Йишди республикайни марказе 3-5 октябрьни йигъбышил’ « Тарки-Тау — 2025» Къузайни Кавказын 13-ъэсын китаббышин гьагуй илгъечIу. Гьайни сен мана ачухни хаIйбышик’ авуб, Пушкинни дойил’ни кучееъаб вухьа. Китаббышис къабсырна маджлис РФ-ни ракьам артымишаъани министерствайн, ДР-ни маIълуматни ва чапни агенствайн, «ХъаIдаххъана Россия» ассоциациейн, МаIгьачкъалайни шагьарни администрациейн, «Дагъыстан» журналын , Яндекс Китабын ва «Алеф» чапханайн къурмишавъу.
Китаббышди фестивалее иштыракаъас джони чапни малака РФ-ни субъектбышиле , шагьарбышеенче чапханабышин эл’чера , редакторар, корректор; шааирар, язычер ва адабиятыс кьиймат гьоолен устадар абы.
Китаббышин гьагуй октябрьни 3-чил’, уIлджумани йигъыл’ саъаIт 10-чил’ ушахаршини тамашейква «Огни Тарки-Тау» гибгъыл. Манчиле хъийгъа , маджлис «Дагъыстан» журнални редакторе Марат ГьаIджиеве ачмышавъу ва вукку.
Китаббышди фестивальни ачылышее Дагъыстан Республикайни регьберарше, чIакIни къуллухчерше, МаIгьачкъала шагьарни хаIрункъвее , «ХъаIдаххъана Россия» программайни регьбере Михаил Фаустове ва мебынбыше иштыракау. Фестивалеехъа сабыйни джамаъаIтни гьийд ушахаршини хореограф ансамбылин «Сувабышин ушахар» дагъыстанни миллетбышин мыкIар гьагу ва маIънийбы гьекIу.
Манчиле хъийгъа китаббышди гьагуйна «Тарки-Тау — 2025» тадбыр гибгъыл. Мани йигъыл’ истолбышил’ уфтанын , гьар жанрбышин китаббыйий гёку. Манчини аIрее ушахаршини адабиятын, поэзиейн, прозайн, публицистикайн, драматургиейн , фантастикайн, ыIлимын, динбышди гьаIкIеедын китаббы ыхьа.
Китаббышди ярмаркеехъа абыйни чапханабышди чIакIынбыше, шааирарше, язычерше джон китаббы тагдимау.
СаъаIт 15-чил’ Дагъыстанни китаббышди чапханайни 100 сенийни юбилейис къадсырыйн презентацие илгъечIу. Манбыше аIхреени сенбышее джо къайиккыйн китаббы гьагвеехъа ады.
Манчини аIрее цIаIхбышди шааираршин Муса Фаррухын «ЙикIен аIраз», Валегь Гьамзаевын « КIаарна биссий», « Ааазырый са хаIм», язычийн Кьурбан Омахановын «ЙикIеедын сирбы» ва медынбы ыхьа.
Дагъыстанни китаббышди издательствее ( ДКИ) гьоIкуматни харджийбышиква 10-12 киттаббы цIаIхбышди шааираршин, язычершин едини ва урусни мизяршил’ одкIунийнбы къайиккы.
ДКИ- ни 100 сенийни юбилейис къадсырыйн аIтрафлы чыхыш директоре Марина ЫIмаровае гьаъы. МаIнкъее джони гьийдыни пIланбышди гьаIкIеена хабаравъу.
Шениса майдама «Дагъыстанна заIъыфа» журналын презентацие илгъечIу. Мана маджлис журнални редакторе Хамис Шамиловае вукку. Журналын ишчера табрикааъан чыхыш «Нур» кIазетни хааIрни редакторе Байрам АIбдуллаеве гьаъы.
Гьамани джад йигъыл’ Надежда Тузовае одкIунни «Гъамувхьайн маляикар» китабын презентацие илгъечIу. Манчина маджлис « Дагправдайни» хааIрни редакторе вукку. Кырыгяххъас сабыйнбышис китабни гьаIкIеедын маIълумат авторе гьувы ва хъийгъа Н. Тузовае мухбираршини суалбышис джаваббы хъуво.
Хьебыдле йигъна китаббышди фестивалее презентациебы илгъечIу , тамашейс концертбы гьагу, шечIбы йикIеке ушахарше, чIакIынбыше ва авторарше хъаIдхъы. Абыйн мигьманар гьиняани китаббы чапаъанбышди, шааираршини, язычершини ишбышиква ва къулайбышиква танышивхьа ва джон гьаIракатбы йишинбышикIле гьагу.
Гьел’бедти, китаб ацIаалин кегьриз водун. Манчина гьуIрмат , дараджа дяацIани инсаныхъаб, гьоIкуматыхъаб къийхъийни йигъылхъана умуд дешда. Китабын миллетбы хъобкуни йаIххъылхъа сааъа ва каамиляъа.
Гыргынкъус югун гьелен!
