Гьайни йигъбышее МагьаIчкъалайни шагьарее «Миллетбы хаIдда – оIлка са» гьар сенийн республикайн конкурс илгъечIу. Конкурс республикайни милли сиясатни ва динни ишбышди министерствайн алгъавгьу.
Мааъад республикайни шагьарбышейнче ва районбышейнче абыйни фольклор дестебыше, , ед’ни мизел’ шечIбы хъаIдаххъанбыше ва сабара мебынбыше иштыракау. Манбыше гьийгъанче гьихъа конкурсейхъа йаIххъыл’ гьауйни ишбышин екунбы ыккы.
Манчис къадсырыйн йигъынджагъ сабара гагьна республикайни милли сиясатни ва динни ишбышди министерствайс хаIбвалла гьаъани Темирлан Абуталимове ачухау. Манкъве махъа сабыйнбышис хошгелдий гьавъуйле хъийгъа, увгьойн: «Къийна ши хаIдын шадлыгъ алгъайгьи. «Миллетбы хаIдда – оIлка са» конкурсын екунбы ыккекка. Манчина макьсад Дагъыстанее ешемишоохьени миллетбышин аIдатбы, гюъур-сугъооцый, манбышда ед’на миз гьувааджий вобна. Конкурсейхъа хаIдда джурабаджура ишбы йаIххъыл’ гьау. Манчинии аIрайл’ югунбысечмишау. Конкурсее иштыракауйнбышис, югун джигабы аххъыйнбышис угъурбы аIразаъас ыккан.
Т. Абуталимовыле хъийгъа Дагъыстанни Халкьни Маджлисни депутатарше, къуллухчерше, конкурс тешкиляуйнбыше чыхышбы гьау. Манбышеб конкурсни иштыракчершис ахтына кьиймат гьуво.
«Миллетбы хаIдда – оIлка са» конкурсее иштыракаъанбышди аIрайл’ Тезе Муслагъни йыIкьнекни мактабни хьодъэсди сыныфн шыгырт Магьмудова Аминатыр йихьана. МаIнкъее шааир Наргиз Раджабовае цIаIхни мизел’ обкIунна «Эскерна ед’» шечI хъаIбхъы. Конкурс тешкилявъуйнбышис маIнкъее хъаIбхъына шечI кьабыливхьана. Конкурсее гъамувхьайни 14 шыгыртаршис дипломбыйий пылыкван сертификатбы гьуво. Манбышда сайир Аминат йихьа.
МаIнкъее заквани горушее увгьойн: «Зы мактабее алгъайгьени хаIдданани конкурсбышда, олимпиадабышда иштыракчий ворна. «Миллетбы хаIдда – оIлка са» республикайни конкурсее цIедда иштыракаъа. Гьинчиле кьоIдле сеннагьихъа «Эскерна ед’» шечI цIебба Калел’ни хивни йыIкьнекни мактабее «Нур» кIазетин алгъавгьуйни конкурсее хъаIбхъы ва гьаIшде республикайни конкурсеехъа къахву. Къийна диплом алябтIува зы геер шадра ворна. Геледжагъылид мани саягъыл’ни конкурсбышее иштыракаъасын».
Аминат хьодъэсди сыныфна шыгырт ворна. МаIнкъее мактабейид югда хъаIдаххъа. МаIнкъыс дарс гьелени маъаIллимар джегьил’ичийни ацIааликейий тербиейке гьаммаше разийба вобунбы.
Ши Аминат алятIуйни дипломыквайий сертифатыква табрик гьейъа. МаIнкъыс геледжагъыл’ югун хъаIдхъый, джанана сагъвалла, манчиле чIакIни конкурсбышее иштыракаъас аIрзаъа.
