Ватан душманыке къорамишавъуй гьар инсанын бордж водун. Ши кьоIбле Ватанан са миллет водун. Россияйс къабни душманаршике къорхунанкъаI, мааъб ешемишоохьен цIаIхбы мана душманыке къорамишааъас сугъооца. Азербайджан къорамишаъас шааъаб ешемишоохьен цIаIхбы сугъооца.

Россиейн Украине СВО алгъайгьен хьебыдле сеныле гьеххада водун. Мааъад Россиейн даIвъий Украинайни халкьыква деш вуккекка вобна. Йишди оIлкайн джон инсанар фашистаршике, укранацистаршике къорамишааъа вобунбы. Эгьес эйхьи, Украинайни торпагъыл’ Россиейква Магъриб вурушмишехьи водун. Къийна айгьен, къудойкIалан маадын ярах хаариджий йишди душман оIлкабышиле хъадыйн водун. Ярахыле гъайре йишди эскераршиква наемникар, НАТО-ни оIлкабышин инстукторар ва офицерар йишди вурушмишоохьи вобунбы. Къийна мед йишди эскерарше нацистаршин, фашистаршин, геяршин оIги водын аххъы. Мана хастаала дюнйелхъа еймишивхьес гьидяасар вобна.
Гьел’бедти, даIвъийн акьва кIарын водун. Манчин хизанбышеехъа ярабыйий нагъбы адайли. СВО къийна медни миллетбышди джегьилершиква саджигее цIаIхбышин джегьилераб кIылба дешобунбы. Манбышин хаIббананбы гьоIкуматни орденбышис, медалбышис лайикьавъу вобунбы. Анджах манбышди аIрее Ватаныс джан гьувойнбыб вобунбы. Манбы миллетни фыкреенче, йикIбышеенче мысаджаб ааIс деш.
ДаIвъийе иштырак гьаъанбышин маIгькамын далы ши — тылылин инсанар вобунбы. Къийна хааIрна-кIыл’на манбышди къайгъвее авхъу вобунбы. Фронтеехъа одхьанни каракван, аляъани кьуIмани палтарыкван ва эскерыс лазымехьени дарманбышикван басиркIабы ва медын ыIгьтаджбы, дезгагьбы оIтираъа. Гьелени ва оIтираъани кумагбышди гьаIкIее ши гьихъа «Нур» кIазете одкIунийн.
Анджах аIсас Ватан душманыке къорамишааъанкъаI, йыкьыIн хев эскерылхъа хъадайли. Азугъунхьа ярахыква хъооIни душманни гьийб манбы илёозар. Мани игитершина сайир Гераев Кьурбан Ибрагьамна дих ворна. Къийнийна йишда макьале манкъуни гьаIкIеена вобна.
Кьурбан Гераев едике 1970 сенни январьни 27-чил’ ЦIаIхни хивее хаIбни хизанее едике ыхьа. Ушахийвалла джуни тай-тушершина хьинне илгъевчIу. Манкъвее ЦIаIхын йыIкьнекин мактаб аIълада тамаъы мана 1993 сен Дербентыни медицинский училищехъа иккечIу. 1996 ман училище таамаъы , фельдшерын санаъаIт алетIы. Гьамани джар сен МагьаIчкъале, Республикайни ушахаршини клинический больницайни реанимациейни шоIъбее медбратна ишлемишехьи гиргъыл’. Мани клинике Кь. Гераев 2001 сенилхъаме ишлемишхьа. Манкъухъаб дохтураршини, чIырынбышди аIрее хаIбна гьуIрмат вухьа. Ишиле мана къекка ыхьа деш менняанкъаI аIл’гьаас. Кьурбане 2001 сен гьаIллаъуйн санаъаIт бадалаъас. Мана ишлемишхьес аркIынна Волгоградхъа къуванан мебель гьаъани цехеехъа. Мааъар мана кьоIдле сенна ишлемишхьа, мебель гьаъан къулай ацIахьа, Липецкни шагьареехъа аркIын. Мааъад манкъве джун хусусы мебель гьаъан цех ачмишаъы. Сен-сениле бизнес аIкьхъыхьа.
Мааъар ишлемишехьенкъаI, Кьурбане хаIббанани инсанаршис кумагбы гьувы. Манчиле гъайре, хаIдда хайирхагь ишбы къадже. ЦIаIхни йыIкьнекни манзикин гьийдын аIйнебенд, манзикна маIгьалла манкъвее гьувойни садакьайква тезелемишаъы.
2020-ъэсди сен Кь. Гераев хизаныква саркIыл’ хъарына ешемишхьес Дагъыстанеехъа. КьоIни сениле СВО гидгъыл. Ватан дареенанкъаI, Кьурбаныке къирагъыл’ илёзарас аIхы деш. МанкъукIле къаджейн гьиджойий дюнйейл’ эхьи. Манкъуни фыкреехъа мед джун цIеддыйн дохтурын санаъаIт хъады. Яраламишоохьен, гябатIан джегьилер къавджуме, мана СВО-хъа джуни гьавасыква аIл’гьаас кьарарылхъа хъары. Манке МаскIавни шагьарее 116 бригаданий СВО-на сааъа. 2023 сенни сентябрьни 7-чил са военный частил’ джуни раазиваликва мани бригадее эскерийвалла гьааъасын контракт одкIун. Манбыше Кь. Гераев са ротайс фельдшерна, гьамыр военный мединстукторна алертIу. Манчиле хъийгъа Подмосковиехъа учебка илгъечIес оIтиравъу. Шака гаф гьааъанкъаI, Кьурбан Гераеве увгьойн: «Хьейибле вазна ши мааъад тактический медицинайн дарсбы полигоне алетIу. Мааъаб Санкт-Петербурггъанче абыйни военный дохтурарше ши хаIбхъавъу, нягьабый яраламишивхьайни эскераршис цIеддыйн кумаг гьелес ва нягьаIбый манбы вуруш ааIни джигеенче хъыгъааъас. Учебка тамхьайле хъийгъа, Донецкни Республикайни Мариупольни шагьареехъа ши оIтиравъу. Мааъаб военный фельдшерна эскерна къуллух гьааъа гиргъыл. Вахтале-вахталхъа ши сергьатыл’ аIл’гьаани вурушбынани джигеехъа командировать гьааъа гибгъыл. 2024 сенни майни 21-чиле 2025 сенни мартыни аIхреехъаме йишин батальон Белгордни, Курскни вилаятбышил, Украинайквани сергьатее душманаршин оIги аххъы илёдзур . Мааъад гьаIкIена даIвъий закIле къавдже. Фельдшер хьинне зы гьаммаше душманыква вуруш ыккеккани ротайква саджигее ыхьа. Мааъад хаIдда кар къадже-къайиххьы. Манчини гьаIкIеедын хабарбы гьаъас зас ыккан деш. Садджу зас гьаман эгьес ыккан , йишди эскерын рыIгь шавукеджад гьакьвараъас аIхас деш. Шакдена, ши душманыле гъамувхьесынбы.
Са элейс гьаIйнягьабна гьаIдиса вухьа: 2024 сенни 31-декабрьна хаIмний вобна. Укранацистарше йишин эскерарнани чIалагехъа ракета авгьу. Манке йишин эскерар яраламишихьа. Приказ залхъа хъабына , са яраламишхьайни эскерыс цIеддыйн кумаг гьелес, гойне мана окопеенче машнеква госпиталеехъа хъалес. Мебна чараа вухьа деш, зы маджбырра ыхьа манкъулхъа оIххъас. ХаIйбышейид душманаршин дронбы шалхъа гьуIджумааъас илийкIар ыхьа. Ши мана яраламишхьана эскер хъыгъайшына гуллейке авгъанче. Гойне мана Белгородни шагьареехъа больницехъа хъыккы. МаIгьар ши мана эскер оIлумыке къадтихьанаъы ва шинаб сагъба авху….»
Кьурбан Гераев кьоIдъэс отпускеехъа къеккана ворна. Са элейс джитIан ветеранын отпуск шаца манкъус гьувы. Гьайни сен боевой мисала гьаIллавъуйле хъийгъа, сыкIылда хыллийн отпуск манкъус гьувы. Ман таамхьайле хъийгъа, мана мед джун Ватанни гьийдын бордж хъелес джуни частилхъа аIл’гьаас.
Кьурбанни увгьойква, къийна одхьунийквана, дарманбышиквана , аляъани палтарыквана, ярахыквана кесетийвалла джохъаб дешда. АIрабирда гуманитарный кумагбышикена пайиб джелхъа гьивийхьарна. Джос гехьан, лазымехьен кар вахтал хъадайлен. Сасса вахтал’ джо илещен палтарыд эхьен. Зигаара гьааъасда джига дешда. Гыргын кар чини къайдалхъа хъады водун. ГьаарункъукIле джуна иш ваацIа вобна ва мана ява-явашба гьаIллааъа вобна.
Йишди игитни увгьойква, джони гьийбна цIеббыйна мисала Белгородни ва Курски вилаетбышиле укранацистар къагьавшуй ва манбышиле гъамувхьа хайбышеехъа сагъба сабкIулый вобна. Кьурбане, эгьес эйхьи, джуна миссия быкыравъуна. Манкъвее йыIкьба яраламишивхьайни эсераршис , Аллагьни кумагыква, ыIмыр тезеба гьувы.
Гьел’бедти, Кьурбан Гераевни гьаIракатбышис, гьунарбышис джуни командирарше , гьоIкуматын ахтына кьиймат гьувы. Мана II дараджайл’ни «За отличие в службе» коксийл’ни лышаныс лайикьаы. Эн хаIдын награда манкъун яраламишхьайни эскераршини едяаршина хайир доъаI вобна.
Аллагье гыргын йишин эскерар гьуваадженбы. Сагъба-саламатба джони хизанбышеехъа душманаршиле гъамувхьа хъавалес ктисматааъанбы!