Гьайни сенни октябрьни ючIунчил ХаIбни Ватанни даIвъийе Кавказни аллани вурушее немецни- фашистаршин къошунбы дагъылмышаийн мол’цIале кьоIдле сен быкырехьи. Мани гьаIдисайн Советни гьоIкуматна кьувват, Ватан къорамишааъанбышда игитийвалла, кьаIгьраманийвалла гьаагу.

Кавказни аллан вуруш1942 сенни июлни 25-чиле 1943 сенни октябрни 9-чихъа меега цIыцIахьа. Вермахтна аIсас макьсад Кавказын наIвутука болун Грозный ва Баку шагьарбы аххъый ыхьа. Гойне манбышди фыкрее КIаарни дерйагьни къирагъыс ва Закавказиейс назарат ыккый ыхьа. Германиейс даIвъий давамаавъуйниме наIвут геед ваджибданий.
Гитлерни чIакIни генераларше «Эдельвейс» донан план къурмишау. Манчина метлеб наIвутбышди маIъданбышисхъана йаIхъ абчый вухьа. Мани операциее вермахтни машгьур къошунбыше иштыракау. Амма советни эскерарше , ерры джаIмаъатын, партизанарше фашистаршини уIджумбышин оIги ыIхы.
Советни эскерарше, офицерарше, халкьни ополчениейн, аади инсанарше мыга-мыгас гьуво гьаарна сувал’на видер, гадиг ва кьул’ къорамишау. Мааъад хаIдын гьунар хьебни армиебышди эскерарше ва Къузайл’ни Кавказни ва Закавказни фронтбышди эскерарше гьагу. Вурушбы дагъамни шарааитбышил’ аIл’гъаа ыхьа. Манбы гьам гьавайка, гьамыд джигайква багълыданий.
Кавказни энки ахтыйни сувал’ни кьома немцарше рейхын байдах кIяхы. Анджах сабара йигъбышиле советни эскер-альпинистарше душманаршин лышанбы гьыIгъяккарау ва чIаIран байдах къалхмишау.
Кавказыл’ немецни-фашистаршин къошунбы дагъылмишаий Гитлерниме хаIбна зарба вухьа. Немцар ваIшбышиква ярахын техника гьадсыр йыIкьалхъа цIыцIавхьес маджбырувхьа. Мааъаб манбышин хаIбба эскерар гьалакувхьа. Угъадукани Кавказни мудафиейн душманыс советни наIвутулхъа хыляаъас аман гьуво деш. Манчика душманын даIвъий давамааъасын имканбы кIыл’хъыхьа.
Кавказыл’ни гъамувхьайн Советни гьоIкуматын гунайл’ни флангбышейдын позициебы утIумау ва хъийгъийни гьуIджумни операциебышис — Крымылхъани, Украинайлхъани ва Машрыкьни Авропайлхъани шарааитбы яратмишау.
Мол’цIалиле гьеххан сенбы адкIынейид, Кавказни аллани вурушин кьаIгьраманар къийнаб йикIел’ вобунбы. КьаIгьраман-шагьарбышее ва Къузайл’ни Кавказни гьар джигабышее едигарын маджлисбы илгъечIи, гьайкалбышди гьихъа тIетI’бы гийхьи, ветеранаршикван горушбы алгъайгьи.
Мани шадлыгъбыше йыIкьале хъооIни насылбышин ватанылхъан аIшкь гьеххаъа. МыцIа маIгьадни гьаIдисабышди едигарын оIлкайни таарыхылхъана ва кьаIгьраманаршилхъана гьуIрмат къурмишааъа.
Кавказни аллани вурушни вахтал’ йицIни аазырыле агъаллан дагъыстанныбы джони хагьишиква фронтейхъа абкIын. Душман Ватанылхъа къидяйкыйниме хаIр-кIыл’на сугъоцу. 27 аазыр миллетын игит духйебы ва йишба «Кавказни мудафиейс» медалыс лайикьба къавджу. Манбышди аIрее йишди миллетын эл’черыб кIыл’ба дешобунбы.
Къийнаб дагъыстанныбыше Украинайл’ аIлгъаани СВО джона игитийвалла тасдикьааъа вобна. Мееб Россиейн эскерар душманни миллетчершини идеологиейка растына хъабы. ШакIле ацIан, ши гьаIхълыба вобунбы ва шакдена ши гъамувхьесынбы!