ЦIаIхбышихъаб мисала вобна:«КьыIдмийсда хизаг юххьан гьазирааъанаки». Эле мана мисала йишди республикайс ааидна вобна. Гьиняаъаб не юххьан хизаг гьазирааъа деш, не кьыIдмина мани хизагыква гивийгIан деш.
Сенис газыква, ишхеква, хьинеква багълыбанана дагъамийвалла республике абатIа-кIябатIа деш. Хьулелле ташкилатбыне ачмишаъы, хьулелле ташкилатбыне багъламишхьа, хьулейре регьберарне гивхьу мани ташкилатбышис хаIбвалла гьааъас, хьулейрене авакIанавъу ва манбышис диванбы къацIадкIун. Анджах иш хъобкуни къайдалхъа хъааъас дявхыIна.
Къийна республикайни марказе ман дагъамийвал’бы воднанкъаI, районбышее, хиваршее нягьаIд эхьие!? Гыргын кар, йишди увгьойква, оони утагъбышее иш хъобкуба вуккейс даIвхий вобна.
Ши гьар сен мани дагъамийвал’бышди гьаIкIее «Нур» кIазете ойкIанан. Сувал’ни маIгьалыл’ мани дагъамийвал’бышилхъа сайиб илёока – поштина йаIхъ утIумоохьи.
Къийна хаIббанан цIаIхбы МаIгьачкъалэй ва мани шагьарни гьихъийаллани поселокбышее ешемишоохьи вобунбы.
Са уIл’джумна гьихъа, сура МаIгьачкъала паралидж вухьа. КьыIдимни йыIкьнее газбы, ишихбы, хьянбы къацIадкIун. Манчина сабабыб джамаъаIтыкIле хъобкуба ваацIа девхьана. КьоIдле йигъна Семендер ешемишоохьен инсанар хъибгъырийнбы. ЧIакIынбышис гьале са тегьер гьааъас вааIха, чагъабы, хурун ушахар, чIирынбы, кьаIсинбы няхъане гьааъас!?
ХаIббанани инсанарше ишхен, газын, хьинен пыл вахтал’ хъелен. СыкIылда геджхьамее, ооъа пеня хъадайли, контролерар абы аккана някьв илёощи. Амма ишихбы, хьянбы, газбы къацIадкIунмее, манчин джаваб хъелесда авааки деш.
Вахтал’ ремонтбы гьаъа деш, кьыIдмийс гьазироохьи деш, гьаманчихъа гора сыкIылин мыцбы, гёгъыйбы, мыкIаал’бы ыхьамее шагьар кутёохьена.
Къийнаб гьаIмагьабна джаб вазият вобна. Гагь газ авайкIан, гагь ишихбы къацIайкIван, гагь хьян хъеххъва.
Декабрьни 16-чил’ ДР-ни правительствайна садры АIбдулмуслим АIбдулмуслимов республикайни газ , токIан иших , хьян къеккани компаниебышди чIакIынбышиква ва сабара гьуIкумни ташкилатбышди регьбераршиква хъызаххы.
ДР-ни премьер-министрее АI. АIбдулмуслимове джун чыхыш республике кьыIдим эчIуйква ярамишивхьайни дагъамийвалике гидгъыл. АIхреени уIл’джумее инсанаршике хаIдда зигарабы хъады. Манбышди увгьойква, шагьарни районбышее ва посёлокбышее ишихбы, газбы, хьянбы дешинбы.
«Аккас мыкIана къыIдмийна гьаваа. Шагьареедын ва районбышеедын токIан ишихбы, газбы, хьянбы кьаралилхъа хъаляъасдимее программа кьабылявъу ва чIакIын пылбы къайиккы. Июле, августе ишбы гьидяъы, декабырылхъа гьадсыр. Инсанаршил’ маIгьаб мугъаетоохьен кар дешодун. Гьаарни къуллухчийни ишис ши джурайна кьиймат гьевлесда ва тахсирнанбышис оIлчи алетIасын»,- АI. АIбдулмуслимове иджласеехъа сабыйнбышикIле увгьо.
ОIтмишхьайни уIл’джумын гьагуйн республикайни ешайиш- комунал тасарруфатни къурлушин «кIиваIн джигабы» Мани тасарруфатни къурлушин 70 фааиз йиссе хъыхьа , кIыр-кIыреенче хъигъечIу водун. АIхреени сенбышее мани дагъамийвалиле ооъаб ишлемишоохьи вобунбы. Федерал кумагдена республикайна гудж хъавалес деш ешайиш-комунал тасарруфатын къурлуш къайдалхъа адчес ва манчис чIакIын харджийбы гьаъас. Манчинимеега цIебба вахт вуккан, хъийгъаб гыргын кар тезелемишаъас ыккан. Сенис дареехъа абкIымее ямалыхбы гьаъанбы, мед гьаваа къумаъабкIымее кIелийхананбы. Анджах манчиква багълыданан дагъамийвал’бы юххьаныд, къыIлинад, цывлихъад эхьенбы. Сен- сениле шагьарбышин агьалий хаIдхъехьи, хайбы ва медын бинаабы хаIдхъехьи, анджах ешайиш-комунал тасарруфатын къурлуш няаIгьадый 30-40 сенна гьихъа ыхьа, гьаIмагьдыд аху водун. Гьамани джад гьаIлал’ шагьарбышеена , посёлокбышеена каналицациейна система вобна. Са гуджнан гёгъый ыхьаме , шагьар чIаIпал’ни хьинее батмишоохьена.
Мана дагъамийвалла нишикейий ва няъасый яратмишивхьайни гьаIкIеедын чыхышбы иджласеехъа абыйни къуллухчерше гьаъы.
Манбышди докладбышихъа кIырыгьувойле хъийгъа, АI.АIбдулмуслимове увгьойн: « КIелихан гьимаъа, аIсас метлеб – республикее ешемишехьени джамаъаIтыс югун шарааитбы яратмишаъый вобна. МаIгьдын месалабы йишди гьийд РФ-ни Президенте гиххьы водунбы. Шавусахъане вушин маIъна дешин докладбы лазымда. КьыIдим аккас’ водун. Шолхъа ремоттбы ва медын ишбы гьаъасын пылбы еттыгъда вахтал’ гьидхьырийнбы. Няъас шу манчика вахтал’ ишбы июле, августе, сентябыре гьидяъы, декабрылхъа гьадсыр?»
Гьар компаниейни регьберылхъа премьер-министре текда-текда тапширыгъ гьуво ва манбышикIле увгьойн ман ишбы сана-санкъуква мислягьатеехъа хъабы , гьаIллеъэ.
