Йишди миллетихъаб идманчер олимпиадайн чемпионара девхьейиб, амма дюнйен, Авропайн, Россиейн ва Дагъыстанын чемпионар кIылба деш вобонбы. Манбышиле ши гьаммаше гуянмышеебахьенбы ва манбы гьуIрматука вобонбы. МаIгьабын идманчер щахъаб Дагъыстанее, Азербайджан ва Россиейни джурбаджур вилаетбышил’ вобонбы.
Югна идманчий ихьесдимее, ушахе кIыл’валикеджад маIшкьаъа гигъалас ыккан. Манчихъа гора манбышис лазымын шарааитбы яратмишаъас ыккан ва кумагбы гьелес ыккан. Шагьарбышее ман шараитбы водонбы, амма хивршее дешинбы. АIхреейни сенбыше йишди джаванарше джоджад джосын идманыква маIшкьулувхьесын шарааитбы яратмишаъа гибгъыл.
Сабара вахт вобна йишин джаванар фтболуква маIшкьулба ва цIаIхбышин футболын чемпионат алгъайгьен. Манчиле савагьийда майни вуза ветеранаршис къадсырийн турнир гьар сен алгъайгьи.
Йишин джаванар футболыле савагьийба медни идманбышикаб маIшкьулба вобонмы ва мани сардан джосын шараитбы джоджад яратмышаъа.
Масалан, Бабаюртни бинабышди санчил’, СПК «Ленина» тасарруфатни клубын са утагъ ремонтаъу ва мааъаб идманыква маIшкъгьаъа гибгъыл. Мани Fight club eagle top «Babayurt» дона клубна маIшкьчий Багьавудин Джанаев ворна. Манъкве уIл’джумни хьебни йыъее джаванар грепплингыс, ММА ва медни сичIокарни идманбышис гьазирааъа.
Багьавудинни увгьойква, джони спртзалыс ремонтаъас, махъа лазымын карбы алишес кумах СПК «Ленина» донани тасарруфатни хаIрынкъве Исакь Балаеве гьуво, гойнед джуни ва саабара медни джаванаршди кумагыква ман джига хъаъы.
«Манчиле савагьийда шас кумаг «Нур» кIазетни Общественный советни суракке ыхьа. Манбыше спонсор Павел Высоцкийни кьул’пеенче 50 аазыр манат пылна идманын ыIгьтаджбы алищес шас гьуво. Маничихъа гора, зы цIедда Павел АндреевичыкIле, «Нур» кIазетни cоветыкIле, Мамед МамедовыкIле сагъулва, эйгьи»,- манкъве увгьо.
Са сенни аIрее Багьавудине идманыква хаIбхъаан ушахар республикайни, Россиейни ва быкырдюнейни ярышбышее иштыракбы гьаъу, мааъад ахтыйн джигабы аххъый. Манбышди аIрее Нураев Шамил’, ШаIгьбанов МагьаIммадаIлий, ШаIьбанов МагьаIммадрасул, АIбдулкьадыров ГьаIджимурад, Исрафилов Басир, АIлиев Сейид ва мебынбы вухьа.
Умуд гьааъана Fight club eagle top «Babayurt» клубни идманчеерше гьалед ахтыйин джигабы аххъы ши шадаъасынбы. Ши манбышди тренерыс Багьавудин Джанаевыс ва джуни идманчеершис угъурбы арзуламышаъа ва джо дюнейн ва олимпиадайн чемпионар вухьай гозетъааъа.
PS- Гьайни материалена шикыл’ «сагъна шикыл’» вобна. Мани шикыле видео материал водон. Вушди телефонехъа SilicaAR программа гивхьу(скачать) манчихъа иляккас вухьесынбы.
Байрам АIбдуллаев
