Сувал’ни маIгьалыл’ эн четинна поштина йаIхъ Гыл’мецIни хивеенче Лекани хивеехъа аIл’гьаана вобна. КьыIдимына йизбы гёгъыйнкъаI, ыкIекIбыше, савругбыше мана къацIаакIван. Юххьан гуджнакан гёгъыйбы гёгъыйнкъаI, мани хивеехъана поштина йаIхъ селерше гьоогъал. Лекын джамаъаIт гьаIфтабына алаакьабы дена ахва. ЦIеббыйна дагъамийвалла мана вобна .

Лекахъа аIл’гьаана йаIхъ не районни, не республикайни, не федерал йаIхъбышди балансе гивъур дешобна. Манчихъа гора махъа аIл’гьаана йаIхъ гьаммаше темизяаъа деш. Инсанарше сасса вахтал’ Гыл’мецIанче охьанасын кар йыIкьал’, нейид аIмалершил’, балканаршил’ тIашмишаъа. КьоIдъэсыб , мани дерайле хъооIна Лекагъанна дама гейд тюнт’ хассятбынана вобна. Гёгъыйбы гёгъымее, мана фелякбышеенче хъооI гивийгъал. Манчин чина арх бадалааъа. Гьихъа хъадыйн аттамадж, къаейке алявъуна бенд’ гьичIибхыр авайкIанна.
Мани дагъамийвал’ни гьаIкIее ши гьихъа «Нур» кIазете хьуленихье элейс одкIунийн. Къийна лекбышди джамаъаIтыхъаб инямыквана шадна хабар вобна. Манчини гьаIкIеена шас хабар Гыл’мецIни хивни имаме АIсадуллагь гьаIджее гьувы. Манкъуни увгьойква , къийна Лекахъа аIл’гьаани поштини йаIххъыл’. Лекагъанни дамайни оогъанче маIгькамна , гыргын тиклийн усулбы гозятяуна бетоннайий йивана йыIгъ аляаъа вобна. ЦIедда няайий гивхьесын джига тIабалаъы, манчис проект гьазираъы, устадар савъу, техника махъа хъады. Мана иш гьаъас джолхъа районни йаIхъбышди ташкилатни хаIрункъвее ШаIфий АIбдулаеве алебтIу. ХаIм-йигъна, мыкIа хъихьессе йаIххъын устадар ишлемишоохьи вобунбы. Гьайни дёлесвалее ман вааджибын объект таамхьесын. Мана йыIгъ алявъуйле хъийгъа, поштини йаIххъыква багълыбанана дагъамийвалла таамувхьесда ваяхуд кIыл’хъивхьесда.
Гойне АIсадуллагь гьаIдже Лекни, Гыл’мецни хиваршини джамаъаIтни дойиле ДР-ни Халкьни Маджлисни депутатылхъа ШаIфий АIбулаевылхъа мана суваабыквана иш гьавъуйхъа гора миннатдарийвалла агъмишавъу ва джанана сагъвалла Аллагьыке гьевхъу.