аIрзуламишау.
Шаквани горушее Ширинбег маъаIллиме вудже хаIбвалла гьааъани мактабни къийнийни йигъыке гаф гьавъу. Манкъве маъаIллимаршини коллективыке, махъа хъавайлени шыгыртаршини гьаIкIее гаф гьааъанкъаI увгьойн: «Къийна хивни йыкьнекни мактабейхъа садджу цIаIхбышин ушахарджаб деш, аварбышин, даргибышин ушахарыб хъавайленбы. Манбышин мактабейхъа хъабый-абкIыний сибык хъаъасдимее автобус ивийкарааъа. ГьаIшде автобус ишлемишоохьи дешобна. Манчина сабаб оIгийл’на манчина шофир ишиле аркIынийква багълыба. Тезе шофир ишилхъа аляртIымее, мана дагъамийвалла аIрейнче ал’гьааIсда.
ХъаIдхъыйнимее, югун билиг алятIуйнимее ушахаршис гыргын шарааитбы яратмишау водунбы, манбышихъаб нишикенаджаб дагъамийвалла дешда. Мактабе гыргыни предметбышикен маIъаллимар вобунбы. АIхырейни сенбышее мактабейнче хаIбба маъаIллимар абкIын. Манбы шагьарбышейхъа кочмишувхьа. Манбышди джигайлхъа джаван маъаIллимар хъабы. Манбыб югун билигыкван маъаIллимар вобунбы».
«Нур» кIазетна редактор Байрам АIбдуллаев мактабейхъа хъавайлени дагъайдни сыныфбышди ушахаршис гьелени къуIмани одхьунийка марахламишхьа. Буфетни вазиятыква ши мааъаб ишлемишоохьени поварарше танышавъу. Манбыше джохъад ушахаршис одхьуний гьаIзираъасдимее водун тадарукбы гьагу. Гойне хьинне джо гьар йигъыс хъойхьарни хорагбышди сиягьыйква танышавъу. Манбышди увгьойка, ушахаршини одхьунийс тезенчиле тезе тадарукбы ишлемишаъа. Манбыд чини вахтал’ хъадайленбы. Буфетна санитариейни вазиятыб писба деший. Къаджейнчиле ши разийба авху.
Мактабын сыныфбыд къуIмадайий. Ш. Наврузове шас гьийгъанче гьихъа гьаIзирауйн янаджагъын амбарбыд гьагуйнбы. Осбыйий къаейна гIадыр камба вухьее, медыныд имканбы водунбыва, директоре агъмишау.
Манчиле хъийгъа ши мактабни маъаIллимаршини утагъее ушахаршис дарсыбы гьелени коллективыка хъызахы. Манбыше сабара мисалабышди гьаIкIее шас гаф гьавъу. МаъаIллимаршини увгьойка, аIхырейни сенбышее хаIбба джаван маъаIллимар ишиле абкIын. Манбы маIъашбы кIылда ыхьайхъа гора, явашоохьи деш. Сабара сенбына ишлемишувхьа, авайкIананбы.
Йишин хъийгъийн горуш Калел’ни хивни дагъайдни мактабее илгъечIу. Мактабни завуче ТIагьир Джанаеве ши мактабни сыныфбышиква танышавъу. Маныд эгьес, къийна хивни хаIнни мактабе даркашийвалла вухьайхъа гора, хурни сыныфбышди ушахарше менни хъаIдхъыйни корпусе е ацIаал’ алятIа. Маабыб генгишийвалла дешда. Манчихъа ил’дяакы, маъаIллимарше зигаара гьааъа деш. Манбыше гьагуйни къайдайл’ шыгыртаршис дарсыбы гьеленбы. ТI. Джанаеве ши мактабни буфетейхъаб вуккуйнбы. Мааъад ушахаршис гьелен къуIман одхьуний гьагу. Манкъве мани карее джо вуккеккани гуджнакани назаратыке шас гаф гьавъу. Мааъад къадежйнчике ши разийба авху. Горушни аIхырее ушахаршис ед’ни мизел’ хъигъааIн «Лачын» журналбы битIалау. Манбышис югун хъаIдхъыйбы аIрзуламишау, саламаттамишувхьайнбы.
Манчиле хъийгъа ши хивее тезеда ишилхъа адчыйни китабханейхъа йаIхъ авхъу. Ман ишлемишехьи гидгъылыйн хаIбба вахт дешобна. Манчини ишиква ши китабханачий Рамина Джанаевае танышавъу. МаIнкъыни увгьойка, къийна китабханейхъа хъаIдхъасын китаббы алятIас хаIбба инсанар абайли. Манбы хивын инсанар- маъаIллимар, ушахар вобунбы. Амма шакIле манмеегани китаббышди аIрее йишди язычершинийий шааираршин китаббы хъызаххы деш. МаIгьдын китаббы геледжагъыл’ ши аллесынва Р. Джанаевайс джуваб гьуво.
Гойне ши ФАП-ни сураххъа салламишувхьа. Манчин Калел’ни, Аттални, ДжинаIгъни, , Коршни джаIмаъатна инсанаршина сагъламийваллагозетяаъа. ФАП-ни сиягьей 402 хааIрна инсан, 182 ушах ворна. ФАП-ын вуккеккани ишике гаф гьааъанкъаI манчини хааIрни медсестре Гул’багьар Юсубовае увгьойн: «АIхырейни сенбышее инсанаршини аIрайл’ хаIдда джурабаджура чIырываллабы растына хъайли. Манбы онкологиейн, шакарни диабетын, неврологиейн, гипертониейн чIырываллабы водунбы.Ши манбышис вахт-вахтылийн маалиджебы ыккекка. Ушахаршина сагъламийвалла гозетяаъасдимее вейбар ыIхыйха.Масалан геллесынбышис гриппна чIырывалла девхьесдимее вейбар ыIхы водунбы. Мана иш быкырувхьа дешда. Сенни аIхырейхъассе ушахаршис вакцинабы гьау таамувхьесынбы».
Гул’багьар дохтурни увгьойка, джо хидматааъани бинабышил’ гьабатIанбышин сай ухооханбышиле хаIдда водун. Маныд хивее джаван аилебы кIылда ыхьайква багълыда.
Йишин хъийгъийн горуш ЦIаIхни бинал’ ешемишехьени АIббас Сулеймановыкан ыхьа. АIббас дайийна аиле мигьманаршис гееб гьуIрмат гьааъана вобна. Мана гьамыр хаIбба ушахаршина дек’ ворна. Гадебышда кьоIйре къийна СВО вобунбы. Редакциейн ишчер къавджу, мана геер шадхьана. Манкъве шаке хъидгIынбы гьау. «Нур» кIазетни ишбышике марахламишхьана. Гойне хьинне манкъве СВО гадебышди гьаIкIеена шас хабар гьуво. Манкъуни увгьойка, шукур Аллагьни хаIбвалилхъа, гадебышда саламатийвалла вобна. Манбыше экIда-экIда зегбы гьаъанбы. Джони вазиятна шас хабар гьааъана. Манбыше эйгьен: шу йишда фыкыр гьимааъа. Шу шоле мугъаетувхье, — АIббас дайе увгьо. Горушни аIхырее ши манкъус са букум «Нур» кIазетин гьуво. Маныд эгьес, АIббас дайий йишди кIазетна хаIрна гьаваскар ворна.
Мани йигъыл’ илгъечIуйни горушбышин екунбы редакциейни ишчерше Аттални хивни джаванаршиква ыIхы. Манбыше шаквани горушее къийнийни йигъыл’ джохъад водни сабара мисалабышике гаф гьавъу. Манбыше хивыхъад футбол гьуваагасын майдан, спортзал дехьайке зигаара гьавъу. Джаванаршини увгьойка, гьинчиле сабара вахтна гьихъа хивни клубе тезе спортзал аахъы. Мана иш хивни джаванаршини кумагыка вукку. ГьоIкуматыкен кумаг дехьайхъа гора, гибгъылна иш аIхырейхъамее быкырааъас даIвхына. ГьаIшде тезе аахъыйни залейхъа хаIбба джаванар, мактабын ушахар абайли. Манчихъа ил’дяакы, махъа аблес вуккананбышин сай хаIдын водун. Зал кIылин ыхьайхъа гора, гыргыба алябтIас вааIха деш. Спортзал аляъанкъаI хаIдын кумаг ишкар инсанарше гьуво. Къийна манчис лазымын ыIгьтаджбы алищесдимее алаава кумаг ыккан. Мани карее джаванарше «Нур» кIазетни ишчершике джос кумаг гьаъас хааишау. Манбышин хааишбы ши назарейхъа алятIуйнбы.
Ши Бабаюртни бинабышил’ гуд’мишоохьени йишди халкьыка алгъавгьуйни горушбышиле разийба авху. Умуд гьааъана, манбы гьам джаIмаъатыс, гьамыд «Нур» кIазетис хайирнанбы ихьес.
