«Нур» кIазетин СВО иштыракаъани йишди эл’ни эскераршини гьаIкIее хабар гьоолена иш давамааъа вобна. Манбышди хаIббананбышиква ши кIазет хъаIдаххъанбы танышавъуйнбы. Къийнийна йишда гаф кIынна сержант Мамедов МаIгьач ШаIъбанни духайни гьаIкIее вухьес.
М. Мамедов 1996-ъэсди сен Тарумовкайни районни Юрковкайни хивее хаIбба ушахарнани хизанее едике ыхьа. Манкъуна кок Муслагъни хивейнчена вобна. МаIгьачее едике ыхьайни хивее йыIкьнекин мактаб быкырау. Манчиле хъийгъа, эскерейхъа аркIын. Са сенна Ватанни гьийдын бордж хъуво, хаахъа саркIыл’. Сабара гагьна хааъар ыхьайле хъийгъа, мана мер оIгийл’вуджее къуллух гьавъуйни Амурни вилаетни Екатеринославка хивейхъа саркIыл’. Мааъад манкъве джун цIеддыйн котракт одкIун. Джуна ыIмыр эскерни саIнаъатыс къабсыр.
МаIгьач СВО гидгъылме джуни частыл’ни гьамбазаршиква россиейн торпахбы миллетчершике темизяъасдимее махъа хъары. Къийнар мана мааъар ворна. Гьайни йигъбышее манкъуна, джука воохьени гьамбазаршина вазият ваацIавхьесдимее зы МаIгьачыка связейхъа хъигъечIу. Маныд эгьес ыккан, манкъука саджигее хаIбба йишди элен, цIаIхни халкьын, джаванар вобунбы.
Заквани ихтелете манкъве увгьойн: «Йишди суракена саламатийвалла вобна. Заква воохьени гадебышда вазиятыб югба вобна. Къийна ши гьаIракатыква миллетчершике торпахбы темизяъа водунбы. Гьихъа манбыше аххъыйн хивар гьаIшде ши кIылда-кIылда йыIкьаIлхъа алятIа. Растына хъавайлени дагъамийвал’бышихъа ил’дяакы, душманарше аххъыйн позициебы дагъылмишаъа водунбы. Ши чалышмишоохьенбы манбышда кок йишди торпахбышиле авакIанааъас. Сабара гагьыле манбышасана ахуйн гыргын шагьарбыйий районбы, хивар азадаъасынбы».
МагьаIче вудже вудж СВО джомард эскер хьинне гьагва. Манкъуни дирибашийвалис, хъидаIркьынийс гьамбазарше, джуле чIакIни командирарше гьар вахтал’ ахтына кьиймат гьооли. Мана гьар йигъыс миллетчиршиквани вурушбышей эйхьи. Гьагуйни игитийвалис сикIы МагьаIчыхъад хаIдда гьокуIматни сураке гьувойн наградабыйий таIрифын кагъызбы водунбы.
Манкъве заквани ихтилете джаванаршини аIрайл’ ватанпарварийвалла гуджламишааъасдимее, хаIнни оIлкайлхъан – Россиейлхъан водун аIшкь хаIдхъаъасдимее югун кал’мабы увгьо. ГьаIкIена ватанпарвар инсан гьаммаше Ватан кьорамишааъасдимее гьаIзирра ихьес ыккан. Ненкеджад эскерийвалейхъа ваяхуд СВО хъортIулый гозетяъас ыккан деш. Мана гьар вахтал’ цIеррыйна ихьес ыккан.
МагьаIче гьлекийс хизан къурмишавъу дешобна. Манкъуни увгьойка, даватбы СВО таамхьайле хъийгъа гьувагас. Къийна МаIгьачын хаахъа саркIылый манкъуни дёлесынбышиква, достанышиква саджигее хааъабынбышед гозетяъа водун. МагьаIчихъар едика саджигее хьойре йичийий кьоIйре чодж вобунбы. Манкъуна дек’ ШаIъбан дайий гьинчиле сабара сенбына гьихъа раIгьматыххъа аркIын. Манкъуна джига дженнетей вухьена. Един джан сагъда гьаъан. МаIнкъе гыргын ушахар чIакIы хъавъу. Манбышис декканан гьау деш. МагьаIчна ед’, чуба, йичибы экIба-экIба манкъуква связейхъа хъигъейбачIенбы. Манкъуна, джоква саджигее воохьени гьамбазаршина вазият ваацIовхьена.
ГьаIшде МагьаIч хьинне хаIбба джаванар СВО иштыракчер вобунбы. Манбыше мааъад джона гьаIкIена игитийвалла гьаагва. Аллагье гыргыба манбы гьуваадженбы. Ши йишди сураке СВО экIда таамхьа, гыргын эскерар хайбышейхъа сабкIылый гозетяъа водун.
