ИлгъечIуйни уIл’джумее «Нур» кIазетни редакциее мигьманаршикван хаIдын горуш илгъечIу. Гьини элесын редакциейн мигьманар Рооссиейни йиван йаIхъбы аляаъани кьувватбышин эскерар вухьа. Манбы Абаканни шагьаре 556-ъэсди йивани йаIххъыл’ йигъааIр аляъани джурайни батальонын эскерар вухьа. Йигъынджах Россиейни йивани йаIхъбышди кьувватбышис къадсырыйн ыхьа.
Мани частыл’ джурабаджурайни сенбышее Асланов Кьурбане, Асланов Надире, АIшураIлиев Наримане, Кьасумов Рашиде, Лезгиев МагьаIммаднаIсыгье ва сабара менни цIаIхбышди джаванарше эскерийвалла вукку. Джаванаршиквани горушейхъа батальонна офицер, подполковник Мамедов Азер Забибулагьна дих ва манкъуна ёлдаш Мамедова Ольга Леонидна йишыб абы вухьа.
Редакциейна маджлис кIазетни хааIрни редакторе Байрам АIбдуллаеве ачухавъу. Манкъве джуна гаф редакциейхъа абыйн мигьманар байрам табрик гьавъуйква гибгъыл. Манчиле хъийгъа, манкъве редакциейни ишни гаIкIее аIтрафлы маIълумат гьуво.
Манкъве джурайда къийна «Нур» кIазетни редакциейн цIаIхни халкьын таарых, манбышда миз , маданият, адабият, миллетна садибийвалла гьувааджесдимее къеджени ишбышди аллан хабаравъу. Гойне хьинне увгьойн: «Къийна кIазетын цIаIхни халкьнимее хаIбна иш вуккекка. Гьайни дёлесийвалей кIазет хъигъааI гидгъылыйн хьебцIал’ сен быкырхьа. Манаб кIыл’на вахт дешобна.Мани сенбышее кIазетни джузбышее хаIдда йишди халкьни таарыхыква, манбышди маданиятыква, доюквани инсанаршиква, ааIлмаршиква, ед’ни мизеква, ветеранаршиква ва сабара менни ишбышил’ ишлемишоохьени инсанаршиква багълыданан макьалабы чапейнче къайиккы. Манчиле савагьийда редакциейни ишчерше йишди миллетыхъад водни ва растына хъавайлени джурабаджурайни дагъамийвал’бышике хабар гьооли. Мани саягъылидын мисалабы ши республикайни чIакIынбышилхъа, къуллухчершилхъа гьихьараъанбы. Гедж гьидяу чараа къооджена. АIхырейни вахтал’ ши хаIдда материалбы йишди СВО воохьени джаванаршис къайсар. Манбыше вурушбышее гьагвани игитийвалике, джомардийвалике кIазет хъаIдахъанбы танышааъа. Редакциейн экIда-экIда манбышикван горушбы алгъайгьи. ГьаIшде ши алгъайгьен горушыд манчини джаргее водон».
Подполковник Азер Мамедове эскерар саджигейхъа савъуйни алла редакциейс миннатдарийвалла агъмишавъу. Манкъве джун ихтелет танышийвалике гидгъыл.
— Йизда кок Къалални хивейнчена вобна. Мана Закатала районни сувабышди этакыл’ алявъуна уфтанна хив вобна. Советни девырей хивын джамаъаIт дюзилхъа кочмишгау. Мааъаб тезе АIли-байрамлыйна хив къурмишувхьа. Къийна манчин до Дагълы водун. Мактаб быкырауйле хъийгъа, зы хъаIдхъас аркIын. Йивани йаIххъын военный училище таамау, ишлемишехьи гиргъыл’. ЦIерра зыТюменни шагьарее ишлемишхьа. Мааъар зы хаIрра аху деш. Манче зы Абаканни шагьарейхъа 566-ъэсди йивана йаIхъ цIыцIааъани частылхъа къахову. 25 сенна мааъар ишлемишхьа. Къийна редакциейхъа сабыйни йишди эл’ни джаванаршиква мани частыл’ хидмат гьааъанкъаI танышхьа. Манбы джурабаджура сенбышее зы эйхьени частыл’ эскерийвалла вуккуйн джаванар вобунбы. Аллагье джо гьуваадженбы. Манбышда гьаарна ахтыни доюс лайикьна джегьил ворна. Манбышди гыргынкъве уфтанба, адамейрше хьинне эскерийвалла вукку, хайбышейхъа сабкIыл. Зы манбышике рязийра ворна. Манбыше эскерийвалла быкыравъу абкIынейиб, ши алакьабы акIанаъа деш. ЭкIба-экIба связейхъа хъигъейбачIенбы. Зы Дагъыстанейхъа арыйнкъаI хъызааханбы.
А. Мамедовыхъаб цIаIхни халкьын аIдатбы гьувааджен гееб уфтанна хизан вобна. Манкъуни ёлдаше Ольга Леонидна йище джуква саджигее частыл’ къуллухавъу. Манбы танышувхьа, хизан къурмишавъу. Манбышихъаб ёкьуйре ушахар — кьоIйре ичийий кьоIйреб гадебы вобунбы.
Надир Асланове вуджее эскерийвалла гьааъани сенбышике гаф гьааъанкъаI увгьойн: «Мамедоваршини хизаныква зы дёлесвалейнче танышра ворна. Эскерийвалла вуккекканкъаI манбыше зас хаIдда югун гьау. Манчихъад сергьадбы дешинбы. УIл’джуме са элес Азер дайей зы джонкъаIхъа мигьманийвалисний хъойтIална. Зале хъийгъа, мани частыл’ хаIбба йишди элен джаванарше хидмат вукку. Манбышед Мамедоваршини хизанни гьаIкIее саджу югун йишонаъа. Къийна манбы МагьаIчкъалейхъа абыва къайиххьы, зы геер шадхьа. Няъас увгьее, манбышиква дёлесвалейнче хъызаххы. Гьини саягъылин горуш тешкил гьауйхъа гора, «Нур» кIазетни редакциейс сагъул эгьес ыккан.
МагьаIммаднаIсыгь Лезгиевейид эскерийвалла А.Мамедов ишлемишехьени частыл’ вукку. Манкъвее эскерийвалла быкыравъу хъарыйле хъийгъа, Росгвардиейни частыква контракт одкIун. Къийна мана СВО иштыракчий ворна. Гьинчиле сабара вахтна гьихъа мана адкIынни вурушбышди санчее йыIкьра яраламишхьана. Мааъад гьагуйни джомардийвалис ва игитийвалис мана гьокуIматын Жуковни орденыс лайикьра къаджы. Абаканни шагьарей эскерийвалла вуккеккани сенбышда гаф гьаъаанкъаI манкъве увгьойн: «Эскерийвалийн сенбы зы ненкеджад кIелиханаъас деш. Мамед дайей зас гьавъуна югвалла къийнад йизди йикIел’ авху вобна. ЗакIле мана гьаIкIена офицер хьинне ацIа. Манкъве Дагъыстанейнче эскерийвалла гьааъас хъабыйни джаванаршини бале аху. ЦIаIхни миллетни джаванаршис мана офицер деш, дек’ ыхьа. Аллагье джун, джуни ёлдашин джан сагъда гьаъан».
А. Мамедовни ишлемишехьени частыл’ энки аIхырей эскерийвала гьааъас Нариман АIшураIлиевысый Рашид Кьасумовыс кьисматхьа. Манбышед мани хизанни гьаIкIее геед абырыкван ихтелет гьау.
Мани йигъыл’ горушейхъа сабыйни менни мигьманаршед А. Мамедовыке, манкъуни дирибашийвалике, эскераршис гьувойни кумагыке, маIърафытыквани хизаныке гаф гьавъуна. Манбышди гыргынбыше манбышис югун дилягбы гьеххъы.
Къийна Азер ва джуна ёлдаш Ольга Мамедовар пенсией вобунбы. Манчихъа ил’дяакы, адамийий хьунаще ишдена гивийъар деш. Къийна манбыше частылни музейис хаIбвалла гьааъа. Манчиле савагьийда частни ветеранаршини ташкилатын ишбы ыккекка. ,
Горуш алгъаъаI летти А. Мамедов Абаканни военный комиссариатни хаIрынкъулхъа зенг гьау. Манкъве редакциейн джоква саджигее алгъайгьени горушыке джуни гьамбазыс хабар гьуво. Военный комиссариатни вукIлелинкъве джуни ихтилете Дагъыстаныс салам къахову. Манкъве джурайда цIаIхбышди миллетыс югун эскерар чIакIы хъавъуйхъа гора, миннатдарийвалла агъмишавъу.
Мани йигъыл’ аIкьананчен мигьманар горушейхъа хыл’ кьаIраб абы деш. Манбыше джон часть къурмишхьайни 45-ни сениква багълыда къайиккыйн медалбы ады. Наградабыйий грамотабы джо ишлемишувхьайни частыл’ хидмат гьавъуйни эскераршис гьуво. Джаванаршис частни чIакIни командирарше одкIунийн таIърифын кагъыз хъаIдхъы.
Горушни аIхырее мани йигъыл’ редакциейхъа сабыйнбыше маджлис алгъавгьуйс сагъул увгьо. Подполковник А.Мамедове «Нур» кIазетни редакторыс Б.АIбдуллаевыс, редакциейни коллективыс джо вуккеккани ишис ахтына кьиймат гьуво. Манкъве шу цIаIхни миллетын до, манбышин геледжагъ гьувааджесдимее гееб хаIбна иш вуккеккава къейдау.
«Нур» кIазетни редакциейн абыйн мигьманар мысаджаб хыл’ кьаIраб къоока деш. Манбышихъад гьаммаше едигарысын пайбы эйхьенбы. КIазетни хааIрни редакторе Б. АIбдуллаеве абыйн мигьманар Дагъыстанни ва цIаIхни халкьни шааирарше ва язычерше одкIунийни китаббышиква шадавъу.
Редакциее илгъечIуйн Россиейни йивани йаIххъыни кьувватбышис къадсырыйн горуш саджигэйни шикыл’бы ыхыIйка таамхьа.
