Гьар сен февральни 23-чил’ йишди хаIдни оIлкее – Россиейл’ Ватан къорамишааъанбышин йигъ алгъайгьен аIдат водон. Мани йигъыл’ гыргыни эскерн саIнаъатыс къуллух гьааъанбыше, ветеранарше, адамейрше, джегьилерше тентенейква байрам алгъайгьи. Къийна манбышди джаргейхъа СВО иштыракаъани офицераршин, прапорщикаршин ва эскераршин добыд хаIдни гьаIрфбышиква гядакIва водонбы.
Къийнийна йишда гаф, СВО иштыракчийни, Росгвардиейни эскерни , гьагуйни гьаIракатыс сикIы гьокуIматын «За мужество» орденыс лайикьра къаджыйни Аттални хивейнчени Лезгиев МагьаIмаднаIсигь ГьаIмидни духайни гьаIкIеена вухьес.

МагьаIммаднаIсыгь, шаква горушмишхьес вахт тIабалавъуйхъа гора, сагъул. Гъу СВО гьагуйни игитийвалике шахъаб хабар вобна. Дора манчиле гьихъа, ши йишда гаф танышийвалике гивгъалас.
— Зы едике Рутул районни Аттални хивее 1997-ъэсди сен едике ыхьа. Хьодъэсди сыныфейхъамее мани мактабее хъаIдхъы. Манчиле хъийгъа хъаIдхъый давамаъасдимее ДжинаIгъни хивейхъа хъары. ДжинаIгъни хивын йыIкьнекин мактаб быкырауйле хъийгъа, Ватаныс къуллухааъас эскерийвалейхъа аркIын. Эскерийвалла Абаканни шагьарее гьавъу. Манче хъарыйле хъийгъа, къоншу Чечен Республикее Росгвардиейни частыква контракт одкIун. Контракт одкIунни сабара вахтале СВО гидгъыл. Манчиле хъийгъа мааъар ворна. Гуджнара яраламишхьайле хъийгъа, геллесди вахтал’ частыл’ эйхьи.

— СВО ал’гьааIни нени шагьарбышейне гъу ыхьа?
— Йишин часть СВО гидгъылни цIеддыйни йигъыле Запорожьейни вилаетыл’ ыхьа. Ши манче менни джигабышейхъаб гьавайкIанний. Ши эскерарше миллетчершике азадауйни шагьарбышее, къасабабыше саакитийвалла гьувааджи, мааъад водун гьокуIматын объектбы къорамишаъа ыхьа. Манчихъа ил’дяакы, ши гьар йигъыс дагъамийвал’бышиква растына хъавайли вухьа. Украинайни сурале айгьени ракетабыше, пилотдешди иледахани аппаратбыше шагьарбышее вая хиваршее ешемишоохьени инсанаршис диндж гьели дешдий. Манчике энки хаIбна гичI эскераршис вухьа. Манбыше йишди ивийкырыйс, позициебышис хаIйбышейнче гуджнан назаратный ыккекка. Йишди суралхъа гьар вахтал’ басгъынний гьаъа. Ши мааъаб растына хъавайлени дагъамийвал’бышихъа ил’дяакы, миллетчерше аххъыйн гыргын джигабы йишди хылелхъа саъас аIхыйнбы.
— МагьаIммаднаIсыгь, шакIле ацIан, вурушбышди санчее гъу йыIкьра яраламишхьана. Ман нягьаIдне ыхьа?
— Мани йигъыл’ зы гьамбазаршиква саджигее Запорожьейни вилаетни Семеновкайни къасабейний. Эхьалийна вахтний. Постыле бадалвухьасний гьаIзирувхьа. БТР-хъа сабы, баазайни суралхъаний хъигъааI. Заква саджигее хьебыйре мебын гьамбазарыб вобний. Тезебаний машинейхъа гювъур. Эле гьамани вахтал’ йишди суралхъа душманарше аатышау. Ши гыргыба яраламишувхьайнбы. Йишда ёкьудъэсда гьамбаз хъикIуна. Ши манкъус кумаг гьелес гееб чалышмишувхьа. Амма хайир ыхьа деш. ХъетIуйни заралыке мана джигайл’джар хъикIуна. Аллагье раIгьматааъана, геер югна, дирибаш гьамбазний. Манче ши госпиталейхъа хъабы. Хил’дже гагьна маалиджебы ыккыйле хъийгъа, частылхъа сабкIыл. Къийна зы частыл’ ворна. Амма манчихъа ил’дяакы, йизин гьамбазар СВО вобунбы. Гьалекийс джан югда тавулхъа хъидяды, командирарше махъа оIтираъа деш.

— Гъу яраламишхьайнкъаI гьокуIматын вас «За мужество» орден гьуво. Медын алятIуйн наградабы водунбыне?
— СВО воохьени эскераршина макьсад наградабы алятIуй деш, Ватаныс къуллух гьавъуй вобна. Захъад маIгьдын фыкырбы ненкеджад ыхьа деш. Зы чалышмишхьана, командирарше зас гьувойн амырбы быкыраъас. ШокIле ацIан, манбы джурабаджурайнбы ыхьай. Вурушбы ааIни джигее гьар вахтал’ сарвахра ихьес ыккан. Няъас увгьее, къийнийна даIвъий мебна вобна. ГьаIшде душманын валхъа нени сурале аатышаъас ыхьай ацIа деш. Гойне хьиннед, хаIйбышее иледаханни аппаратбышин ненче валхъа бомба вая са медын къутIойкIалан ярах къааъас вухьай шавукIледжад ацIа деш… Орден «За мужество» зас яраламишхьайнкъаI гьуво. Манчика саджигее захъад «Участник СВО» медалыд, таъIрифын кагъызбыд водонбы.

— Ваква саджигее цIаIхбышин джаванар вобунбыне?
— Къийнийни йигъыл’ Чечен Республикени частбышил’ хаIбба йишин гадебы растына хъавайли. Манбыше СВО гигъалассе гьихъа, котракт одкIун ыхьа. Зы эйхьени частылиб манбы вобонбы. Манбы экIба-экIба бадалоохьенбы. Гадебы СВО гьабкIын-хъавайленбы. Зы гьар вахтал’ манбышиква хъызаххана. Манчиле гъайре шахъаб джурайна десте вобна. Маайиб ши санасанкъуква йишонеебахьенбы, вазият ваацIоохьена.

— Йигънимее ватапарвар нена инсанне?
— Йиздимее ватанпарвар Ватанылхъа аIшкь, мугьуIб гьагвана инсан ворна. Манкъуни фыкрее гьаммаше джуна хизан, юрд, хив, район, Дагъыстан, Россия вухьес вуккан. Манчин геледжагъ, къийхъыйн йигъ гозетяъас чалышмишехьена инсан ихьес ыккан. Къийнийни йигъыл’ маIгьбын инсанар гееб хаIбба вобонбы. Манбы девхьайнбыхьий, Россиейхъаб гудж вухьес дешдий. ГьаIшде ши саджигее, санаб вухьайхъа гора, гыргынбышис ши «хьян» гьели. Увгьойни кал’мабышис кьувват гьевлесдимее, са уфтанна мисала абляаъас вуккан. Хылена гудж’ тIубар саджигейхъа садыйнкъа водон. ТIубар джурайданакъаI, хылехъад гудж дешда. Къийна Россиейн миллетбы тIубархьинне сабы вобонбы. Манчихъа горад шаква гьаIшуджар хъооI деш.

— Гьайни йигъбышее ши Ватан къорамишааъанбышин йигъ алгъагьас гьаIзироохьи. Ман цIедда вушин, къийна СВО Ватан душманаршике къорамишааъанбышин, байрам водун. Вахъад командираршис, гьамбазаршис, дёлесынбышис табрикын кал’мабы эгьесда имкан вобна.
— Гьайни йигъбышее СВО гидгъылыйн хьебыдле сен быкырхьес. Мани сенбышее Россиейни эскерарше гееб хаIбна иш вукку. Манбыше хаIм-йигъна миллетчершике Россиейни джигабы темизяъа, вурушбы ыккекка. Эскерарше Ватанна садибийвалла гьувааджи. Адамейрше хьинне джон бордж хъели. Зы гыргыба манбы байрамни йигъыква табрикааъа. Йишди аIрайле абкIыныйнбышис раIгьмат къихооли. Нена няъа ворхьей, сагъра ихьена. ЗакIле са кар ацIа, ши авхъуна йаIхъ гьаIкIена вобна. Шинаб Гъамувхьесынбы!

— МагьаIммаднаIсыгь, зынад йизди сурале вас джанана сагъвалла аIрзааъа. Ваква саджигее йишин СВО воохьен джаванар, эскерар гьийгъанче хъооIни Ватан къорамишааъанбышди байрамыква табрикааъа.
— Сагъул.