Россиейн Украине СВО алгъайгьен хьебыдле сеныле гьеххада водун. Мааъаб къийна медни миллетбышди джегьилершиква саджигее цIаIхбышин джегьилераб кIылба дешобунбы.

Манбы махъа контракт одкIун, мобилизациейква, ва джони хагьишыква абкIын вобонбы. Манбышин хаIббананбы гьоIкуматни орденбышис, медалбышис лайикьавъу вобунбы. Анджах джони аIрее Ватаныс джан гьувойнбыб вобунбы. Манбы миллетни фыкреенче, йикIбышеенче мысаджаб ааIс деш. Гьар элеес йишди игитершис гьоIкуматни сурале орденбы, медалбы ва медын мукафатбы гьувойнкъаI, ши шадеебахьенбы ва манбышиле гуянмишебахьенбы.
АIхрейни вахтал’ мани мукафатбышис къоIйре йишда игит лайикь ыхьа, амма мумкум вобна маIхубын игитеер мебынбыб вухьес. Россиейни Президентни кьарарыква хааIрна-лейтенант Малик ГьаIджиевыс вурушбышее гьаагуни игитийвалихъа гора кьоIдъэсын Игитийвалин орден (орден Мужества) гьуво. Маликна кок ДжинаIгъни хивенче вобна. СВО гидгъылийква, мааъар ворна ва манкъухъад командирарше, гьоIкуматни гьувойн хаIдда мукафатбы водонбы. Вурушбышее алятIуйни яраламышхъайбышихъа илдяккы мана мер махъа аркIынна. Эгьес эйхьи къийнийни йигъыл’ манкъве мааъад къаджейни гьаIракатбышис, игитийвалис кьаIгьраман до гьелес эйхьи. Мана Украинайл’ 80 сенна гьихъа таамувхьайни ХаIбни Ватанни даIвийе иштырак гьауна джуна кьаIсда дидейхьинне нацистаршиква вурушмишехьи ворна.
ОIтмишхьайни сен М. ГьаIджиев йишди редакциейна мигьман ыхьа ва манкъве журналистаршиквани горушее джуни ва джуни эскер достаршди гьаIкIее гафбы гьауйнбы. ИншаАллагь, ши манкъуква меб СВО таамхьа хахъа хъарийнкъаI горушмишебхьесынбы.
Сайир гьайни дёлесийвале Россиейни Пезидентни кьарарыква медал алятIуна муслагъалий Наврузов ГьаIджимагьаIммад Джелил’на дих ыхьа. Манкъус СВО гьагуйни игитивалихъа гора «За храбрость» II степени медал гьуво. ГьаIджимагьаIммадыр Малик хьинне СВО гидгъылийква къийнийлхъаме мааъар ворна. Манкъухъад гьоIкуматын гьувойн медын медалбыд водонбы. Манчини аIрее: «Участнику военной операции в Сирии», «За отвагу», «За воинскую доблесть» II степени ва «За заслуги в борьбе с международным терроризмом» ва мдынбы..
Малик ГьаIджиев ва ГьаIджимаъаIммад Наврузов Дагъыстанын къаIгьраманар воб. Манбы йишди миллетинджаб деш, быкырни республикайн ва Россиейн кьаIгьраманар воб. Ши джо алятIуйни медалбышиква табрикааъа ва джос джанана сагъвалла ва сагъба — саламатба хайбышехъа хизанбышехъа гъамеебхьа хъавалес кьисматааъанбыва эйгьи.